Read Uab Meto YEHEZKIEL 18 Bible Online

YEHEZKIEL 18 - Uab Meto bible

YEHEZKIEL 18

¹UISNENO nakua In a'an neu kau nak,

²“Nansa' es nel le i mateka piut anbi pah Israel? ‘Atoni mnasi anbukae hau tua min kase in fuan le mahai, mes li'ana sin nisken es anmahai.’

³Natuin Au, Uisneno amonit, UISNENO Anesit Afinit, lasi nel nane of ka mateka anteni fa anbi Israel.

⁴Atoni mese-mese in asmanan nane Au ini, he atoni mnasi in asmanan ai in anah in asmanan. Atoni asanat, in es of anmate.

⁵Taleta nak anmu'i atoni alekot, amneot ma amnonot.

⁶In ka naluli ma nabes fa neu fatu le'u ma hau le'u atoni Israel ai in anbukae bukae fua tulu anbi bale-bale luli besa neu uisneno teta. In kan fuli nit fa atoni bian in fenai ai in antup nabua nok bife le in funan fe nem.

⁷In ka namoe nahin fa ai ka nasik fa sa'-sa'. Bale atoni atusat le natus anbi in anfe nafani sin. Atoni le namnah in anfe neune hen bukae ma atoni le kan mu'i fa sobalu, in anfe neune bale pake.

⁸In anfe anlapat ka nok fa sufa. In kan lomi fa hen mo'e lasi amle'ut ma anbi lasi mabanat in anfe lasi fekat nok amneot.

⁹In natuin Au plenat sin ma natuin ale Au lekat lulut sin. Atoni onle nane es amneot ma of anmoni nabalah. Au, UISNENO Anesit Afinit ukua ulali Au a'ak.

¹⁰Mes taleta nak atoni nane anmu'i anah le anlomi he nasik es in sa'-sa', namate atoni, ma le anmo'e lasi amle'ut bian anteni

¹¹le in amaf kan mo'e nani fa ale lasi nane. In nah amnahat fua tulu anbi bale-bale luli besa neu uisneno teta. In anfuli ma antup nok atoni bian in fenai.

¹²In namoe atoni amamu'it, nasik atoni in sa'-sa', in natau atoni sin bale le natus anbi in. In anao neu ume le'u atoni le ka nahin fa UISNENO ma naluli nabes neu fatu le'u ma hau le'u le amainisit.

¹³In anfe anlapat nok sufa. Atoni onle nane of in anmoni ka? Kahaf! In anmo'e nalali ale mo'et amle'ut amainisit nane, ma in of anmate! In amaten nane natuin in taos in mo'et kun.

¹⁴Taleta nak atoni le anmo'e amle'ut namfau nane in anmu'i anah, ma li'ana nane nit ale taos mo'et na'ko in amaf, mes in ka natuin fa.

¹⁵Li'ana nane kan lomi fa he naluli nabes neu fatu le'u ma hau le'u atoni Israel, ai anbukae mnahat fua tulu anbi bale-bale luli besa neu uisneno teta. In kan fuli atoni bian in fenai,

¹⁶ai anhamu'i ai nasik sa'-sa' na'ko atoni bian. Atoni bian sin bale le in ansimo sin natuin natus anbi in, in anfe nafani sin. Atoni le namnah in anfe neu sin hen bukae ma atoni le kan mu'i fa sobalu in anfe neu sin bale pake.

¹⁷In kan mo'e nit fa lasi amle'ut ai anfe anlapat nok sufa. In natuin Au lekat lulut sin ma natuin Au plenat sin. Li'ana nane of kan mate fa natuin in amaf sanat sin, mes in anmoni nabalah.

¹⁸Mes, in amaf le anmoni anbi lasi mo'el, nasik es in sa'-sa' ma le anmo'e lasi amle'ut bian anteni, in of anmate natuin sanat-sanat le in anmo'e kun.

¹⁹Mes oni anmu'i atoni le natoti nansa' li'ana nane in kan sutai nok fa neu in amaf in sanat-sanat sin. In taes nane esle', natuin li'ana nane leko ma amneot. In natuin Au plenat sin ma in nanaoba sin nok aki'at, es nane te in anmoni piut.

²⁰Atoni le anmo'e sanat, in es of anmate. Li'ana of kan sutai fa in amaf sanat; onane amsa, in amaf of kan sutai fa in anah sanat. Atoni alekot of napeni seunbanit lasi alekot natuin in mo'et alekot. Ma atoni amle'ut of in nasusbon natuin in mo'et amle'ut.

²¹Leka atoni amle'ut mese in kan mo'e teni fa sanat, ma in natuin Au lekat lulut sin, ma in anmo'e mo'et alekot ma amneot, in of kan mate fa.

²²In sanat sin ok-oke of ansako sin; in of anmoni, natuin in anmo'e lasi alekot.

²³Ai ho mutenab Au UISNENO Anesit Afinit Au malin kalu atoni amle'ut anmate? Namneo-namneo kahaf! Au lomi he nati' in nasaitan in sanat-sanat sin he nati' in moni nabalah.

²⁴Mes kalu atoni alekot mese in kan mo'e teni fa lasi alekot, mes in anmo'e lasi amle'ut amainisit le atoni amle'ut anmo'e nani, ai of in anmoni nabalah? Kahaf! Na'ko in taos mo'et alekot sin nane, mese amsa kan namnau anteni fa. In of anmate natuin in anmo'e sanat ma ka na'ki fa neu Kau.

²⁵Oni anmu'i atoni le namolok nak on i, ‘UISNENO In taos In mo'et nane ansan.’ Amnen nai, hoi atoni Israel! Au taos Au mo'et nane ansan? Hi es misanab.

²⁶Leka atoni alekot in kan mo'e anteni fa lasi alekot, mes in anmo'e amle'ut, in of anmate, natuin amle'ut le in anmo'e nalali.

²⁷Mes leka atoni amle'ut kan mo'e anteni fa sanat mes in anmo'e lasi amneot ma alekot, in asmanan of anmoni.

²⁸In nahin nalali ale in taos in mo'et sin oke te in nasnas na'ko anmo'e sanat. Nok nane te in of kan mate fa, mes in anmoni nabalah.

²⁹Ma hi, hoi atoni-atoni Israel, hi mimolok mak UISNENO In taos In mo'et nane ansan. Au taos Au mo'et nane ansan ka, hoi Israel? Kahaf! Hi es misanab!”

³⁰UISNENO Anesit Afinit, nakua In a'an nak, “Hoi atoni-atoni Israel, of Au ufek mese-mese in lasi anmatom nok in taos in mo'et. Mite'un nai na'ko hi sanat-sanat sin. Kais mifetin hi sanat he nati' nale'un hi monim.

³¹Misnasab ale hi lasi amle'ut sin le hi mo'e ma nati' hi nekam ma hi tenab anfani fe'u. Nansa' mes hi he mate?

³²Au ka malin fa leka atoni mese anmate. Misaitan nai hi sanat-sanat sin he nati' hi moni mibalah. Au UISNENO Anesit Afinit ukua ulali Au a'ak.”