Read Uab Meto YEHEZKIEL 19 Bible Online

YEHEZKIEL 19 - Uab Meto bible

YEHEZKIEL 19

¹Uisneno anlelu kau he au si sit i neu naimnuke Israel sin nua:

²Ho aina on meo asu ainaf le matani ma maneun le'uf. In nanaeba in ana sin anbi meo asu abe'it ma matani sin sonan sin tananan.

³Ana mese na'ko in ana sin in anbibi ma nanoina he nati' in nami amnahat. Es nane te In anfani meo asu le nanae fun aheket ma amneku mansian.

⁴Uf-uf le sin nen antom in sin nabua hen heke in. Au ek nan in anbi bola' in nanan ma anheke nan in, oke te anhel in neu Mesir neki kai.

⁵Son-sona neu in ainaf le anpao in ana; oke te in nahin nak in panet ma afnekan namneku nalali. Es nane te in anbabi ma nanoina in an es anteni hen fani meo asu amaunut ma matani.

⁶Meo asu ana nane in nanae ma in namnono nok meo asu bian sin. In nanoina nami amnahat, ma in anfani amneku atoni amsa.

⁷In nape' bale solalus, ma nale'un naskuku ale kot. Tuafen pah in nanan sin anlilitai leka sin nen ale sa' nasan'on.

⁸Mes uf-uf na'ko pah le anfun natef in sin anken in na'ko me-me. Sin anpolin tifkai hen heke nan in, ma an ek nan anbi sin bale heke in nanan.

⁹Natam in anbi meo asu sin o'of oke te neki in neu pah Babel, naeku natef nok kesel. Anpanat in nok matani he nati' in hanan kais manena anteni anbi tubu-tubu amnanut Israel.

¹⁰Ho aina on hau tua min kase alekot le anmoni anbi lene anhaumak noe ana. In namlia ma naspeti ma nafua natuin oe anbi nane nathoe kun nok alekot.

¹¹In atlaen nahel, atiput ka tabe'i fa ma nabe'i in anfani tias ana' aplenat. In tunan amnaun le'uf antia nope. Ale atoni namkak neu in natuin in amnanu ma in non amfau le'uf.

¹²Mes nimaf-nimaf le nato' anbok nani in, oke te anpolin in neu nani. Anin anfu na'ko Neno Saen, nameto in fuan alekot. In atlaen natipu, anmeto oke te notu nani.

¹³Tabu i ansen in es paha snaen, nani ametos kan mu'i fa oe.

¹⁴Ai apinat notu nani tua min kase nane in un; in atlaen ma ma in fuan anputu ok-oke. In atlaen kan mu'i teni fa matani; of kat mo'e fa hen fani tias ana' aplenat. Nane han kaet kulut le to ansi piut-piut.