Read Uab Meto YEHEZKIEL 2 Bible Online

YEHEZKIEL 2 - Uab Meto bible

YEHEZKIEL 2

¹Leka au it lasi nane au utsel ma sukbok anbi afu. Nalali te au nen hanaf le nak neu kau nak, “Hoi mansian amates, amfen amhake, Au lomi he umolok ok ko.”

²Anbi tabu au nen hanaf nane, Smanan Knino Uisneno nasaunton neu kau, ma namepan kau. Nalali au nen ateni hanaf nane nak neu kau nak,

³“Hoi mansian amates, Au lelu ko neu atoni-atoni Israel le anmaban ma anlaban Kau. Sin le nane amabanten onle sin na'i ma sin be'i sin amsa.

⁴Sin nakan fatu ma ka naluli nabes neu Kau fa. Au lelu ko neu sin he mutonan sin sa' le Au, UISNENO Anesit Afinit of Au uton neu sin,

⁵neu sin he nen ai kahaf nane ka sa'-sa' fa, mes maut he nati' sin nahin nak anmu'i Mafefa knino anbi sin atnanan.

⁶Mes neu ko, hoi mansian amates, kais mumtausan neu ale atoni amabanat nane, ai neu sa' le sin namolok. Of sin anlaban ma nakle'at ko, talan te onle ho moni ambi kabiti sin atnanan. Maski onane amsa, kais ho mumtau.

⁷Mutiaba ale Au han ba'an neu sin, oni sin he nen ai he kahaf. Mumnau nai sin le nane atoni-atoni alaban.

⁸Hoi mansian amates, mutnin nai sa' le Au he uton neu ko. Kais ho amsa amlaban. Amfai ho fefam ma muah sa' le Au fe neu ko.”

⁹Nalali te au it nimaf le nanon'on neu kau. Anbi nimaf nane anmu'i sulat manunu mese,

¹⁰le matua anbi in ninen sin nua sin. Oke te In anfai sulat manunu nane ma anbi nane matui lasi kaet kulut, lasi sakoit ma sananet.