Read Uab Meto YEHEZKIEL 20 Bible Online

YEHEZKIEL 20 - Uab Meto bible

YEHEZKIEL 20

¹Anbi fun nima antam neno bo'mese, anbi ton hitu hai mapolin kai, atopus to Israel sin fauk-fauk nem neu kau ma antoti fainekat UISNENO. Leka sin antoko anbi au humak au matak,

²au nen UISNENO nakua In a'an neu kau nak,

³“Hoi mansian amates, mumolok nai neu atopu to sin nane ma mutonan sin mak Au, UISNENO Anesit Afinit Au ukua Au a'ak on i, ‘Hi matani le'uf ki talan te him toti fainekat na'ko Kau! Natuin Au, Uisneno amonit, Au ka lomi fa he him toti fainekat na'ko Kau! Au, UISNENO Anesit Afinit ukua ulali Au a'ak.’

⁴Hoi mansian amates, ho muloitnom ka he nati' mufek lasi neu sin? Nah, munaoba nai! Mumnauba sin neu ale lasi hainisit le sin be'i sin na'i anmo'e nalali.

⁵Mutiaba sa' le Au uton ko le i. Au beti ulali Israel ma Au aiti ulali supat neu sin. Anbi Mesir, Au uton Au aok neu sin ma Au ak, ‘Au le i hi UISNENO.’

⁶Anbi tabu nane Au sup he eki sin anpoi na'ko Mesir anao neu pah le Au beti neu sin. Pah nane maafa ma namlia, pah le leok le'uf anbi pah pinan ok-oke.

⁷Au lelu sin hen polin le'u mahuma ahainisit le sin anlomi nane, ma Au ukain sin he kais nalahi sin aoken natuin naluli ma nabes neu fatu le'u ma hau le'u na'ko Mesir, natuin Au sin UISNENO.

⁸Mes sin anlaban Kau ma kan lomi fa he nen Kau. Sin kan lomi fa hen polin ale le'u mahuma le neki hainisit nane ma kan lomi fa amsa he nasnas na'ko naluli ma nabes neu fatu le'u hau le'u atoni Mesir. Anbi neno fe sin anbi bale nane, Au uloitan ulali he ufetin Au to'as neu sin.

⁹Mes Au ka unaoba fa lasi nane, he nati' Au kanak kais uf-uf anbi pah nane nasi'u. Natuin anbi uf-uf nane sin matan, Au uton uali ak to Israel of Au eki anpoi na'ko Mesir.

¹⁰Oke te Au eki sin anpoi na'ko Mesir anao neu mnela snaen.

¹¹Anbi nane Au fe neu sin ale Au plenat sin ma Au noina sin ale Au lekat lulut sin le mes sin he natuin, natuin atoni le natuin of in moni nabalah.

¹²Au lelu sin he naliatas Neno Snasat anfani on taka' neu Au lasi manta'en ok sin, he umnauba sin ak Au UISNENO Kau, Au beti uteta ulali sin neu Kau.

¹³Mes anbi mnela snaen nane amsa sin anlaban Kau. Sin antanhai Au plenat sin, ma sin antite Au lekat lulut sin le neki lasi alekot nak atoni le natuin sin of anmoni nabalah. Sin nale'un Neno Snasat. Es nane te, anbi mnela snaen nane Au uloitan ulali he ufetin Au maunu ma Au to'as neu sin ma ule'un sin.

¹⁴Mes Au ka unaoba ani fa natuin Au panat Au kanak in alekon, he nati' ale uf-uf kais sin nasi'u Au kanak le ankiso Kau Au eki ma upoitan Israel na'ko Mesir.

¹⁵Anbi mnela snaen nane amsa Au sali sin ak to Israel Au ka eki fa sin hen tam neu pah le Au uloitan ulali neu sin, pah le amu'it kun ma maafa ma le leko le'uf anbi pah pinan ok-oke.

¹⁶Lasi salit nane Au umolok natuin sin kan sian fa ale Au plenat sin, sin antanhai Au lekat lulut sin ma sin nale'un Neno Snasat. Sin anlomi he naluli ma nabes neu sin fatu le'u ma sin hau le'u.

¹⁷Mes namuni te Au nek umnau sin, talan te Au ka umate fa sin anbi mnela snaen nane.

¹⁸Mes Au fainek sin munif sin, Au fainek sin ak on i, ‘Kais hi mituin ale lekat lulut le hi na'i hi be'i anmo'e sin. Kais mituin sin monin ma kais milahi hi aom nok hi miluli ma mibes neu sin fatu le'u ma sin hau le'u.

¹⁹Hi UISNENO es Au. Mituin Au lekat lulut sin ma Au plenat-plenat sin.

²⁰Miliatas Neno Snasat he nati' anfani taka' lasi manta'en Au ok ki, he namnauba ki nak Au le i hi UISNENO.’

²¹Mes atoni munif batan nane amsa sin anlaban Kau. Sin antanhai Au lekat lulut sin ma kan sian fa Au plenat-plenat sin, le neki lasi alekot nak atoni le natuin of in moni nabalah. Sin nale'un Neno Snasat. Es nane te Au uloitan ulali he ufetin Au maunu ma Au to'as neu sin anbi mnela snaen nane ma umate sin ok-oke.

²²Mes Au ka unaoba fa he nati' uf-uf le sin nit Au eki Israel anpoi na'ko Mesir sin ka nasi'u fa Au kanak.

²³Anbi mnela snaen nane amsa Au sup ak of Au usana sin neu pah pinan ok-oke,

²⁴natuin sin kan sian fa Au plenat-plenat sin, sin antanhai Au lekat lulut sin, sin nale'un Neno Snasat, ma sin naluli nabes piut neu ale uisneno teta le sin na'i sin be'i naluli ma nabes neune.

²⁵Nalali te Au fe neu sin lekat lulut le ka naleko fa ma plenat le ka neki fa monit neu sin.

²⁶Au ufetin sin he nalahi sin aoken neki sin fua tulu kun, fun sin anmone anaet sin natulu sin. Nok lasi nane te Au kas sin he nati' sin nahin nak Au le i UISNENO Kau.

²⁷Nah, mansian amates, mutiaba neu atoni Israel, sa' le Au UISNENO Anesit Afinit uton neu sin: I leta bian le naton neu hi na'i hi be'i sin nasi'u Kau ma sin na'ki fa neu Kau.

²⁸Au eki sin neu pah le Au ba'an ulali neu sin. Leka sin nit tubu-tubu amnanut ma ale hau le an no mate, sin natulu fua tulu anbi bale-bale nane. Sin anmo'e Kau talan te Au uto' natuin ale fua tulu mnotu nane ma sin fua tulu tua min kase.

²⁹Au utoti sin ak, ‘Bale-bale amnanut me ka es him nao meune nane?’ Na'ko neno nane bale-bale nane antek sin nak, ‘Bale-bale amnanut’.

³⁰Es nane te mutiaba neu atoni Israel sin sa' le Au, UISNENO Anesit Afinit le Au uton neu sin. ‘Nansa' hi mo'e ale sanat onle hi na'i hi be'i sin anmo'e? Onle sin, hi amsa mituin fatu le'u ma hau le'u le neki hainisit nane.

³¹Fun antia neno le i amsa hi milahi hi aomen natuin hi meki fua tulu ma hi motu hi anah-anah sin anfani fua tulu neu fatu le'u ma hau le'u. Oke te fe nabe'i fa him toti fainekat na'ko Kau? Natuin Au, Uisneno amonit, UISNENO Anesit Afinit, Au ka ufetin ki fa hem toti fainekat na'ko Kau.

³²Him lomi he papmese ki on uf-uf bian ma tuafen pah bian le naluli nabes neu hau ma fatu. Mes hi lasi sinmakat nane of ka nanokbon fa.’ ”

³³“Natuin Au, Uisneno amonit, UISNENO Anesit Afinit, Au umnauba ki ak natuin Au to'as, of Au uplenat ki nok matani ma maputu talan te him naben Au kuasat. Of Au nibun ubuaba ki ma of Au eki ufani ki na'ko ale pah bale Au usana ki.

³⁴

³⁵Oke te of Au eki ki neu ‘Mnela Uf-uf’. Anbi nane of Au ufek lasi neu ki humaf nok humaf,

³⁶onle Au mo'e ulali neu hi na'i hi be'i sin anbi Mnela Sinai. Au UISNENO Anesit Afinit ukua ulali Au a'ak.

³⁷Of Au tao ma mo'e ki nok matani he nati' hi mituin Au lasi manta'en.

³⁸Ale alaban ma amaufinut of Au uneku sin na'ko ki. Of Au eki sin anpoi na'ko pah-pah bale tabu le i sin natua anbine ma Au ka ufetin fa sin hen fani neu pah Israel. Ma sin nahin nak Au le i UISNENO Kau.”

³⁹UISNENO Anesit Afinit nakua a'an nak, “Hoi atoni-atoni Israel, tabu le i him beti kim. Anmo'e sanat piut nok miluli ma mibes neu hi fatu le'u hau le'u sin! Mes mimnau nai nak namuni na'ko nane hi mes mituin Kau ma ka milahi amteni fa Au kanak le knino nane nok hi meki fua tulu neu hi fatu le'u ma hau le'u nane.

⁴⁰Natuin anbi pah Israel, anbi Au tubu knino in tunan, hi al-al ki, to Israel of hi miluli ma mibes neu Kau. Anbi nane of Au nekak anmalin neu ki ma Au lomi he simo ale hi fua tulu sin, hi fua tulu alekot bainesi sin ma hi tnatas le hi miteta mani.

⁴¹Leka Au eki ki ma ampoi milali mi'ko pah-pah bale le Au usana ki, of Au nibun ubuab ki ma Au simo ale hi fua tulu mnotu sin. Ma ale uf sin nahin nak Au le i Uisneno Knino knao matani Kau.

⁴²Leka Au eki ufani ki neu pah Israel, pah le Au ba'an ani neu hi na'i hi be'i sin ma of hi mihin nak Au le i UISNENO Kau.

⁴³Anbi nane of hi mimnau ale hi taos hi mo'et hainisit nane le nalahi nalali hi aom. Ma of him naben on hem lo' leka hi mimnau ale lasi le anbol nalali nane.

⁴⁴Leka Au mo'e ulali ki onane he nati' naliatas Au kanak, ma kan matom fa nok hi taos mo'et amle'ut ma hi taos hi mo'et maufinu, atoni Israel hi mihin nai nak Au UISNENO Kau, Au UISNENO Anesit Afinit ukua ulali Au a'ak.”

⁴⁵UISNENO nakua In a'an neu kau nak, on i,

⁴⁶“Hoi mansian amates, amkiso nai neu bian a'li. Mubokan pah bian a'li ma amlaban nai nasi anbi nane.

⁴⁷Amlelu nasi nane he nen sa' le Au UISNENO Anesit Afinit he uton neune, ‘Amnen nai! Of Au upina ai ma notu nani ale hau le anbi ko, leko le anmeto ai le fe mate. Ai le anpin-pin nane of kan sifo nabe'i fa. In of anpin na'ko bian a'ne'u nao neu a'li, ma ale atoni of sin naben in maputu nane.

⁴⁸Of sin nahin nak Au, UISNENO upina ulali ai nane, ma katit fa atoni mese amsa le hen sifu nabe'i.’ ”

⁴⁹Mes Au Nai Yehezkiel au uton au nekak le anma'fen ma au ak, “UISNENO Anesit Afinit, kais amlelu kau he uton lasi nane! Ale atoni ansakoi natuin au lomi he umolok eki uab polin talan te sin kan heke nahin fa in nesan.”