Read Uab Meto YEHEZKIEL 21 Bible Online

YEHEZKIEL 21 - Uab Meto bible

YEHEZKIEL 21

¹UISNENO nakua In a'an neu kau nak,

²“Hoi mansian amates, amsukat Yerusalem nai. Amsukat ale bale luli besa anbi nane. Mumnauba nai pah Israel,

³mak Au, UISNENO Kau, ukua Au a'ak on i, ‘Au le i hi musu es Kau. Of Au faki Au suni ma Au umate ki ok-oke, leko anmo'e amle'ut ma anmo'e alekot.

⁴Of Au laban atoni oke eki Au suni na'ko bian a'li talan te bian a'ne'u.

⁵Ma ale atoni of sin nahin nak Au, UISNENO Kau, Au faki Au suni ma of Au ka utap ufani fa.’

⁶Hoi mansian amates, amhunun ma mutlak nai anbi atoni-atoni Israel sin human sin matan, onle ho nekam namen ma ho am ole.

⁷Kalu sin natoti nak nansa' ho mutlak, mutonan sin mak ho mususbom natuin hanaf le of in nem. Hanaf nane of anmo'e sin nekan anlilitai, sin niman an ole, ma sin tuken na'tai', sin of ka nabe'i anteni fa. Namneo in tabu antelen, ma ale lasi nane of anbol. Au UISNENO Anesit Afinit ukua ulali Au a'ak.”

⁸UISNENO nakua In a'an neu kau nak,

⁹“Hoi mansian amates, mumolok nai neu sa' of anbol! Muton nai neu atoni-atoni sin mak Au, UISNENO ukua Au a'ak on i, ‘Anmu'i suni mese, suni le anfon ma na'aik.

¹⁰Na'aikab in he nati' nabe'i namate atoni, an aki in he nati' nalim-lim. Kan mu'i anteni lasi amlilat neu Au to natuin ale lasi mnauba ma lasi kasat sin kan sian nani fa.

¹¹Suni nane anfon man aki he nati' anpake piut oke te nana'at neu atoni abe'it ma matani mese.

¹²Hoi mansian amates, amkae nai ma amhunun nai! Natuin suni nane naloitan nalali hen laban Au to. Ale ana' aplenat Israel nok ale to suni nane of napau sin talan te sin namle'u. Ampas hi basmen nai nok nek susal,

¹³natuin Au fe su' Au to, kalu sin kan lomi fa he naleko sin monin, ale lasi nane of anbol neu sin.’

¹⁴Nah, mansian amates, mumolok nai neu sa' le of anbol. Ampas hi basmen nai, anfani on taka' neu suni nane he namate atoni. Suni nane neki hakataus nae le'uf.

¹⁵In anmo'e Au to sin be'ik sin matanin namneku ma anpastun ma anbel. Au sali sin kot eki suni nane le nalim on limat, ma le naloitnon he namate atoni.

¹⁶Hoi suni a'aikat, am ote neu a'li ma a'ne'u neu bale me le hom lomi.

¹⁷Of Au ke Au nimak amsa, oke te Au to'as of ansanu. Au, UISNENO Kau ukua ulali Au a'ak.”

¹⁸UISNENO nakua In a'an neu kau, nak,

¹⁹“Hoi mansian amates, amlun lanan nua le nabe'i kesel Babel anao nokan le neki in suni. Lan nua en nane sin mes naubok na'ko pah mese; lanan mese anao neu Raba, kot Amon; ma es te anteni anao neu Yerusalem, kot mabaki lape anbi Yehuda. Mihakeb bena malula alek lanan anbi bale lanan nane in sekin.

²¹Kesel Babel in anhake anhaumak papan alek lanan nane. He nahin neu bale me es of in anao nokan, in antoti fainekat na'ko in fatu le'u hau le'u sin, anheko auni ma antae mu'it in aten le fe natulu nalali.

²²Fun naton nak as'anef le in naiti nan neki in niman a'ne'u anmu'i taka' Yerusalem! Nane in otan nak kesel mes he nape' Yerusalem, ankoa han makenat ma anlelu in solalus sin naloitan bale makenat, antao neu eno-eno naek Yerusalem, anibun afu anfani baki lape makenat ma anhani lolok.

²³Tuafen Yerusalem sin of ka nateb fa nak he nape' sin, natuin sin anmo'e nalali lasi manta'en nok Babel. Mes molok nane of namnauba sin nak mes of anheke sin natuin sin sanat-sanat sin.

²⁴Au, UISNENO Anesit Afinit Au uton neu sin ak, ‘Hi sanat-sanat sin Au uhin ulali sin ma ale atoni sin nahin nak hi misanab. Hi lasi amle'ut nane natonon anbi ale hi taos hi mo'et sin. In tabu antelen he nati' ankas ki ma of Au una'at ki neu hi musu sin.’

²⁵Ma neu Kesel Israel Au ukua Au a'ak ak, ‘Hoi kesel amle'ut ma ka aki'at! Tabu neu ho hem simo ho kasat anhaumaken.

²⁶Au, UISNENO Anesit Afinit ukua ulali Au a'ak. Mufetin ho sobe mnatu nai ma mupoitan ho pilu nai. Tabu le i, lasi natononen. Muaiti atoni amamu'it sin monin ma amfe neu sin kuasat! Musanut ale ana' aplenat na'ko sin a'toko!

²⁷Kot le i of Au ule'un ani ok-oke, talan te anbi me-me anmu'i fatu tutnae. Mes lasi nane of in anbol leka atoni le Au beti neu hen kas kot nane in nem nalali. Kot le i of Au una'at neu in.’ ”

²⁸“Hoi mansian amates, mumolok nai neu lasi amnemat! Muton nai neu atoni Amon le sin nasi'u nalali atoni Israel, mak Au, UISNENO Anesit Afinit ukua Au a'ak ak, ‘Suni mese naloitnon nalalien he namate atoni; anfon nalali suni nane nalim on limat, he nati' naloitnon he namate atoni.

²⁹Lasi mnitas le hi mit nane lasi luman, ma uab molok le hi miton nane amsa mo'el ma poi. Hi amo'e amle'ut ki ma ka aki'at ki fa, ma tabu neu hi hem simo hi kasat nane anhaumak nalalien. Suni nane of an ote nafek hi neom.

³⁰Hoi atoni Amon, mutap mufani ho suni! Of Au ufek hi lasi anbi bale le antao ma anmo'e ki ma le nahonis ki anbine.

³¹Of Au polin neu ki Au to'as le anpin-pin. Ma of Au una'at ki neu atoni-atoni amaufinut ahinet he nale'un ki.

³²Ai of notu nani ki ok-oke. Hi na' of an op non anbi hi pah kun, ma katit fa atoni mese amsa le fe he namnau ki. Au UISNENO ukua ulali Au a'ak.’ ”