Read Uab Meto YEHEZKIEL 22 Bible Online

YEHEZKIEL 22 - Uab Meto bible

YEHEZKIEL 22

¹UISNENO nakua In a'an neu kau, nak,

²“Hoi mansian amates, ho muloitan mulalien ka he mufek lasi neu kot le nahenu nok amalolot nane. Muton neu sin ale sin taos sin mo'et amainisit nane.”

³UISNENO Anesit Afinit anlelu kau he utiaba han ba'an in neu Yerusalem ak, “Ho musanab natuin ho mumate mulali na'ko ho to amfau le'uf, ma ho mulahi ho aom natuin mululi ma mubes neu fatu le'u ma hau le'u le ho mo'e sin. Es nane te tabu le he nafek ho lasi anhaumak nalalien ma ho monim of ka lo fa anteni te namsopu. Au ufetin ko he nati' ale uf-uf ma pah-pah nasi'u ko ma anmanis ko.

⁵Pah-pah a'lot ma ahaumakat of sin naakan ko natuin hom tanhai ale plenat ma lekat lulut.

⁶Ale ana' aplenat Israel sin ansonlaiton neu sin be'in sin matanin ma sin nanaoba lasi malolot.

⁷Katit fa es na'ko in to sin he namtausan sin mnasi sin. Ho mutin atoni anao amnemat ma maiti lasi mnisat na'ko banu ma manat.

⁸Hi milahi bale-bale luli besa neu Kau ma neno Snasat ho kam sian mani fa.

⁹Anmu'i na'ko ho to sin aktuta lasi le nale'un atoni bian sin kanan he namate sin. Anmu'i amsa le anlomi nah sisi le natulu nalali neu fatu le'u hau le'u. Anmu'i anteni bian le anmo'e lasi mapaisa.

¹⁰Anmu'i le anfuli ma antup nok in ainaf akliko, bife le fe in funan nem,

¹¹atoni bian in fenai ai in nanef ai in olif na'ko aina teta.

¹²Anmu'i amsa le anbaen he namate atoni, nasusu' atoni bian ma nasusu' atoni-atoni na'ko sin pah mese. Sin ok-oke nikan nalali Kau. Au UISNENO Anesit Afinit ukua ulali Au a'ak.

¹³Mes tabu le i of Au fe kasat neu ho asikat sin ma ho amalolot sin.

¹⁴Ho fe matani le'uf ko ka ai ho fe mube'i ka he maiti ho nimam leka Au kas ulali ko? Au, UISNENO Anesit Afinit ukua ulali Au a'ak maa of Au unaoba sa' le Au uton ulali.

¹⁵Ho to sin of Au usana sin neu ale pah ma uf, ma of Au usnasab ho taos ho mo'et amle'ut nane.

¹⁶Uf-uf bian of nasi'u ko, ma ho muhin nak Au le i Au UISNENO Kau.”

¹⁷UISNENO nakua In a'an neu kau nak,

¹⁸“Hoi mansian amates, atoni-atoni Israel nane sin ka maota fa neu Kau. Sin maleta onle noni molo maselo, besi molo, besi litef, besi ma besi litef metan nesif leka naknino nalali noni muti anbi ai.

¹⁹Es nane te, tabu le i, Au, UISNENO Anesit Afinit, Au uton neu sin ak sin onle noni molo le ka maota fa nane. Onle noni muti, noni molo, besi, besi litef metan ma besi litef muti natam sin neu ai he naknino sin, onane amsa sin of Au ubuab sin ma Au eki sin neu Yerusalem. Au to'as le matani nane of notu sin onle besi le namnoe anbi ai in nanan.

²¹Namneo, of Au ubuab sin anbi Yerusalem, Au tao Au ai to'as neu sin, talan te sin noe nani ok-oke.

²²Onle noni muti noe nani anbi ai in nanan, onane amsa of sin noe nani anbi Yerusalem. Ma sin nahin nak Au, UISNENO, ufetin ulali Au to'as neu sin.”

²³UISNENO nakua anteni In a'an neu kau, nak,

²⁴“Hoi mansian amates, mutonan atoni Israel mak sin pah nalahi nalali, ma es nane te Au uto' ma Au kas sin.

²⁵Ale sin ana' aplenat sin onle meo asu le an anbai leka in anheke nalali mu'it le in he neku. Sin namate to, ma nasik ale maus ma mu'if le sin natef nokan ma anmo'e talan te bife namfau le anfani banu.

²⁶Ale Ana' fuat knino Israel sin tanhai Au plenat sin ma nalahi ale Au bale le nateta sin neu Kau. Sin kan beti nahin fa me es leko ma me es amle'ut. Ma sin amsa ka nanoina fa to hen beti nahin me es aknino ma me es nalahi matom nok lekat lulut lasi knino. Sin kan sian fa Neno Snasat. Nok nane te to Israel sin nasi'u Kau.

²⁷Ale sin ana' aplenat onle meo asu le sin anpisu mu'it le anheke ma he neku. Sin nanaoba lasi namate atoni al he nami lasi mnisat.

²⁸Ale Mafefa knino sin natolo' sanat-sanat nane; sin onle atoni le nose ao neu lape le ka naknino fa. Sin lasi mnitas luman kun, onane amsa sin lasi molok neu lasi amnemat. Sin nateb nak han ba'an le sin natiaba nane sin ansimo na'ko UISNENO Anesit Afinit, mes namneo-namneo Au ka ukua fa Au a'ak neu sin.

²⁹Atoni-atoni amu'it sin anfuli ma nasik. Sin antao ma anmo'e atoni amamu'it sin natuin sin lomin kun ma sin naiti lasi mnisat na'ko atoni anao amnemat.

³⁰Anbi atoni Israel nane, Au ami atoni le nabe'i nahakeb baki lape, ai anhake anbi bale-bale le in baki lape sin natsel he nati' natau pah nane leka Au he ule'un ani anbi Au to'as ma Au maunu; mes katit fa atoni mese amsa le Au he utef okan.

³¹Es nane te tabu le i Au ufetin Au to'as neu sin, ma on ai Au mes ule'un sin natuin sin taos sin mo'et. Au UISNENO Anesit Afinit ukua ulali Au a'ak.”