Read Uab Meto YEHEZKIEL 23 Bible Online

YEHEZKIEL 23 - Uab Meto bible

YEHEZKIEL 23

²“Hoi mansian amates, anmu'i fenai nua, anma oli tatan.

³Anbi tabu sin fe muinfen, sin natua anbi Mesir. Anbi nane sin aon ateme namneku, oke te sin anfani bife amapaisa.

⁴Anaet in kanan bi Ohola. In anfani takaf neu Samaria. In olif kanan bi Oholiba; in anfani takaf neu Yerusalem. Au mafe ok sin ma upeni anah na'ko sin nua sin.

⁵Maski bi Ohola anfani nalali Au fenai, in anmapaisa nabalah, ma in anmalin anae le'uf hen tuthae in bia neka sin na'ko Asyur.

⁶Sin le nane solalus le anpake sobalu me kanalu, ale makana sin ma ana' aplenat amnanut; sin ok-oke solalus nakaf asae bikase le sin humken namasan.

⁷Bi Ohola in anmapaisa nok ale anaet-anaet nane. Nesi anteni te natuin in nek sinmakat nane anae le'uf, in nale'un in aon fun in naluli ma nabes neu ale sin fatu le'u ma sin hau le'u.

⁸In anmapaisa piut onle afi in antao ma anmo'e anbi Mesir, le afi in aon ateme namneku anbine. Na'ko in fe an-ana, atoni antup nokan nalali ma antao ma anmo'e in on amapaisa.

⁹Es nane te Au una'at in bia neka sin, atoni-atoni Asyur le in ansinmakan sin anae le'uf nane.

¹⁰Sin na'monas in nok to'as, oke te namate in neki suni, ma nasik nan in anah-anah sin. Anbi me-me bife sin antek nan in kanan piut-piut.

¹¹In olif, bi Oholiba in nit ale lasi nane, mes in nek sinmakat anesi anteni antao ma anmo'e lasi mapaisa na'ko bi Ohola.

¹²Bi Oholiba amsa in ansinmak anae le'uf kun neu atoni-atoni Asyur nane, nane munif-munif amasat na'ko solalus asae bikase sin, atoni makana sin ma ana' aplenat amnanut, ma solalus le anpake sobalu me kanalu nane.

¹³Au it nak bi Oholiba nane namle'u anesi, papmese onle in tataf.

¹⁴Bi Oholiba nane in anao piut anbi lasi amle'ut. In ansinmak anae le'uf neu ale lunat anbi klipit, le namasab sin cet le me onle na'. Lunat-lunat nane takaf na'ko solalus nakaf sin na'ko Babel nok pasu futu amasat ma pilu muti malunat.

¹⁵

¹⁶Leka bi Oholiba in nit lunat-lunat nane, in sinmakat ansae anfen ma in ansonu han honet neu ale solalus nakaf abit Babel nane.

¹⁷Onane te sin nem ma sin antup nok in. Sin nale'un in matani le'uf talan te namuni te in onle hen lo' neu sin.

¹⁸Namuni na'ko nane te nok mat-mat in anmapaisa ma in naton in aon neu atoni amfaun. Leka Au kiso in Au on he lo', onle Au lo' neu in tataf.

¹⁹Neno nao neno in anmapaisa piut, papmese onle afi fe in munif leka in anmapaisa anbi Mesir.

²⁰In ansinmak anae le'uf neu aotni le in nek sinmakat anfen nok matani, ma in sinmakat anfe anae le'uf onle bikase keso in sinmakat. (

²¹Hoi Oholiba, hom sinmak he mufanik amteni ho taos amle'ut le ho mo'e anbi afi ho fe munif ko leka atoni Mesir sin antup nok ko.)”

²²UISNENO Anesit Afinit nakua In a'an nak, “Hoi Oholiba, hom lenan mulali ho bia neka sin, mes of Au lelu sin he nati' sin nato'an ko ma sin nape' ko.

²³Of Au nibun ma Au eki neu ko ale ho bia neka sin na'ko Babel, Pekod, Soa, Koa, Asyur, ma atoni-atoni Kaldea. Au eki neu ko munif-munif amasat le anmu'in kanaf amnanut, anmu'in kanaf mateka, ana' aplenat atomatas bian anteni ma solalus nakaf asae bikase sin.

²⁴Sin of nape' ko na'ko bian a'li neki solalus le namfau, ma aklet makenat sin ma aklet-aklet amneki bukae. Fun sin anpake ben besi tika ma sobe-sobe besi, sin of anfun natef nan ko. Of Au ufetin ko he nafek ho lasi natuin sin lekat lulut.

²⁵Natuin Au uto'an ko, Au ufetin ko he sin tao ma anmo'e ko nok to'as. Ho panam ma ho lukem of sin anketu ma of sin naiti ho anah-anah sin ma notu sin nok ahonis.

²⁶Of anmonas ko ma of sin nasik nan ale ho pake noas sin.

²⁷Onle nane of Au usnasab ho sinmakat nek maliaba nane ma ale lasi kake le ho mo'e leka ho fe ambi Mesir. Ho of ka nabe'i fa he mufnek neu fatu le'u ma hau le'u me amsa ai he mumnau Mesir.”

²⁸UISNENO Anesit Afinit nakua a'an nak, “Of Au una'at ko neu atoni-atoni le hom kiso sin te hom lo' ma muto'an sin.

²⁹Natuin sin nato'an ko, ale ho haet in nesan of sin nasik nan. Of sin namaika ko ho mes ma ho monas afa-afa ko on amapaisa ma muli'om neu atoni amfaun. Ho sinmakat maliaba ma ho lasi mapaisa

³⁰le neki ko lasi amle'ut le i neu ko. Hom fani amapaisa neu uf-uf, ma mulahi ho aom meki sin fatu le'u ma sin hau le'u.

³¹Ho mutuin ho tataf in nobin, es nane te of Au fe neu ko kasat eki kasat le papmese.”

³²UISNENO Anesit Afinit nakua In a'an, “Of ho minu ho tataf in klas mninut in nesan. Klas mninut nane naek ma mnanu. In nesan nane nahenu nok si'ut ma akan, le mes hom sutai na'ko atoni mese-mese.

³³Klas mninut ho tataf nane es Samaria, nahenu nok lasi amtaus ma lasi amle'ut. Leka ho minu mulali in nesan ok-oke of ho mafu ma mususbom. Ma nok klas mninut nane in pisan sin of hom pisu ho basam. Au, UISNENO Anesit Afinit ukua ulali Au a'ak.”

³⁴

³⁵UISNENO Anesit Afinit nakua In a'an nak, “Natuin hom nikan mulali Kau ma hom koti Kau, of ho mususbom natuin ho sinmakat maliaba nane ma ho lasi mapaisa.”

³⁶UISNENO nakua In a'an nak, “Hoi mansian amates, ho muloitan mulali ka he mufek lasi neu bi Ohola ma bi Oholiba? Mubokan sin neu sin hainisit le sin anmo'e nalali.

³⁷Sin anmo'e nalali lasi kake ma maten; sin anmakake nalali nok ale fatu le'u ma hau le'u ma sin namate Au anah-anah sin le sin nahonis sin. Li'ana-li'ana nane sin natulu nalali sin neu sin fatu le'u ma sin hau le'u.

³⁸Ma ka al fa lasi nane anmes. Sin anhainisi nalali Au Ume ma Au Neno Snasat le Au lek ulali.

³⁹Anbi neno sin namate Au anah-anah sin ma sin natulu neu fatu le'u ma hau le'u, olif takaf nua en nane sin nem neu Au Ume ma sin nalahi nani!

⁴⁰Nesi na'ko nane te sin ansonu han honet neu ale li'mone-li'mone anbi pah-pah a'lot, ma sin nanokab han honet nane. Neu hen simo ale anhone sin le nane, olif tataf nua en nane sin naniu, sin nanoas sin matken ma sin anpake ale sin bale pake amasat sin.

⁴¹Oke te sin antoko anbi bale amasat. Anbi sin human sin matan anmu'i mei le nahenu nok ale bukae fun atu fomeni ma mina bub fua mina le Au fe ulali neu sin.

⁴²Na'ko mone atnen hanaf aslutuf atoni namfau le namlil ma namoke. Atoni-atoni nane anhone sin nem na'ko mnela snaen. Sin napakeb olif tataf nua en nane niti neu sin niman, ma antao neu sin sobe amasat anbi sin anakan.

⁴³Oke te Au utenab ak, ‘Atoni-atoni nane fe sin anlomi ka he nabae' lasi maliaba nok amapaisa-amapaisa le sin humken anmutik natuin lasi makaket?’

⁴⁴Atoni-atoni nane sin masenu ma anmaseka sin nem neu bi Ohola ma bi Oholiba, amapaisa nua en nane le sin namle'u nalali.

⁴⁵Mes, atoni-atoni amneot of sin nafek lasi neu olif tataf nua en nane natuin lasi kake ma mate atoni, natuin namneo sin nasanab.”

⁴⁶UISNENO Anesit Afinit nakua In a'an nak, “Mo'en atoni amaufinut pukan mese hen hamu'i ma nasik amapaisa nua en nane.

⁴⁷Maut hen poli sin neki fatu ma namate sin neki suni. Maut hen lolo sin anah-anah sin ma notu sin ume-ume sin.

⁴⁸Of Au uneku ani amle'ut anbi pah in nanan ok-oke. Au taos Au mo'et nane of anfani lasi mnauba mese neu ale bife he nati' sin kais anmo'e lasi kake on olif tataf nua en nane.

⁴⁹Hoi Ohola ma Oholiba, of Au fe neu ki kasat natuin hi mo'e lasi kake ma miluli mibes neu fatu le'u ma hau le'u. Ma hi mihin nak Au le i UISNENO Anesit Afinit Kau.”