Read Uab Meto YEHEZKIEL 24 Bible Online

YEHEZKIEL 24 - Uab Meto bible

YEHEZKIEL 24

¹Anbi fun bo' antam neno bo'mese, anbi ton sio neno hai mapolin kai, UISNENO nakua In a'an neu kau nak,

²“Hoi mansian amates, amtui funan le i antam neno fauken, natuin neno i kesel Babel anfen ma anfun natef nan Yerusalem.

³Au, UISNENO, Au mu'i lasi leta mese he mutiaba neu Au to le anlomi hen laban: Amtao oe neu tasu in nanan oke te amtao neu ai in fafon.

⁴Amtao sisi neu in nanan sisi le leok le'uf; nesa abit in hanun ma nesa anbi pusun ma ale nuif le anmu'i lolef anaek.

⁵Ampake sisi bibi kase apokat ma fe tipu amsato in hau hopit sin. Maut he na'lot ma oe anlilitai muhan sisi nane nok in nuifen.”

⁶UISNENO Anesit Afinit nakua In a'an nak, “Amle'ut neu kot le nahenu nok amate atoni nane! Kot nane onle nai' le an nutu le kan fon nit nani fa. Sisi le anbi in nanan napoitan tuka mese-mese, talan te katit fa es amsa le he nabalah.

⁷Anbi kot nane anmu'i lasi malolot, mes in na' fua tulu kan sai fa neu nani, mes ansai neu fatu ahelat mese, talan te kan kub nani fa.

⁸Na' nane Au nabalah anbi nane talan te mnita ma antoti seunbanit.”

⁹UISNENO Anesit Afinit nakua In a'an nak, “Amle'ut neu kot nok atoni amate atoni nane! Au eknok of uloitan au he otu ani.

¹⁰Amsato amteni in hau sin! Ampese in ai! Mihan in sisi! Ampolin in oef. Motu mani in nuif sin!

¹¹Tabu le i amtao nai' noni molo luman nane neu ai in fafon talan te me' amtasa. Leka in nautus anputu nalali, nai' nane of naknino anfani natuin lekat lulut lasi knino.

¹²Mes in nautus sin of ai ka naneku fa ok-oke.

¹³Hoi Yerusalem, ho taos ho mo'et amle'ut sin le nane nalahi nalali ho aom. Au uhelnok he uknino ko, mes kan mu'i fa in otan, natuin ho mulahi mubalah. Ho ka muknino fa amfani talan te Au ufetin Au to'as neu ko.

¹⁴Au, UISNENO Anesit Afinit ukua ulali Au a'ak. In tabu antelen neu Kau he nati' unaob ale Au salit sin. Au of ka nikan fa ho sanat sin ma Au ka sako fa ho sanat sin ma ka nek umnau ko fa. Of Au fe kasat neu ko matom nok ale ho taos sin. Au, UISNENO Anesit Afinit ukua ulali Au a'ak.”

¹⁵UISNENO nakua In a'an neu kau nak,

¹⁶“Hoi mansian amates, nok askeken of Au aiti atoni le hom nek misan. Mes ka nabe'i fa he hom kulu ma amkae, ai ka nabe'i fa he hom matnu sin ansai.

¹⁷Ka nabe'i fa es an nen ho susal nukat nane. Leka hom nao ka nabe'i fa amtobe ho nakam, ai ka nabe'i fa hem pake peni haef, on atoni akulut ma akaet. Ka nabe'i fa amsa hem tobe ho humam, ma ka nabe'i fa he hom bukae utunu' kulut ma kaet.”

¹⁸Nok-noka au umolok neu to nane ma anbi fai nane au fenai anmate. Noka fa au unaoba sa' naplenat neu kau.

¹⁹To natoti nak, “Nansa' Ama ho mo'e onle i? In otan sa' neu kai ka?”

²⁰Oke te au ak sin ak, “UISNENO es anlelu kau

²¹utiaba han ba'an i neu ki: Hi mipane ma mifnek neu Ume UISNENO. Him lomi hem kiso neune ma hem nao neune, mes UISNENO of nalahi In Ume. Ma munif na'ko hi in-ini sin le fe munif, le fe sin namaika anbi Yerusalem of sin anmate, anbi makenat in nanan.

²²Oke te of hi mo'e onle au mo'e anbi tabu le i. Hi of kam tobe fa hi humam ai him bukae utunu' kulut ma kaet.

²³Hi of amnao kam pake fa tobe nakaf ai kam pake fa peni haef, kam kulu ma kam kae fa. Hi of amasil natuin hi sanat-sanat sin; hi of amsakoi es neu es.

²⁴Ma au, Nai Yehezkiel of au fani taka' neu ki; hi of amoe onle au mo'e tabu le i. UISNENO nakua a'an nak leka lasi nane anbol, hi of mihin nak In le nane UISNENO Anesit Afinit kun.”

²⁵UISNENO nakua In a'an neu kau nak, “Nah, mansian amates, of Au aiti Au Ume matani le i na'ko sin, le anfani panet ma afnekan ma amlilat neu sin, ma le sin ankiso ma anao neune nok nekaf amlilat. Oke te of Au aiti sin anah-anah sin amsa.

²⁶Anbi neno Au unaoba lasi nane, atoni mese le nafetnon na'ko amle'ut of in nem, ma of in natiaba lasi nane neu ki.

²⁷Anbi neno nane amsa of nabe'i ho mumolok amfani ma ho ka mono amteni fa. Oke te of ho mumolok mok atoni nane. Onle nane of hom fani taka' neu sin; ma of sin nahin nak Au le i UISNENO Kau.”