Read Uab Meto YEHEZKIEL 25 Bible Online

YEHEZKIEL 25 - Uab Meto bible

YEHEZKIEL 25

¹UISNENO nakua In a'an neu kau nak,

²“Hoi mansian amates, amsukat pah Amon.

³Amlelu uf nane he nen sa' le Au, UISNENO Anesit Afinit uton neu sin ak, ‘Hi malin amkiso neu nalahi Au Ume ma nale'un pah Israel ma naiti neki to Yahudi neu bale mapolin.

⁴Es nane te of Au ufetin ki he nati' uf-uf na'ko mnela snaen Neno Saen nis ma anbe'u ki. Sin of nahakeb sin um-ume anbi hi pah oke te sin natua nabalah anbi nane. Sin of anbukae hi pah in hau fua sin ma sin ninu hi mu'it sin susu.

⁵Kot Raba of Au ubaina anfani bale tuku mu'it bikase paha snaen, ma pah Amon ok-oke anfani bale tuku mu'it bibi kase. Ma of hi mihin nak Au le i UISNENO Kau.’ ”

⁶UISNENO Anesit Afinit nakua In a'an nak, “Hi mipasa hi nimam ma mibso' nok amlilat. Hi minebet pah Israel.

⁷Es nane te of Au una'at ki neu uf namfau he nasik ma nabak hi mu'im. Of Au ule'un ki matanin onane, talan te hi kam fani amteni fa uf mese ma hi ka mu'i fa pah a'mes. Ma of hi mihin nak Au le i UISNENO Kau.”

⁸UISNENO Anesit Afinit nakua In a'an nak, “Moab namolok nak Yehuda nane in onle uf-uf bian amsa.

⁹Es nane te kot-kot le nahelan nakat pah Moab of Au ufetin he nati' musu nape' sin nok kot-kot le leok le'uf sin amsa, esle': Bet-Yesimot, Baal-Meon ma Kiryataim.

¹⁰Of Au ufetin uf-uf pah na'ko mnela snaen nis ma anbe'u Moab ma pah Amon, talan te Moab kan fani ateni fa uf mese.

¹¹Of Au fe kasat neu Moab, ma of sin nahin nak Au le UISNENO Kau.”

¹²UISNENO Alatan amnanut nakua In a'an nak, “Uf Edom in mo'e nalali sanat anaek natuin anmo'e maufinu neu Yehuda, on taos mo'et seunbanit.

¹³Es nane te Au etu ma uton ak of Au fe kasat neu Edom ma Au umate ale mansian ma ale mu'it anbi nane. Pah nane ok-oke, na'ko Teman ante kot Dedan, Au mo'e sin tena maten; in to sin of anmate anbi makenat in nanan.

¹⁴Au to Israel of Au pake he Au seunbanin Au to'as neu Edom, ma of Au mo'e Edom anmatom nok Au to'as in matanin. Edom of in naben neu onme leka in antoman Au to'as. Au UISNENO Anesit Afinit ukua ulali Au a'ak.”

¹⁵UISNENO Anesit Afinit nakua In a'an nak, “Atoni-atoni Filistin anseunbanin sin nek to'as nok maufinu neu musu le anli'u sin piut ma nale'un sin nok to'as.

¹⁶Es nane Au etu ma uton ak of Au upe' atoni-atoni Filistin ma ule'un sin. Ale atoni le fe namaika anbi pah Filistin ninen of Au umate sin.

¹⁷Of Au fe neu sin kasat ma'fen le'uf ma Au polin Au to'as neu sin talan te Au nekak anmalin. Leka sin naben Au to'as, of sin nahin nak Au le i UISNENO Kau.”