Read Uab Meto YEHEZKIEL 26 Bible Online

YEHEZKIEL 26 - Uab Meto bible

YEHEZKIEL 26

¹Anbi funan mese antam neno mese anbi ton bo'es am mese anbi neno hai mapolin kai, UISNENO nakua In a'an neu kau, nak,

²“Hoi mansian amates, tuafen Tirus sin na'ba'en nak, ‘Yerusalem naskuku nalalien! In be'in in matan in anbi lasi sosa namneku nalalien! In of kan fani fa musu anteni neu kit!’ ”

³UISNENO Anesit Afinit nakua a'an nak, “Au le i Au musu es ki, hoi Tirus! Of Au eki to namfau he upe' ko, ma sin of nem on tasi in okin.

⁴Sin of naskuku hi baki lape sin ma natseleb hi el-fatu sin. Ale nani le anbi nane of Au pik ma nako sin talan te al fatu monas mese es nabalah anbi tasi in atnanan.

⁵Ale atifkai ika of anhoi sin tifkai anbi fatu nane in fafon. Au UISNENO Anesit Afinit ukua ulali Au a'ak. Tirus of anfani musu neu ale uf-uf.

⁶Sin of nasik ma namate tuafen anbi kot-kot anbi pah Tirus. Ma of sin nahin nak Au le i UISNENO Kau.”

⁷UISNENO Anesit Afinit nakua In a'an nak, “Of Au eki Kesel Nai Nebukadnezar na'ko Babel he nati' nape' ko, hoi Tirus. Kesel abe'it anesit nane in of nem na'ko bian a'li neki solalus le amfau le'uf, bikase le amfaun ma ale aklet makenat ma solalus le ansae bikase.

⁸Ale tuafen kot ok-oke anbi pah mnela of namate sin anbi makenat nane. Musu of anhani lolok he nahelnok, ma anae baki lape ben aninit ma naloitan ben besi tika anaet le sin anpake hen laban ko.

⁹Sin natseleb ho baki lape sin neki bale-bale le he natseleb ma sin nabelat hi el-fatu sin neki besi-besi naek.

¹⁰Sin bikase amfaune matani, talan te nok nane te antao ma anmo'e afu naplel le anfun natef nan ko. Hanaf slutuf solalus asae bikase le anhel aklet le neki bukae ma aklet makenat of baki lape sin anlilitai leka sin anao anfini nok eno-eno naek ma antam neu kot le anfani fatu tutnae nane.

¹¹Solalus asae bikase nane of sin nape' anbi lanan-lanan ma namate ho tuafen neki sin suni. Of nabelat ho fatu lape amnanut ma abe'it sin.

¹²Musu-musu nane of nasik ale ho mu'im ma ale ho bale sosa sin. Sin of natseleb ho baki lape sin ma natseleb ho ume-ume amasat ma maupa sin. Sin of naiti sin fatu-fatu sin, in papan sin ma in nani, oke te anpolin natam neu tasi in nanan.

¹³Of Au usnasab ale ho sit sin ma ho heo ma biola sin hanan.

¹⁴Le Au umaika al fatu monas mese, bale neu atoni atifkai sin anhoi sin tifkai. Of ka nafena anteni fa kot nane. Au, UISNENO Anesit Afinit ukua ulali Au a'ak.”

¹⁵UISNENO Anesit Afinit nakua In a'an neu kot Tirus nak, “Tuafen pah tasi ninen of sin anlilitai ma namtau leka sin nen hi han koa neu nis ma anbe'u ki ma anbait na'ko atoni-atoni le fe anlolo sin.

¹⁶Leka ankiso nit ho monim, ale kesel na'ko uf-uf anbi tasi ninen of sin anfen na'ko sin a'toko, ankasu sin sobalu betkone anaet, oke te antoko ma anlilitai anbi nani. Of sin namtau nae le'uf talan te katit fa es hen tainine.

¹⁷Nalali te of sin ansi nit neu hen sub ko nak on i: Kot maliatas nane namle'u nalalien! Ale in bnao sin anpik ma nako neki sin na'ko tasi. Sin tuafen afi ahun-hunut sin anmu'in kuasat anbi tasi antao ma anmo'e atoni-atoni le natua anbi tasi ninen sin namtau.

¹⁸Tabu i, anbi neno nis ma anbe'u ko, tuafen pah-pah sin anlilitai. Sin naskek ok-oke leka sin nit nak sin naskuku ko nane nae le'uf kun.”

¹⁹UISNENO Anesit Afinit nakua In a'an nak, “Au mo'e ko talan te ale sa'-sa' namne onle kot le kan mu'i fa tuaf. Of Au tobe ko eki oe na'ko tasi in tu'in.

²⁰Oke te Au sonu ko neu pah bale atoni amates he nati' ho mubua mok atoni-atoni na'ko batan ahunut. Au ufetin ko he ho mubalah anbi bale pah pinan atoni amates nane, anbi fatu tutnae atnanan nabalah, mubua mok atoni amates sin. Ma ho pah of ka natua anteni fa, ma ho of kan so'i ko fa anbi atoni amonit sin.

²¹Au mo'e ko amfani taka le neki amtaus, ma nane ho monim in amsopun esle' nane. Atoni-atoni of sin nami ko, mes of ka natef nok ko fa. Au, UISNENO Anesit Afinit ukua ulali Au a'ak.”