Read Uab Meto YEHEZKIEL 28 Bible Online

YEHEZKIEL 28 - Uab Meto bible

YEHEZKIEL 28

¹UISNENO nakua In a'an neu kau nak,

²“Hoi mansian amates, muton neu Kesel Tirus, sa' le Au, UISNENO Anesit Afinit utiaba neune, ‘Nok neka moko ho mubaina ho monim anfani uisneno teta le antunon anbi tasi in atnanan. Nabe'i ho mo'esom on uisneno teta, mes mumnau, ho al mansian ko amsa.

³Ho mutenab mak ho muhin amnesin Nai Daniel, talan te kan mu'i fa lasi tolo' le natol'on neu ko.

⁴Hom pake ho hinem ma ho tenab alekot neu hem nibun a'maus, mnatu ma noni muti.

⁵Namneo, ho musosa te ho muhin ma tabu le i ho mu'im matani le'uf, ma ho mu'im nane anmo'e ko talan te ho mumoko'om!’ ”

⁶UISNENO Anesit Afinit nakua In a'an nak, “Hoi Tirus, natuin ho mubaina ho aom on Uisneno, of Au sonu solalus anao amnemat he abulalut le nati' nape' ko. Sin of nale'un naskuku ale ho alekom le ho mupeni mulali sin natuin ho nek mahine ma ho tenab alekot.

⁸Of namate ko ma ansub ko anbi tasi nanan.

⁹Nah, leka tabu nane anbol, fe nabe'i ka ho mumolok mak ho Uisneno ko? Anbi ho atoni amate atoni sin, namneo-namneo nak ho al mansian ko amsa.

¹⁰Of ho mate on atoni a'baut natuin atoni anaot amnemat es namate ko le ka nahin fa Uisneno. Au, UISNENO Anesit Afinit ukua ulali Au a'ak.”

¹¹UISNENO nakua In a'an anteni neu kau, nak,

¹²“Hoi mansian amates, amkae ma amkulu nai neu Kesel Tirus. Mutiaba sa' le Au, UISNENO Anesit Afinit Au uton neune, ‘Afi hom fani taka' neu lasi alekot; afi ahunut namneo ho mahine ko ma amasat ko!

¹³Ho bale maika nane anbi Eden, etu Uisneno. Ho bale pake nane mapake noas neki ale fatu klima: fatu klima molo amtasa ma noni muti nesaf, fatu klima molo, fatu klima mate me', fatu klima me' amtasa, fatu klima mate molo, fatu klima mate nus, ma fatu klima mas muti molo, ma fatu klima me' mnasi. Ho bale pake noas mnatu amsa namfau. Ale bale sin le nane anmo'e sin neu ko anbi neno nahonis ko.

¹⁴Ahake neno le neki amtaus Au uhakeb anbi nane he nati' anpanat ko. Ho mumaika ambi Au tubu le aknino ma ho amnao mutuin fatu klima sin sonan sin tananan le anpin.

¹⁵Ho taos ho mo'et nane naleko kun na'ko anmo'e ma anpakae ko talan te leka ho mo'e amle'ut.

¹⁶Ho musosa ma musau, ma lasi nane es neki ko neu amle'ut ma sanat. Es nane te Au li'u ko na'ko Au tubu knino, ma ahake neno ho apanat nane anli'u ko na'ko fatu klima apinat nane sin sonan sin tananan.

¹⁷Ho humam amasat nane anmo'e ko talan te ho mumoko'om ma ho kan mateka nane antao ma anmo'e ko talan te ho mo'e lasi mono. Es nane te Au eson ko neu nani ma Au mo'e anfani lasi mnauba neu kesel bian sin.’ ”

¹⁸UISNENO nakua In a'an nak, “Hoi Tirus, ho mulahi ho bale-bale luli besa sin natuin ho sanat sin ma ho nek amle'ut leka ho musosa ma musau. Es nane te Au otu ko talan te ho mumnes mok nani. Ale atoni le ankiso ko al sin nit neu afu.

¹⁹Ho mumneku amfini mulali talan te nabal-bal. Ale uf le nahin ko sin anlilitai natuin sin namtau of sin naeku monit papmese onle nane.”

²⁰UISNENO nakua In a'an neu kau nak,

²¹“Hoi mansian amates, amfe sukat neu kot Sidon.

²²Mutiaba neu in tuafen mak Au UISNENO Anesit Afinit Au umolok neu sin a'ak, ‘Au le i hi musu, hoi Sidon. Atoni sin of naliatas Kau natuin Au taos Au mo'et neu ko. Anbi tabu Au fe kasat neu ho to sin, sin of nahin nak Au UISNENO le aknino Kau.

²³Of Au fe nem neu ko menas anaek, ma of ufetin na' ansai anbi ho lanan-lanan sin. Of ho musu sin nape' ko na'ko ale bale, ma of sin namate ho to sin. Ma of ho muhin nak Au le i UISNENO Kau.’ ”

²⁴UISNENO nakua In a'an nak, “Pah-pah le anhaumak ko le afi nasi'u Israel, of ka onfa kasunat ma katila anteni la namenab Israel. Sin of nahin nak Au UISNENO Anesit Afinit Kau.’ ”

²⁵UISNENO Anesit Afinit nakua In a'an nak, “Of Au ubuab atoni-atoni Israel na'ko pah-pah a'lo anbi sin bale le Au usana sin, ma ale uf of sin nahin nak Au knino Kau. To Israel of sin natua anteni anbi sin pah kun, pah le Au fe ulali neu Au ate Nai Yakub.

²⁶Sin of anmoni nok tainine anbi nane ma nafena sin ume-ume sin ma sin anmo'e sin lene tua min kase. Of Au fe kasat neu pah-pah le anhaumak sin le nasi'u nalali sin, talan te Israel anfani tainine. Ma of sin nahin nak Au sin UISNENO es Kau.”