Read Uab Meto YEHEZKIEL 29 Bible Online

YEHEZKIEL 29 - Uab Meto bible

YEHEZKIEL 29

¹Anbi fun bo' antam neno bo'es am nua, anbi ton bo' mese anbi tabu hai mapolin kai, UISNENO nakua In a'an neu kau nak,

²“Hoi mansian amates, amlaban Kesel Mesir nai. Muton neune mak in ma ale to Mesir ok-oke of ankas sin.”

³UISNENO Anesit Afinit anlelu kau he utiaba neu Kesel Mesir han ba'an i, “Au le i hi musu, hoi nai besi mnasi anae le'uf le antup anbi noe in nanan. Ho muuab mumo'e mak Noe Nil nane ho ini kun ma ho mak ho es amtao ma anmo'e noe nane.

⁴Of Au tao ka'i neu ho su'im ma Au uki'ab ika sin neu ho knufam. Oke te Au hel upoitan ko na'ko Noe Nil in nanan nok ale ika le sin na'ki neu ho knufam nane.

⁵Nalali te ho ma ale ika nane sin Au polin ki neu mnela snaen. Ho aom of nabelkon anbi nani ma anpoilnon anbi nane. Katit fa atoni mese amsa le hen sub ko. Ho aom of Au fe neu kolo-kolo sin ma mu'it-mu'it bian he neku nani.

⁶Ma to Mesir of sin nahin nak Au le i UISNENO Kau.” UISNENO nakua In a'an nak, “Hoi to Mesir! Atoni Israel sin napane ma nafnek ho tuntakus, mes namneo ho al onko nitu maten a'olet.

⁷Leka sin sonlaitok neu ko, ho mut'ipu ma ho mupau sin asninin, talan te sin a'sa'un na'ilo'on.

⁸Es nane te Au, UISNENO Anesit Afinit, Au uton neu ki ak of Au sonu solalus le of nape' ko neki suni, ma sin namate ho to ma ho mu'it sin.

⁹Mesir of anfani pah le amnino maten. Ma of hi mihin mak Au le i UISNENO Kau.” UISNENO nakua In a'an nak, “Hoi Kesel Mesir! Natuin ho mumolok mak Noe Nil nane ho ini ma ho mak ho es amtao ma anmo'e noe nane,

¹⁰es nane te Au fani ho musu, ma musu neu ho Noe Nil. Mesir ok-oke of Au mo'e anfani pah le mnino maten naubon na'ko kot Migdol anbi bian a'li talan te kot Aswan anbi bian a'ne'u talantia nahat Sudan.

¹¹Katit fa atoni ai mu'it le of anao nok nane. Anbi ton bo' ha in a'lon katit fa atoni le of natua anbi nane.

¹²Of Au mo'e Mesir mnino maten talan te anbi ale pah-pah mnino maten bian, Mesir in es amnino anesi. Anbi ton bo'ha in nanan kot-kot anbi Mesir in of anfani fatu tutnae le namle'u nesin fatu tutnae anbi kot me amsa. To Mesir of Au mo'e sin anfani atnanis-atnanis. Sin of nasan'ok neu ale pah ok-oke ma sin natua anbi uf-uf bian.”

¹³UISNENO Anesit Afinit nakua In a'an nak, “Hoi to Mesir, leka ton bo'ha nane namsopu, of Au eki ufani ki na'ko pah-pah bale le hi misan'om milali.

¹⁴Of Au uleko ki ma Au lelu ki mitua ambi Mesir, anbi neno kabenan a'ne'u, pah le afi hi mi'kone. Anbi nane of hi mihakeb plenat aolet mese,

¹⁵le in ole nesi anbi pah pinan ok-oke. Of Au mo'e ki him ole amnesi talan te hi ka nabe'i fa he miplenat uf-uf bian ai ka minaeba fa hi aomen neu sin.

¹⁶Israel in of kan toti anteni fa tuntakus na'ko ko. Ho monim hoi uf Mesir of namnauba Israel neu in nasanab nalali sonlaoiton neu Mesir, onle afi in anmo'e. Ma Israel of in nahin nak Au le i UISNENO Kau Anesit Afinit.”

¹⁷Anbi fun mese antam neno mese anbi ton bo'nua am hitu neno hai mapolin kai, UISNENO nakua In a'an neu kau nak,

¹⁸“Hoi mansian amates, Kesel Nai Nebukadnezar na'ko Babel in nanaoba lasi makenat neu Tirus. In anlelu solalus-solalus sin anloi mafena le ma'fen le'uf, talan te sin nak-boko ok-oke ma sin hanun napapa', mes leko he kesel ai in solalus sin ka napeni fa sa'-sa' na'ko sin haet le nane.

¹⁹Es nane te, Au UISNENO Anasit Afinit ukua Au a'ak ak: Of Au fe pah Mesir neu Kesel Nai Nebukadnezar. In of nabak ma nasik ma of in naiti neki Mesir in a'mu'in anfani on upa neu in solalus sin.

²⁰Pah Mesir Au fe neune on seunbanit neu in haet, natuin in solalus sin anmepu nalali neu Kau. Au, UISNENO Anesit Afinit ukua ulali Au a'ak.

²¹Leka lasi nane anbol, of Au mo'e Israel anfani to abe'it, ma anmo'e ko Yehezkiel, ho mumolok nok alekot talan te ale atoni nabe'i sin nen ko. Ma of sin nahin nak Au le i UISNENO Kau.”