Read Uab Meto YEHEZKIEL 3 Bible Online

YEHEZKIEL 3 - Uab Meto bible

YEHEZKIEL 3

¹Uisneno nakua In a'an nak, “Hoi mansian amates, ho muah sulat manunu i nai, oke te amnao ma mumolok nai neu atoni-atoni Israel sin.”

²Oke te au fai au fefak ma Uisneno anfe neu kau sulat manunu nane he nati' au uahan.

³In nakua In a'an nak, “Hoi mansian amates, ho muahne nai! Mutua ho taim nai nok sulat manunu nane.” Oke te au uah sulat nane ma in minan onle oni hau.

⁴Uisneno nakua anteni In a'an nak, “Hoi mansian amates, amnao nai meu atoni-atoni Israel ma mutiaba ale Au han ba'an neu sin.

⁵Au es a lelu ko neu sin, ma ka neu fa uf le sin uab nane mafena, teta ma le ho ka mahine fa. Kalu onle Au lelu ko neu uf onle nane, of sin nen ho uab molok sin.

⁷Mes to Israel sin of kan nen ko fa, nesi na'ko Au amsa sin kan sian Kau fa. Sin al-al sin nakan fatu ma anlomi hen laban.

⁸Tabu le i amsa of Au mo'e ko ho nak fatu ko ma matani ko onle sin amsa.

⁹Of Au mo'e ko ho muhel ma mumep onle fatu putun ma ho matani ko onle noni muti. Kais mumtausan ale alaban nane sin.”

¹⁰Oke te Uisneno nakua In a'an anteni nak, “Hoi mansian amates, amkiso mulek-leko ma mumnau ale sa' le of Au uton neu ko.

¹¹Amnao nai meu ho nonot le anbi bale polin nane, ma mutiaba sa' le Au, UISNENO Alatan Amnanut utonan sin, oni sin he nen ai he kahaf.”

¹²Oke te Smanan Knino Uisneno nafena kau, ma anbi au kotik au nen hanaf le na'lu nak neu ka nak, “Ampules nai apinat UISNENO anbi neno tunan!”

¹³Au nen smanaf-smanaf amonit nane sin ninken naekun, ma aklet haefen sin a'lun onle pah pinan anainun.

¹⁴UISNENO In antao In kuasat neu kau nok matani, ma leka nafena kau ma In Smanan Knino neki kau, au nekak naben menu' ma maputu.

¹⁵Ma au aum atia kuan fe'u na'ko atoni-atoni mapolin nane anbi Tel-Abib anbi Noe Kebar in ninen. Au umaika a'bi bale nane neno hitu in a'lon; au umkak natuin ale lasi le fe au nen ma au it nane.

¹⁶Leka neno hitu anfini, UISNENO nakua In a'an neu kau nak,

¹⁷“Hoi mansian amates, Au aiti ko amfani apaot ma apanat neu nonot Israel. Mutiaba neu sin lasi mnauba le Au fe sin le i.

¹⁸Leka Au uton ak anmu'i atoni amaufinut mese of anmate, mes ho ka mumnauba fa in he nati' in nate'un in monin talan te in napeni honis, namneo in mes anmate on atoni asanat mese, mes lasi sutais neu in lasi maten nane mes Au toti na'ko ko.

¹⁹Leka ho mumnaoba atoni nane mes in kan lomi he nasnas na'ko taos mo'et amle'ut, in of anmate on atoni asanat, mes ho of mupeni honis.”

²⁰Leka atoni alekot mese in anmo'e sanat, ma Au uhakeb in anbi lasi maten, onane te in of anmate leka ho ka mumnaoba fa in. In of anmate natuin in sanat-sanat sin, ma in taos mo'et alekot sin of Au ka umnau fa sin. Mes lasi sutais neu in lasi maten nane mes Au toti na'ko ko.

²¹Leka atoni alekot nane ho mumnauba in he nati' kais in anmo'e sanat, ma in natuin ho lasi fainekat, of Au ka kas fa in ma of ho mupeni honis.

²²Au naben UISNENO In anhake nok kau nok matani ma au nen In nakua a'an neu kau nak, “Amfen nai ma amnao nai meu nonof. Anbi nane of Au ukua Au a'ak neu ko.”

²³Es nane te au nao neu nonof, ma anbi nane au it meusine naek mese le naton nak UISNENO In anbi nane onle au it ulali anbi Noe Kebar in ninen. Oke te au mofu ubentok neu afu,

²⁴mes Smanan Knino Uisneno antam neu kau ma nahakeb kau. UISNENO nakua In a'an neu kau nak, “Amfani nai ma am ek manom ambi ume nanan.

²⁵Hoi mansian amates, of anfutu ko neki tani talan te ka nabe'i fa he hom poi ma ka nabe'i fa he mueku mok atoni.

²⁶Au of amo'e ho mam anmatani he nati' ho kais mumnauba to amaufinut i.

²⁷Leka, kalu Au umolok ateni ok ko ma Au fe ufani ko ho be'im ho matanim he nati' ho mumolok, ho mes he mutiaba sa' le Au, UISNENO Alatan Amnanut Au uton neu sin. Bian na'ko sin of sin nen, mes bian anteni of kahaf, natuin namneo sin uf alaban.”