Read Uab Meto YEHEZKIEL 30 Bible Online

YEHEZKIEL 30 - Uab Meto bible

YEHEZKIEL 30

¹UISNENO nakua In a'an anteni, nak,

²“Hoi mansian amates, etu ma muton nai ma mutiaba nai neu to Mesir sa' le Au UISNENO Anesit Afinit umolok neu sin. Amkoa nai ma amkae ma amkulu nai on i: Koi! Neno UISNENO anhaumaken! In of nanaoba lasi nok manoe. Neno nane namesok ma nanope, neno uf-uf sin ansimo kasat.

⁴Amle'ut anaek of ansanu nem neu Sudan. Anbi Mesir of anmu'i lasi makenat. Amates of namfau le natsel; of sin nabak pah ok-oke ma anmo'e anfani fatu tutnae.

⁵Anbi makenat nane solalus le ansebe sin na'ko Sudan, Lidia, Libia, Arab, Kub ma na'ko Au to amsa of sin anmate.”

⁶UISNENO Anesit Afinit nakua In a'an nak, “Na'ko Migdol anbi bian a'li talan te Aswan anbi bian a'ne'u, ale Mesir in nek bua sin of sin anmate anbi makenat in nanan. Ma solalus Mesir le sin namoko'on nane of sin namle'u ansiksakenok. Au UISNENO Anesit Afinit Kau ukua ulali Au a'ak.

⁷Pah nane of anfani pah mnino maten anbi pahpah mnino maten bian, ma sin kot-kot sin of anfani fatu tutnae ok-oke.

⁸Leka Au otu Mesir ma Au umate ale sin le in nek bua nok sin, of sin nahin nak Au le i UISNENO Kau.

⁹Leka neno nane anbol, ma Mesir in namle'u naskuku nalali, of Au sonu haef sin nok bnao he naskekeb atoni-atoni Sudan le ka tatenab fa neu sin nane, ma sin of namtau. Namneo, neno nane of in nem!”

¹⁰UISNENO Anesit Afinit nakua In a'an nak, “Of Au pake Kesel Nai Nebukadnezar na'ko Babel he nati' nale'un Mesir in mu'in ok-oke.

¹¹Nebukadnezar nok in solalus sin le sin ka nahin fa lasi nek makenat of sin nem ma nale'un pah nane. Sin of nape' Mesir neki suni, ma atoni aon nitu of nasan'ok anbi pah nane.

¹²Of Au umeto Noe Nil ma Au una'at Mesir ok-oke neu atoni-atoni amle'ut. Atoni-atoni anao amnemat of Au lelu sin he nale'un pah nane ok-oke. Au, UISNENO Kau, ukua ulali Au a'ak.”

¹³UISNENO Anesit Afinit nakua In a'an nak, “Of Au ule'un uskuku fatu le'u ma hau le'u ma ale uisneno teta anbi Memfis. Of kan mu'i anteni fa kesel anbi Mesir. Of Au mo'e in to sin namtau.

¹⁴Mesir bian a'ne'u ok-oke uf Au mo'e anfani mnino maten ma kot Soan anbi bian a'li of Au otu ani. Tebe kot ainaf nane of Au kas in,

¹⁵ma in mu'in of Au ule'un ani. Of Au ufetin Au to'as neu Pelusium, kot le anfani baki lape neu Mesir,

¹⁶ma kot nane of nasusbon anae le'uf. Namneo, of Au otu Mesir. Baki-baki lape Tebe of natsel ma kot nane of antoman noe sako.

¹⁷Munif-munif kot Heliopolis ma Bubastis of sin anmate anbi makenat in nanan, ma ale bife of anheke sin.

¹⁸Anbi neno Au usopu Mesir in apinat ma Au aiti in kuasat le in nanaebon natuin kuasat nane, mesokan of anfun natef nan Tahpanhes ma of anheke nan in bife sin.

¹⁹Onle nane of Au kas Mesir, ma of sin nahin nak Au le i UISNENO Kau.”

²⁰Anbi fun mese antam neno hitu anbi tabu hai mapolin kai nan ton bo'es am mese, UISNENO nakua In a'an neu kau nak,

²¹“Hoi mansian amates, Au uipu ulali Kesel Mesir in niman, ma katit fa es he nati' an amu in niman nane ai hen tusi he nati' naleko ma nabe'i anfani he nati' in ana' anteni suni.

²²Au UISNENO Anesit Afinit ukua Au a'ak ak: Au le i musu Kesel Mesir, ma in niman nua sin of Au uipu ani sin, leko le fe nabe'i ai le natipu nalali. Ma suni nane of anmofu na'ko in niman.

²³Au of usitib ma usana atoni Mesir neu pah pinan ok-oke.

²⁴Oke te of Au uhelan kesel Babel in niman, ma Au tao Au suni anbi in niman nanan. Mes Kesel Mesir in niman of Au ipu ani talan te of in anbai ma anmate anbi kesel Babel in human, in musu nane.

²⁵Namneo, Kesel Mesir of Au uoleb in, mes kesel Babel mes Au uhelan in. Leka Au fe neune Au suni, ma in nalulu neu Mesir, sin of nahin nak Au le i UISNENO Kau.

²⁶Of Au usana atoni-atoni Mesir neu pah pinan ok-oke. Ma of sin nahin nak Au le i UISNENO Kau.”