Read Uab Meto YEHEZKIEL 31 Bible Online

YEHEZKIEL 31 - Uab Meto bible

YEHEZKIEL 31

¹Anbi fun tenu antam neno mese anbi tabu hai mapolin kai ton bo'es am mese, UISNENO nakua In a'an neu kau nak,

²“Hoi mansian amates, mutiaba Au han ba'an i neu Kesel Mesir ma neu in to ok-oke mak: Namneo ho apinat nane matani kun! Katit fa esle' he namnes nokan!

³Ho onko hau aijob Libanon le leok le'uf ma nahenu nok atlaen maslubu ma namas. In un nane namneo ma in tunan namnanu antia nope.

⁴In anmoni natuin in oe nanokbon. Noe anbi nani apinan anfe neune mnahat, anpofi ale in a'ban sin, ma napete hau-hau bian sin.

⁵Natuin in oe kan sanu nit fa, in monin naleko, in atlaen anaek ma amnanu. Anbi ale hau anbi ale nasi, in es namnanu anesi.

⁶Kolo huma-huma nakun anbi in atlaen. Mu'it afuit nahoni anbi in mafon. Ale pah anaek anbi pah pinan ok-oke sin antoko namaoftok anbi in mafon.

⁷Hau namas neu he hit atkiso; in un namneo, in atlaen amnanu. In a'baan antam antia oe mata anbi nani.

⁸Ale hau aijob anbi Eden, etu Uisneno ka ta nesa fa nok in. Kan mu'i fa aijob le he namnes nokan, kan mu'i fa hau le in atlaen amnanun onle nane. Namneo, anbi etu Uisneno kan mu'i fa hau amasat onle in.

⁹Au es amoe in ma namas nok in atlaen sin le namnanu ma in non namfau. Ale hau anbi etu Uisneno sin naktino in.

¹⁰Es nane te, Au, UISNENO Alatan Amnanut, Au uton neu ko sa' le of anbol neu hau le in tunan nane antia nope sin. Natuin leka in namnau anao piut, fun in namoko'on piut amsa.

¹¹Es nane te Au tite in ma of Au una'at in neu ana' aplenat anao amnemat, le of anmo'e in anmatom nok in taos in mo'et amle'ut nane.

¹²Solalus anao amnemat le ka nahin fa nek manekat nane of nabelat in oke te anpolin in anbi nane. In atlaen sin le natipu nalali of anma'lon anbi ale tubu ma nonof anbi pah nane. Ale uf le sin natua anbi in nupun of anao nasaitan in.

¹³Kolo-kolo of sin nem ma sin antoko anbi hau le natsel nalali nane, ma mu'it-mu'it le anfui of anteli in atlaen sin.

¹⁴Ale nane anbol he nati' naubon na'ko neno i, kan mu'i teni fa hau le anmoni ma in amnanun onane; katit ateni fa hau tunaf le antia nope maski napeni oe nathoe. Sin mes anmate ok-oke on mansian amates, ma sin nabua nok atoni-atoni le ansanu nalali anbi pah bale atoni amates.”

¹⁵Onle i UISNENO Alatan Amnanut nakua In a'an nak, “Leka hau nane in ansanu neu pah pinan bale atoni amates, Au lelu oe anbi nani in apinan he naek in anfani taka' kulut ma kaet. Of Au ek noe in asain ma au sun noe ana sin asain. Natuin hau nane anmate nalali, of Au usanut mesokan neu tubu-tubu Libanon ma anmo'e ale hau anbi nasi nanan anmaknene.

¹⁶Anbi tabu Au usanut hau nane neu pah pinan bale atoni amates, in hanan le anmofu nane of anmo'e ale uf-uf sin anlilitai. Ale hau anbi Eden ma ale hau mabeti anbi Libanon le napeni oe nathoe, ma le ansanu nalali neu pah pinan in apinan kuni peni of sin namlil natuin hau nane in natsel.

¹⁷Sin of natuin in neu pah pinan bale atoni amates ma sin nabua nok le natsel nalali anbi tabu ahunut. Ma sin al-al sin le afi sin antoko anbi hau nane in hafon of nasana sin neu uf-uf.

¹⁸Hau nane anfani taka' neu Kesel Mesir ma in to sin. Katit fa hau anbi Eden le amnanun onle nane ma nahenu nok apinat. Mes tabu le i, fun on ale hau anbi Eden amsa, hau nane amsa of ansanu ma nabua nok sin le ka nahin fa Uisneno ma nabua nok sin le anmate anbi makenat in nanan. Au, UISNENO Anesit Afinit ukua ulali Au a'ak.”