Read Uab Meto YEHEZKIEL 32 Bible Online

YEHEZKIEL 32 - Uab Meto bible

YEHEZKIEL 32

¹Anbi fun bo'es am nua antam neno mese anbi neno hai mapolin kai ton bo'es am nua, UISNENO nakua In a'an neu kau nak,

²“Hoi mansian amates, amfe lasi mnaut mafena neu Kesel Mesir. Mutiaba Au han ba'an i neune mak, ‘Ho mo'esom on meu asu tipu anbi uf-uf sin, mes ho onko nai besi mnasi le naoinson anbi tasi in nanan. Ho haem nalule ma nalahi ale noe.

³Anbi tabu uf-uf sin nauba, of Au heke ko eki Au tifkai, ma Au ufetin ko neu uf-uf nane he nati' anhel ko neu meto.

⁴Of Au polin ko neu nani ma ale kolo ma mu'it na'ko ale pah pinan ok-oke of Au lelu sin he neku nani ko.

⁵Oke te ale tubu ma ale nonof of Au uhenu sin eki ho aom nitu nane.

⁶Ho na' of Au uopan ani talan te napete tubu-tubu ma nahenu ale noe.

⁷Anbi neno Au umate ko, of Au amu ani obet neno atnanan ma afkun-afkun of Au mo'e sin ma kan pinan fa. Manas of Au utolo' anbi nope in kotin ma funan of kan pin fa.

⁸Namneo, meusine neno atnanan of Au umate ani sin, ma of Au mo'e pah pinan mesokan maten. Au, UISNENO Anesit Afinit ukua ulali Au a'ak.

⁹Anbi tabu Au uton neu Au ule'un uskuku ulali ko neu pah-pah le sin ka mateka fa, uf namfau of sin namtau.

¹⁰Namneo, of Au oten Au suni ma Ai is ma be'u ko. Ale kesel ma uf-uf of sin nit neu Au tao ma mo'e ko. Anbi tabu nane sin of nata'i natuin sin namtau ma sin of anlilitai natuin sin namtau hen mate.’ ”

¹¹UISNENO Anesit Afinit nakua In a'an neu Kesel Mesir nak, “Kesel Babel in suni of naluli neu ko.

¹²Ale solalus amaufinut na'ko uf-uf of Au lelu sin anfaki sin suni ma of sin namate hi to ok-oke. Ho to ma ale sa' le ho muliabom neu sin of naskuku ma noe nani ok-oke.

¹³Of Au lolo ho mu'it sin anbi noe ninen bale sin ninu anbine. Leko atoni ma mu'it of kan heukele fa oe noe nane anteni.

¹⁴Ma ale noe anbi ho pah of Au uknino ani ma Au mo'e sin ansai nok tainine. Au, UISNENO Anesit Afinit ukua ulali Au a'ak.

¹⁵Leka Au mo'e Mesir anfani mnela snaen le mnino maten, ma Au ule'un ale atuas anbi nane ok-oke, sin of nahin nak Au le i UISNENO Kau.

¹⁶Lasi mnauba le mafena ma maputu nane of anfani sit kulut kaet. Ale bife na'ko uf-uf bian of sin ansi sit nane on taka' kulut kaet neu Mesir ma neu in to ok-oke. Au, UISNENO Anesit Afinit ukua ulali Au a'ak.”

¹⁷Anbi fun mese antam neno bo'es am nim neno hai mapolin kai, UISNENO nakua In a'an anteni neu kau nak,

¹⁸“Hoi mansian amates, amkae ma amkulu nai neu to abit Mesir. Amsonu sin neu pah pinan bale atoni amates nok ale pah-pah abe'it bian.

¹⁹Muton neu sin mak, ‘Hi miteb mak hi es amasat anesit ka? Hi of amsanu neu pah pinan bale atoni amates, ma natupa ki anbi atoni-atoni le sin ka nahin fa Uisneno.’

²⁰To Mesir of sin anmate nabua nok sin le anmate anbi makenat in nanan. Suni mese naloiton nalali he nati' namate sin ok-oke.

²¹Ale meo pa'e le abe'it ma matani ma atoni-atoni amakenat le sin anpesi Mesir nok nek amlilat sin ansimo atoni Mesir le nem neu pah pinan bale atoni amates. Sin anhunun ma ankoa nak on i, ‘Atoni-atoni le ka nahin fa Uisneno nane anmate nalali anbi makenat. Tabu le i sin nem neu i ma sin antup anbi i!’

²²Asyur antup es bale nane, in solalus sin nitu nate anfun natef nan in. Sin ok-oke anmate nalali anbi makenat in nanan. Sin nitu nate nane es amnanut abainesit anbi pah pinan bale atoni amates. Leka sin fe anmoni, sin napoitan lasi amtaus anbi pah pinan.

²⁴Elam in es bale nane in solalus sin nitu nate anfun natef nan in. Kan hapi ma kan heli fa sin, sin al-al sin anmate anbi makenat in nanan, oke te sin ansanu neu pah pinan bale atoni amates. Leka sin fe anmoni, sin napoitan lasi amtaus, mes tabu le i sin anmate nalali ma mes sin ansutai lasi mae nok atoni-atoni le nok sin anbi makenat in nanan.

²⁶Mesekh ma Tubal sin anbi nane amsa, sin solalus sin nitu nate anfun natef nan sin. Kan hapi ma kan heli fa sin, sin al-al sin anmate anbi makenat in nanan. Leka sin fe anmoni, sin napoitan lasi amtaus anbi pah pinan.

²⁷Sin ka napenin fa lasi subat le antola sin on meo pa'e anbi batan ahunut le ansanu neu pah pinan bale atoni amates neki bale manuat namtis. Meo pa'e-meo pa'e nane ansub sin nok suni anbi sin nakan apinan ma ben besi tika anbi sin basan in fafon. Leka sin fe anmoni, meo pa'e-meo pa'e nane namneo sin abe'it ma matani kun talan te sin anmo'e atoni namfau sin namtau.

²⁸Onle nane atoni Mesir of ansub sin ma natupa sin anbi atoni-atoni le ka nahin fa UISNENO ma sin anmate anbi makenat nanan.

²⁹Edom anbi nane amsa nok ale kesel sin ma in ana' aplenat sin. Afi ahunut sin le nane solalus-solalus abe'it, mes muni i sin antup anbi pah pinan bale atoni amates nok atoni-atoni amates bian le sin ka nahin fa Uisneno.

³⁰Ale naimnuke na'ko neno kabenan a'li sin al sin anbi nane, onane amsa atoni-atoni Sidon. Afi ahunut sin kuasat nane napoitan lasi amtaus, mes muni i namaeba sin ma fun kan hapi ma kan heli fa sin al sin ansanu neu pah pinan bale atoni amates nok atoni-atoni le sin anmate anbi makenat in nanan. Anbi nane sin antup ma ansutai amle'ut nok atoni-atoni le ansanu neu pah pinan bale atoni amates.

³¹Leka Kesel Mesir ma in solalus sin ansanu antia pah pinan bale atoni amates ma in nit ale atoni-atoni nane le sin anmate nalali anbi makenat in nanan, sin of naben anmalin. Au UISNENO Anesit Afinit ukua ulali Au a'ak.

³²Au es anmo'e Kesel Mesir napoitan lasi amtaus neu atoni-atoni le fe anmoni, mes in ma in solalus sin of sin anmate ma natupa sin nok ale atoni le ka nahin fa Uisneno ma anmate anbi makenat in nanan. Au UISNENO Anesit Afinit ukua ulali Au a'ak.”