Read Uab Meto YEHEZKIEL 33 Bible Online

YEHEZKIEL 33 - Uab Meto bible

YEHEZKIEL 33

¹UISNENO nakua In a'an anteni neu kau, nak,

²“Hoi mansian amates, muton neu ho to mak leka Au fe nem neu ki lasi makenat neu pah mese, lasi le i of es anbol. To anbi pah nane of anbeti atoni mese na'ko sin hen fani apaot ma apanat.

³Leka apaot ma apanat nane in nit musu nem, in anfu to'is anfani taka' he nati' ale atoni ok-oke sin naloitnok ma nabalbok.

⁴Sekau in nen hanaf taka' nane mes kan sian nani fa, ma musu nem oke te namate in, in anmate natuin in sanat anmes kun. Mes leka in natuin hanaf taka' nane, namneo in of napeni honis.

⁶Mes leka apaot ma apanat nane in nit musu nem mes in ka nahanab fa hanaf taka' nane, lasi sutais neu sin maten nane, of Au toti na'ko in.

⁷Hoi mansian amates, Au aiti ko amfani apaot apanat neu to Israel. Mutiaba neu sin lasi mnaut i:

⁸Leka Au uton ak atoni amle'ut mese of anmate, mes ho ka mumnauba fa in he nati' in nabaina in monin talan te in napeni honis, fun of in anmate on atoni asanat mese. Mes lasi sutais neu in maten nane Au utoti na'ko ko.

⁹Leka ho mumnauba atoni amle'ut nane ma in ka nasnas fa na'ko anmo'e sanat, in of anmate on atoni asanat mese, mes of ho mupeni honis.”

¹⁰UISNENO nakua In a'an neu kau nak, “Hoi mansian amates, mumolok mufani amteni atoni Israel sin uab molok in mak, ‘Hai misusbom piut natuin baut mafena sanat ma hai amle'ut sin. of hai he moni onme ka?’

¹¹Muton neu sin mak natuin Au, Uisneno amonit, UISNENO Alatan Amnanut, Au ka malin fa leka atoni amle'ut nane anmate; mes Au lomi he in nasaitan in sanat-sanat sin he nati' in anmoni. Hoi to Israel, misnas nai na'ko mo'e amle'ut! Nansa' him lomi he mate?

¹²Nah, mansian amates, mutonan atoni Israel mak leka atoni alekot anmo'e sanat, fun in taos mo'et alekot ahunut nane ka nabe'i fa hen tuntaku in. Leka atoni asanat nasnas na'ko anmo'e sanat, of kan fe neune fa kasat ma leka atoni alekot anmo'e sanat, of kan fe neune fa honis.

¹³Oni Au manba'an ulali he fe honis neu atoni alekot, mes leka in anmo'e anteni sanat ma nafnek nak of in napeni honis natuin in taos mo'et alekot ahunut nane, in natenab ansan. Of Au ka umnau teni fa lasi alekot le afi in anmo'e ma in of anmate natuin in sanat-sanat sin.

¹⁴Oni Au umnauba ulali atoni asanat ak of in anmate. Mes leka in nasnas na'ko anmo'e sanat ma in anfatan monit alekot ma amneot, onle in anfe nafani bale le atoni antalu neune, ai bale le in nabak nalali ma in natuin plenat-plenat le neki honis, in of kan mate fa.

¹⁶Au of ka umnau teni fa sanat-sanat le in anmo'e nalali sin, ma in of anmoni natuin in anmo'e sa' le amneot ma alekot.

¹⁷Mes to nane sin namolok nak Au taos Au mo'et nane ka namneo fa! Mes sin taos sin mo'et ka namneo fa.

¹⁸Hae es anteni Au umolok ak leka atoni alekot mese in anfatan anmo'e lasi amle'ut, in of anmate natuin lasi nane.

¹⁹Leka atoni amle'ut in nasnas na'ko anmo'e sanat, ma in anfatan lasi alekot ma amneot, in of anmoni natuin lasi nane.

²⁰Maski onane to Israel sin namolok nak Au taos Au mo'et nane ka namneo fa. Namneo, of Au ufek sin lasi mese-mese natuin sin taos sin mo'et.”

²¹Anbi fun bo' antam neno nim, neno hai mapolin kai ton bo'es am nua, atoni mese le nafetnon na'ko Yerusalem in nem ma in naton neu kau nak kot nane in anmofu nalali.

²²Anbi fai nahun na'ko in fe ka nem fa, au naben ulali UISNENO In kuasat. Es nane te leka atoni nane in nem neu kau, au nabe'i umolok ma au ka mono teni fa.

²³UISNENO nakua In a'an neu kau nak,

²⁴“Hoi mansian amates, atoni-atoni le sin natua anbi fatu tutnae kot-kot anbi pah Israel nane sin namolok nak, ‘Nai Abraham in napeni pah le i ok-oke, mes in al atoni mese kun. Hit le i tamfau, es nane te pah nane in anfani hit ini.’ ”

²⁵Es nane te UISNENO Alatan Amnanut anlelu kau he utiaba In han ba'an i neu sin ak, “Him bukae sisi le fe anmu'i in na'; hi miluli ma mibes neu fatu le'u ma hau le'u ma hi mimate atoni. Hi matani le'uf ki talan te hi mak pah le i on hi ini kun.

²⁶Him sonlaitom meu hi suni. Hi taos hi mo'et nane neki hainisit. Hi al-al ki anmo'e lasi kake. Fe nabe'i ka hi mak pah nane on hi ini kun?

²⁷Natuin Au, Uisneno amonit, UISNENO Alatan Amnanut, atoni-atoni le sin natua anbi fatu tutnae kot nane of sin anmate natuin anlolo sin. Bian le natua anbi ale mnela of mu'it abulalut neku nani sin. Bain le natolo' anbi ale tubu ma ale nuat of sin anmate natuin menas atlakas.

²⁸Pah nane of Au mo'e anfani mnela snaen le amnino, ma kuasat le sin sonlaiton neune nane of namsopu. Tubu-tubu anbi Israel of anfani mnino maten talan te atoni mese amsa ka nabe'i nao fa nok nane.

²⁹Anbi tabu Au fe kasat neu to nane natuin sin sanat-sanat sin ma Au mo'e pah le i mnino maten, of sin nahin nak Au le i UISNENO Kau.”

³⁰UISNENO nakua in a'an nak, “Hoi mansian amates, hom fani mulali uab molok na'ko atoni ho ini sin anbi tabu sin naeku ma natef anhaumak ale baki lape kot ai anbi ume sin eno matan. Sin namolok es neu es nak, ‘Ayo, aim nai nit atnen UISNENO In han ba'an neu kit nak sa' anbi neno le i.’

³¹Sin nem namfaun maakatuin ma sin on Au to sin antoko ma sin nen ho uab ho molok, mes sa' le ho muplenat neu sin ka natuin nani fa. Sin fefan ma sin lulun sin nauab-uab maliaba, mes sin nekan al natenab lasi mnisat.

³²Sin ankiso ko on atoni asit si maliaba nok hanaf alekot ma ho mubae muhin heo ma biola. Namneo sin nen ho uab ho molok mes sin ka natuin nani fa.

³³Ale sa' le ho muton nane of anbol, ma leka neno nane in nem antia, sin of nahin nak afi anmu'i Mafefa knino mese anbi sin atnankenu.”