Read Uab Meto YEHEZKIEL 34 Bible Online

YEHEZKIEL 34 - Uab Meto bible

YEHEZKIEL 34

¹UISNENO nakua In a'an neu kau nak,

²“Hoi mansian amates, amlaban ale Kesel Israel nai, ma mutiaba sa' le Au, UISNENO Anesit Afinit uton neu sin mak, ‘Amle'ut neu ki, hoi atukus-atukus Israel. Hi al mitenab neu hi aom, hi ka mitenab fa neu hi bibi kase sin.

³In susu hi minu, ma in nafun hi mo'e anfani bale pake, ma bibi kase le anpok bainesi him lolo ma him bukae. Mes hi kam painote fa hi bibi kase sin.

⁴Bibi kase le an ole ma anlimae hi kam panat fa sin, le namen hi kam pailoli fa sin, le napapa' hi kam amu fa sin, le anseke ma namneku hi ka mami fa sin he meki sin anfani nem. Mes ale hi bibi kase sin nane him tao ma mo'e sin nok maufinu.

⁵Natuin kan mu'i fa atukus, bibi kase nane sin nasitbok ma nsan'ok ma sin anfani mnahat neu mu'it abulalut sin.

⁶Es nane te Au bibi kase sin anao neu me-me anbi neten amnanut ma anbu ale tubu sin. Sin nasan'ok neu pah pinan ok-oke, katit fa es hen sian sin ai nami sin.

⁷Nah, atukus-atukus, amnen nai sa' le Au UISNENO Anesit Afinit uton neu ki.

⁸Natuin Au, Uisneno amonit, ampanat nai! Au bibi kase sin mu'i fui anheke ma namate nalali sin ma mu'i fui neku nalali sin, natuin katit fa es he natuku sin. Hi Au atukus-atukus sin hi kam sian fa Au bibi kase sin. Hi al mitenab neu hi aom, ma ka mitenab fa neu hi bibi kase sin monin.

⁹Es nane te, amnen nai hoi ale atukus-atukus,

¹⁰Au, UISNENO Anesit Afinit uton neu ki, nak Au le i hi musu es Kau. Au bibi kase sin of Au aiti ufani sin na'ko ki ma Au ka fe teni fa sin neu ki; Au ka ufetin ki fa anteni he mitenab al neu hi aom anmes. Au bibi kase sin of Au ufetin sin na'ko ki talan te sin kan fani teni fa bukae neu ki.’ ”

¹¹UISNENO Anesit Afinit nakua In a'an nak, “Au ekinok of Au ami Au bibi sin ma Au panat sin,

¹²on atukus mese le nami ma nabuab in bibi kase sin le nasitbok ma nasan'ok oke te Au panat sin. Of Au eki ufani sin na'ko ale bale le sin nasan'ok anbi neno le names'ok ma le ka naleko fa nane.

¹³Of Au upoitan sin na'ko uf-uf sin atnanan ma pah-pah atoni anao amnemat, oke te Au ubuaba sin ma Au eki sin neu sin pah kun. Of Au utuku sin anbi tubu-tubu ma anbi nonof-nonof Israel ma Au na' ma topu sin neu ale mnela hun alekot.

¹⁴Namneo, of Au uloitan neu sin ale mnela hun le anmoni nok namlia anbi neten ma anbi ale nonof pah Israel. Anbi nane sin of nasnas ma sin neku hun nok tainine.

¹⁵Au ekinok of Au fani atukus neu Au bibi kase sin ma uloitan bale snasat neu sin; Au UISNENO Anesit Afinit ukua ulali Au a'ak.

¹⁶Le namneku of Au ami sin, le anseke of Au eki ufani sin, le napapa' of Au amu sin papa', le namen of Au paloli sin; mes apokat ma abe'it of Au ule'un sin, natuin Au atukus es amo'e sa' le alekot.

¹⁷Amnen nai, hoi Au bibi kase sin! Au, UISNENO Anesit Afinit Au uton neu ki ak of Au ufek lasi neu ki mese-mese ma Au beti aikan alekot na'ko amle'ut, bibi kase na'ko ale bibi.

¹⁸Anbi ki anmu'i le nekan kan malin fa al natuin neku nani hun alekot bainesi, mes nahapun hun le sin ka neku fa! Sin ninu oe le naknino oke te anheukele oe le sin ka ninu fa!

¹⁹Au bibi bian sin sin mes neku hun le sin nahapun nane ma sin ninu oe le sin anheukele nalali nane.

²⁰Es nane te, Au, UISNENO Anesit Afinit Au uton neu ki, hoi bibi kase apokat sin, ak Au of aum ma fani alef lasi anbi bibi kase le nabe'i ma bibi kase le an ole.

²¹Him be'u ma amfoti bibi kase le namen talan te sin naen na'ko bibi kase sin buat.

²²Mes Au ekinok of ufetin Au bibi kase sin, he nati' kais antao ma anmo'e sin nok maufinu. Au of ufek lasi neu Au bibi kase sin mese-mese ma beti aikan alekot na'ko amle'ut.

²³Of Au aiti kesel mese on Au ate Nai Daud, he nati' in nekinon kun anfani atukus neu sin, ma in of anpanat sin.

²⁴Au, UISNENO Kau, of Au fani Uisneno neu sin, ma kesel onle Au ate Nai Daud nane of anfani ana' aplenat neu sin. Au, UISNENO Kau ukua ulali Au a'ak.

²⁵Of Au mo'e lasi manta'en ok sin, ma of Au panat sin lasi tainine. Of Au li'u ale mu'it abulalut na'ko pah ok-oke, talan te Au bibi kase sin nabe'i sin namaika nok tainine anbi ale mnela maantup anbi ale nasi-nasi.

²⁶Of Au fe tetus neu sin ma Au ufetin sin he natua anbi Au tubu knino sin. Of Au fe ulan neu sin leka sin antoti.

²⁷Ale hau of nafua, ale lene of napoitan sin afan, ma ale atoni of natua tainine anbi sin pah. Leka Au ufek kolen besi le anfutu Au to ma Au ufetin ulali sin na'ko atoni-atoni le an aten sin, sin of nahin nak Au le i UISNENO Kau.

²⁸Uf-uf le ka nahin Kau fa of ka nabak anteni fa sin, ai mu'it-mu'it abulalut of kan heke ma ka neku fa sin. Sin of anmoni nok alekot, ma kan mu'i fa atoni mese amsa le anmo'e sin he sin namtau anteni.

²⁹Of Au fe alekot neu sin lene sin talan te kan mu'i fa neno amnahas anteni anbi pah nane. Uf-uf bian of ka nasi'u anteni fa sin.

³⁰Es nane te of sin nahin nak Israel nane Au to ma nok nane te Au uneo ma uhafo sin. Au, UISNENO Anesit Afinit ukua ulali Au a'ak.

³¹Namneo, Au bibi pukan mese esle' hi le Au fe ki hem bukae. Hi le nane Au to, ma Au le i hi Uisneno. Au, UISNENO Anesit Afinit ukua ulali Au a'ak.”