Read Uab Meto YEHEZKIEL 36 Bible Online

YEHEZKIEL 36 - Uab Meto bible

YEHEZKIEL 36

¹UISNENO nakua In a'an nak, “Hoi mansian amates, mumolok nai neu tubu-tubu Israel ma amlelu sin he sin nen a'an UISNENO Anesit Afinit nak,

²‘Leka uf-uf le anhaumak ki nape' ma nabak ki, sin nasi'u nalali Israel ok-oke. Nok amlilat sin namolok nak neno i neten-neten afi ahunut nane anfani sin ini. Es nane te, hoi tubu-tubu ma neten-neten, noe ana sin ma nonof sin, hoi kot-kot le amfani milali fatu tutnae ma ale atuas sin nasaitan nalali ma ale uf-uf le anhaumak nabak ma nasi'u, amnen nai sa' le UISNENO Anesit Afinit naton neu ki nak: Anbi Au to'as le nahenu Au sali uf-uf le anhaumak ko ma nes-nesi Edom, natuin sin nok nek amlilat ma sin nasi'u, sin nasik nalali Au pah ma antet nan ale mnela hun sin. Tabu le i Au uto' ma Au umaunu natuin uf-uf nane sin nasi'u ki nae le'uf ma sin nanebet ki.

⁷Au, UISNENO Anesit Afinit Au sup ak uf-uf le anhaumak ko nane of nasi'u sin amsa.

⁸Mes neu ko Au umolok ak hoi tubu-tubu Israel, ho hau sin of nasuni ma napae ma nafua anteni neu Au to Israel le of ka lo fa sin anfani nem.

⁹Au hake ok ki hoi Israel, ma Au uhin namneo nak hi nani of hi mifoi amteni ma amsen fini neune.

¹⁰Of Au sato teni Au to Israel sin amfauken. Sin of natua anbi kot-kot ma nafena nafani ale sin fatu tutnae sin.

¹¹Ho to ma ho mu'it sin of Au sato teni sin, talan te anfani amfau le'uf, namfau nesi afi ahunut, ma sin of nasuf ma naka'u namfau. Sin of anmoni anbi nane of afi neno ahunut ma of Au mo'e sin anmoni nok athoes, onle hi fe ka mitef mok fa lasi nane. Ma of sin nak Au le i UISNENO Kau.

¹²Au to Israel, of Au eki sin anfani nem he nati' sin natua sin pah anteni. Pah nane of anfani sin ini kun ma of anfe in afan piut talan te sin anah-anah sin of kan maten fa amnahas anteni.

¹³Au, UISNENO Anesit Afinit ukua Au a'ak ak: Fun namneo teb pah le i nakanab nak amneku sisi atoni ma asik li'ana — uf le natua anbi nane.

¹⁴Mes naubon na'ko tabu le i pah le i in of ka amneku sisi atoni anteni fa ai ka asik li'ana anteni fa. Au UISNENO Anesit Afinit ukua ulali Au a'ak.

¹⁵Ka nabe'i anteni fa pah le i he nen lasi si'u na'ko uf-uf ai ansutai lasi akan na'ko atoni bian. Pah le i of ka namate fa uf le natua anbine. Au, UISNENO Anesit Afinit ukua ulali Au a'ak.’ ”

¹⁶UISNENO nakua In a'an neu kau nak,

¹⁷“Hoi mansian amates, leka atoni-atoni Israel natua anbi sin pah kun, sin nalahi nalali neki sin taos sin mo'et amle'ut, onle fenai le in funan fe nem.

¹⁸Au usanut Au to'as neu sin natuin sin anmo'e nalali lasi namate atoni namfau anbi pah nane ma sin nalahi nani neki sin fatu le'u ma sin hau le'u.

¹⁹Au fe neu sin kasat anmatom nok sin monin ma sin taos sin mo'et, oke te Au usitib ma usana sin neu pah-pah bian.

²⁰Sin he nao neu me amsa, sin nalahi Au kanak knino piut. Natuin atoni-atoni sin namolok nak on i, ‘Uf le i to Uisneno, mes sin mes nasaitan sin pah le Uisneno anfe neu sin.’

²¹Au nekak nasusbon natuin Au kanak knino nane atoni Israel sin nalahi nalali fun sin he nao neu me amsa.

²²Es nane te, mutiaba sa' le Au UISNENO Anesit Afinit uton neu to Israel ak, ‘Sa' le of Au he mo'e nane ka natuin fa hi, hoi atoni-atoni Israel, mes natuin Au kanak knino, le hi milahi milali leka hi amnao meu me amsa.

²³Of Au ulila ma uton Au kanak knino anaet nane, kanaf le hi milahi milali anbi uf-uf sin atnanken, ma of sin nahin nak Au UISNENO Kau. Au, UISNENO Anesit Afinit ukua ulali Au a'ak. Of Au pake ki he milile ma miton neu uf-uf mak Au le i knino Kau, UISNENO Knino knao matani.

²⁴Na'ko uf mese-mese ma pah mese-mese, of Au ubuab ki ma Au ufani ki neu hi pah kun.

²⁵Oke onane te of Au lisin oe knino neu ki, he nati' hi miknino mi'ko ale fatu le'u ma hau le'u ma na'ko ale sa'-sa' le nalahi ki.

²⁶Ma Au fe neu ki nekaf fe'u ma tenab fe'u. Hi nekam le namanu on fatu nane of Au seka eki nekaf le anlomi he natuin.

²⁷Au Smanan Knino of Au usanut anbi hi nekam nanan ma of Au panat ki he nati' hi moni mituin Au lekat lulut sin ma mituin ale Au plenat-plenat sin.

²⁸Ma of hi mitua anbi pah le au fe ulali neu hi na'i hi be'i sin. Of him fani Au to ma of Au fani hi Uisneno.

²⁹Of Au ufetin ki na'ko ale lasi le nalahi hi monim. Of Au fe plenat neu ane kase he nati' anmoni nok alekot talan te amnahas of kan toman ki fa anteni.

³⁰Of Au sato teni hi haunu sin fuan ma hi lene-lene sin afan, talan te of hi ka mieku amteni fa mok neno amnahas le nale'uf hi kanam anbi uf-uf sin.

³¹Hi of mimnau hi taos mo'et amle'ut ma hi monim le kan tam fa ota nane, oke te of him lenan hi monim natuin sanat-sanat ma hi lasi amle'ut nane.

³²Hoi Israel mimnau nai, nak ale nane Au tao ma mo'e ka natuin fa hi. Hi mes hem naben lasi mae ma mibaunom nai natuin hi taos hi mo'et nane. Au UISNENO Anesit Afinit ukua ulali Au a'ak.”

³³UISNENO Anesit Afinit nakua In a'an nak, “Leka Au uknino ulali ki na'ko ale hi sanat sin, of Au ufetin ki he mitua ambi hi kot-kot sin anteni, ma mifena mifani ale in fatu tutnae sin.

³⁴Afi ahunut atoni-atoni sin anao natuin hi lene sin ma sin nit nani nane monas kun, mes of Au kolan ki he hi mepu amteni nani nane.

³⁵Ma ale atoni of sin namkak, natuin nani le afi in monas nane muni i nabaina ma anfani etu Eden, ma kot-kot le afi sin mnino kun, naskuku ma anfani fatu tutnae, muni i anfani kot-kot abe'it ma matani ma tuafen amfau le'uf.

³⁶Ma uf-uf ahaumakat le fe anbine, sin of nahin nak Au, UISNENO, Au ufena ufani kot-kot le naskuku nalali, ma Au mepu ufani lene-lene monas nane. Au, UISNENO Kau, ukua ulali Au a'ak ma namneo of Au unaoba ani.”

³⁷UISNENO Anesit Afinit nakua In a'an nak, “Hoi to Israel, Au ufetin ateni ki he him toti tuntakus na'ko Kau; of Au sato teni hi sufam hi ka'um on bibi kase pukan mese.

³⁸Kot-kot le tabu le i naskuku, of namuni te atuas of nahenu anbine onle Yerusalem anbi neno-neno naek anbi batan afinit, nahenu nok bibi kase le natulu ma natnat sin. Ma of hi mihin mak Au le i UISNENO Kau.”