Read Uab Meto YEHEZKIEL 37 Bible Online

YEHEZKIEL 37 - Uab Meto bible

YEHEZKIEL 37

¹Au naben kuasat UISNENO, ma In Smanan Knino neki au sanu nonof le nahenu nok ale nuif.

²UISNENO antopu kau fun am utef nonof nane, ma au it nak anbi nonof nane ok-oke nahenu nok nuif-nuif amates le amfau le'uf ma anmeto teb-teb.

³UISNENO natoti kau nak, “Hoi mansian amates, nabe'i ka nuif-nuif i anmoni anfani?” Au utae ak, “UISNENO Anesit Afinit, al Ho kum es Ho muhin.”

⁴Oke te UISNENO anlelu kau utiaba In han ba'an neu nuif-nuif amates le anmeto nane ak,

⁵“Au UISNENO Anesit Afinit Au fun Au snasaf neu hi aom he nati' hi moni amfani.

⁶Au tao keof ma nesa neu ki ma Au amu ki eki pasu. Hi of Au fehi snasaf he nati' hi moni. Ma of hi mihin mak Au le i UISNENO Kau.”

⁷Oke te au Nai Yehezkiel au umolok neu nuif-nuif amates nane anmatom nok UISNENO In aplenat. Ma leka au fe umolok onane, au nen kilof natuin nuif-nuif nane anmatalun ma anmatlut anfani es nok es.

⁸Leka fe au kiso onane, keof ma nesa na'ki anbi nuif-nuif nane oke te anmu'i pasu amsa mes ta'uf-ta'uf nane fe kan mu'i fa snasaf.

⁹Uisneno nakua In a'an neu kau nak, “Hoi mansian amates, mumolok nai neu anin. Muton neune mak Au, UISNENO Anesit Afinit Au fe plenat neune he nati' nem na'ko neno in kabenan sin, he nati' anfu snasaf neu ta'uf-ta'uf amates nane talan te sin anmoni anfani.”

¹⁰Es nane te au umolok anmatom nok plenat UISNENO ma anin amsa anfu snasaf neu ta'uf-ta'uf nane oke te sin anmoni ma anhake. Sin amfauken amfau le'uf, nanokbon neu he tahakeb solalus pukan mese.

¹¹Uisneno nakua In a'an neu kau nak, “Hoi mansian amates, nuif-nuif i anfani on a a'taka' neu to Israel. Sin ansakoi nak sin anmeto, kan mu'i fa panet ma afnekan neu neno amnemat.

¹²Es nane te am etun ma muton nai neu Au to Israel nane mak Au, UISNENO Anesit Afinit of Au fai sin nitu nate. Of Au upoitan sin na'ko nane ma eki ufani sin neu pah Israel.

¹³Leka Au unaoba ulali ale nane ok-oke, Au to of nahin nak Au le i UISNENO Kau.

¹⁴Of Au fun a'snasaf neu sin aoken he umonib ufani sin, oke te Au ufetin sin he sin natua anbi sin pah kun. Ma of sin nahin nak Au le i UISNENO Kau. Au UISNENO Kau ukua ulali Au a'ak ma lasi nane namneo of nanaoba nani.”

¹⁵UISNENO nakua anteni In a'an neu kau nak,

¹⁶“Hoi mansian amates, maiti man tias mese ma amtui uab molok i anbi in fafon mak, ‘Plenat Yehuda’. Oke te maiti tias mese anteni, ma amtui anbi in fafon mak: ‘Plenat Israel’.

¹⁷Nalali te amna' tias nua en nane nok leko-leko talan te sin panken nabua ma anfani tias mese.

¹⁸Leka ho to nane natoti in otan,

¹⁹muton neu sin, mak Au UISNENO Anesit Afinit of Au aiti tias le anfani taka' Israel ma ubuaba nok tias le anfani taka' Yehuda. Tias nua en nane of Au mo'e sin anfani mese ma Au na' anbi Au nimak nanan.

²⁰Amna' tias nua en nane ma muton sin neu to nane.

²¹Oke te mutonan sin mak Au, UISNENO Anesit Afinit of Au aiti Au to ok-oke na'ko pah-pah bale le sin anao nalali neune. Of Au ubuaba sin ma Au eki ufani sin neu sin pah kun.

²²Of Au mo'e sin anfani uf mese anbi pah nane, anbi tubu Israel. Of kesel mese es naplenat sin, ma of katit ateni fa le hen pe' anfani uf nua ai plenat nua.

²³Sin of ka nalahi fa sin aoken anteni neki sanat ma naluli nabes neu fatu le'u ma hau le'u le neki hainisit. Of Au ufetin sin na'ko monit le sin anbeo na'ko lanan amneot le anmo'e sin talan te sin an aneb Kau. Of Au uknino sin; sin of anfani Au to, ma Au fani sin Uisneno.

²⁴Of Au umeseb sin anbi kesel mese onle Kesel Nai Daud le of naplenat talan te nabal-bal. Sin of natuin Au lekat lulut sin nok nek aki'at. Ma mes antia nabal-bal sin ma nok sin sufan of sin natua pah nane, pah le Au fe neu Nai Yakub ma le sin na'i sin be'i natua anbine.

²⁶Of Au mo'e lasi manta'en mese ok sin le anfe tainine neu sin talan te nabal-bal. Of Au fe tetus neu sin ma sato sin amfauken he nati' sin namfau. Anbi sin pah of Au ufena Au Ume le anhake nabalah anbi nane talan te nabal-bal.

²⁷Of Au utua ubua ok sin, of Au fani Uisneno neu sin ma sin anfani Au to.

²⁸Leka Au Ume anhake nalali anbi sin atnanan talan te nabal-bal, of uf-uf bian sin nahin nak Au, UISNENO, Au beti ulali Israel anfani Au to kun.”