Read Uab Meto YEHEZKIEL 38 Bible Online

YEHEZKIEL 38 - Uab Meto bible

YEHEZKIEL 38

¹UISNENO nakua In a'an neu kau nak,

²“Hoi mansian amates, amfe sukat neu Nai Gog kesel apinat na'ko pah-pah Mesekh ma Tubal anbi Magog.

³Muton neune mak Au, UISNENO Alatan Amnanut, nane Au musu es in.

⁴Of Au ubeoba in, Au tao ka'i anbi in su'in, ma aiti in anpoi nok in pukan solalus sin. Amfau le'uf in solalus asae bikase sin le anpake bale pake huma mese. Solalus mese-mese neki ben besi tika ma suni.

⁵Solalus-solalus na'ko Persia, Sudan ma Libia, mese-mese neki sin suni ma sobe besi, ma sin natuin kesel.

⁶Ale meo pa'e na'ko pah-pah Gomer ma Bet-Togarma anbi bian a'li, sin nao mat nok in, ma uf bian namfau le natuin in amsa.

⁷Amlelu in he naloitan ma nabalab ma anfe plenat neu solalus ok-oke le nabuabok nok in he nati' sin naloitan ma natuin in aplenat.

⁸Ton-ton fauk anteni of Au uplenat in he nati' nape' pah mese nok to le nabuab nafani sin na'ko uf namfau ma le namuni te natua pah nane nok tainine. Nai Gog of antoko tubu-tubu Israel le lo le'uf namnino ma nahenu nok fatu tutnae, mes muni i to le anmoni halan sin natef nokan.

⁹In nok in solalus sin ma uf namfau le natuin in of sin nem ma nape' on anin slutuf ma antobe nan pah ok-oke on nope.”

¹⁰UISNENO Alatan Amnanut nakua a'an neu Nai Gog ak, “Anbi neno nane of ho mo'e salit amle'ut.

¹¹Ho mufek he mupe' pah le kan mu'i fa baki lape nane, fun sin to anmoni ka nok fa lasi amtaus ma tainine anbi kot-kot le kan mu'i fa baki lape ma kan mu'i fa bale manuat he nataunok.

¹²Ho of mubak ma musik ale bale na'ko to anbi kot le afi ahunut anfani fatu tutnae nane. In to sin le nabuab sin na'ko uf-uf muni le i anmu'i maus namfau ma mu'it ma sin anmoni anbi pah in atnanan.

¹³To Syeba ma Dedan ma ale asosa anbi anbi kot-kot pah Spanyol of sin natoti neu ko nak on i, ‘Ait ho meki ho solalus sin al neu he musik ma mubak noni mnatu, noni muti, mu'it ma maus, ma he maiti meki sin?’ ”

¹⁴Es nane te UISNENO Alatan Amnanut ansonu kau he utiaba neu Nai Gog han ba'an in, “Namneo-namneo anbi neno Au to Israel anmoni ka nok fa lasi amtaus ma tainine, ho aum ma mupe' sin.

¹⁵Ho amfen mu'ko ho bale maika, na'lo anbi bian a'li, solalus namfau ma matani le natuin ko, sin ok-oke nane solalus asae bikase na'ko uf-uf.

¹⁶Oke te hom ken Au to Israel onle anin slutuf ansanu nem neu pah pinan. Leka in tabu antia, of Au sonu ko he nati' amtoko Au pah. Nok Au taos Au mo'et le nanete natuin ko, hoi Gog, uf-uf of sin nahin nak sekau ka es Au, Uisneno le aknino.

¹⁷Ai ka neu ko fa ka anbi ahunut Au ukua ulali Au a'ak nanete natuin Au ate sin Mafefa knino Israel? Sin etun ma naton nak anbi batan amnemat of Au lelu atoni mese he anken Israel. Au UISNENO Alatan Amnanut ukua ulali Au a'ak.”

¹⁸UISNENO Alatan Amnanut nakua In a'an nak, “Mes leka Nai Gog anken nalali Israel, Au of umaunu.

¹⁹Ma nok to'as anaek of Au sali sin, ak anbi neno le i anmu'i tainunus le matani anbi pah Israel.

²⁰Ale ika ma kolo, ale mu'i anaet ma abaut, ma ale mansian anbi pah pinan of sin anlilitai namtau natef nok Kau. Tubu-tubu of natsel, ale kefan of ansai ma ale baki lape of natkua.

²¹Oke te Nai Gog of Au uskekeb in eki ale lasi amle'ut. Au, UISNENO Alatan Amnanut ukua ulali Au a'ak. In solalus sin of sin anmalaban es nok es neki sin suni.

²²Of Au kas in eki menas le natlak ma lasi opan na'. Ulan anaek ma ul sen-sene, ai ma laso molo of Au usanut nem neu in ma in solalus sin ma neu pah amfaun le nabua nok in.

²³Nok lasi nane of Au ulile ma uton neu ale uf-uf nak Au le i apinat ma knino Kau. Ma of sin nahin nak Au le i UISNENO Kau.”