Read Uab Meto YEHEZKIEL 39 Bible Online

YEHEZKIEL 39 - Uab Meto bible

YEHEZKIEL 39

¹UISNENO Anesit Afinit nakua In a'an nak, “Hoi mansian amates, amsali Nai Gog, kesel anaet na'ko pah-pah Mesekh ma Tubal, ma muton neune mak in musu esle' Au.

²Of Au ubeob in, ma eki anpoi anao neu pah a'lo anbi bian a'li, neu tubu-tubu Israel.

³Anbi nane of Au eso sin aklaot talan te nafetnon na'ko in niman a'li, ma Au umofu in as'anef sin na'ko in niman a'ne'u.

⁴Anbi tubu-tubu Israel sin fafon, Nai Gog nok ale in solalus sin ma sin le nabua nok in of sin anmate anbi nane, ma sin aon nitu of Au fe sin neu ale kolo ma mu'it abulalut he neku nani sin.

⁵Solalus-solalus nane of sin natsel ma anmate anbi ale mnela. Au, UISNENO Anesit Afinit ukua ulali Au a'ak.

⁶Of Au upoitan ai mnotu anbi pah Magog ma anbi ale tasi ninen, anbi bale le in to sin anmoni nok tainine. Ma of sin ok-oke nahin nak Au le i UISNENO Kau.

⁷Mes anbi atoni Israel sin atnanan, of Au ulile ma uton Au kanak le aknino, ma Au kanak nane of ka nalahi anteni fa. Ma uf-uf of sin nahin nak Au le i UISNENO Kau, Uisneno knino na'ko atoni Israel.”

⁸UISNENO Anesit Afinit nakua In a'an nak, “Namneo, neno le Au tek nane of in nem.

⁹To anbi kot-kot Israel of sin anpoi maakatuin he nabuab bale manuat le nasaitan nalali sin, esle' ben besi tika ma suni, aklaot ma as'anef ma tias le anpake neu hen beso. Ale nane ok-oke sin anmo'e anfani hau hopit, ma nane nanokbon neu ton hitu.

¹⁰Es nane te sin ka nabuab fa hau hopit anbi mnela ai nafae hau anbi nasi, natuin bale manuat le sin nasaitan nane namfau teb hen fani hau hopit. Sin of nabak ma nasik maus atoni-atoni le afi sin nabak ma nasik sin amaus anbi neno ahunut. Au, UISNENO Anesit Afinit ukua ulali Au a'ak.”

¹¹UISNENO nakua In a'an nak, “Leka ale nane anbol, of Au fe neu Nai Gog afu nitu nate anbi Israel, anbi Nonof Atlaka anbi neno saen na'ko Tasi Maten. Anbi bale nane Nai Gog ma ale in solalus sin of ansub sin, ma nonof nane of antek nak ‘Nonof Meo pa'e Nai Gog’.

¹²Funan hitu in a'lon atoni-atoni Israel of sin nahaebok hen sub ale aon nitu amates he nati' pah nane kais nalahi anteni.

¹³To anbi nane ok-oke sin of anbab mepu subat nane; ma nok nane te sin of ansimo lasi tola anbi Au neno mnisat. Au, UISNENO Anesit Afinit ukua ulali Au a'ak.

¹⁴Leka funan hitu anfini ma ankono, atoni fauk-fauk of Au lek sin hen fun am natef pah nane he nami aon nitu atoni amates le fe anpolinon anbi nani, ma leka fa anmu'i, ansub sin he naknino pah nane na'ko lasi lahi.

¹⁵Leka sin anao anbi lanan, sin nit nuif atoni amates, sin of antao taka' anbi in aon bian, he nati' atoni-atoni asubat sin nit taka' nane ma sin ansub nuifen nane anbi Nonof Meo pa'e Nai Gog.

¹⁶Nok lasi nane pah nane naknino nani na'ko lahi. (Anbi neno namuni, anbi nonof nane of anmu'i kot le in kanan papamese nok Meo pa'e Nai Gog.)”

¹⁷UISNENO Anesit Afinit nakua In a'an neu kau nak, “Hoi mansian amates, mo'en ale kolo ma mu'it bian anteni, he nati' sin nem na'ko me-me he neku fua tulu le Au uloitan neu sin. Of Au mo'e fesat anaek mese anbi tubu-tubu Israel, anbi nane nabe'i sin neku sisi ma sin ninu na'.

¹⁸Sin nabe'i neku meo pa'e amates sin aon nitu, ma ninu na' ale ana' aplenat pah pinan. Ale meo pa'e ma ana' aplenat nane of anlolo sin on ale bibi keso sin ai on bibi ana sin, ai bijae-bijae apokat.

¹⁹Leka Au umate ulali atoni-atoni nane onle fua tulu, ale kolo ma mu'it-mu'it bian of sin neku nani sin balun talan te naben on hen lo', ma sin ninu na' talan te sin anmafu.

²⁰Anbi Au mei sin tain namsen nok ale bikase ma asaet sin ma nok ale meo pa'e sin. Au, UISNENO Anesit Afinit ukua ulali Au a'ak.”

²¹UISNENO nakua In a'an nak, “Of Au panat Au apinat neu uf-uf. Sin al-al sin of sin nit neu onme Au pake Au kuasat he unaoba ale Au lasi tfeka amneot sin.

²²Naubon na'ko tabu nane atoni Israel of sin nahin nak Au le i sin UISNENO.

²³Ma ale uf of sin nahin nak Au sonu atoni Israel neu bale mapolin natuin sin sanat neu Kau. Au usaitan ulali sin ma Au ufetin sin he nati' musu nis ma anbe'u sin ma namate sin anbi makenat in nanan.

²⁴Au tao ma mo'e sin anmatom nok sin lasi lahi ma sin lasi amle'ut, oke te Au usaitan sin.”

²⁵UISNENO Anesit Afinit nakua In a'an nak, “Mes tabu le i of Au nek umnau to Israel Nai Yakub in sufan, ma Au mo'e sin anmoni nok alekot anfani. Nok nane te Au panat he nati' antola Au kanak nabalah.

²⁶Leka sin natua anteni nok tainine anbi sin pah kun, ma katit fa atoni mese amsa le ansali sin, ma of sin nikan neu onme sin namaeba nalali Kau natuin sin aneb Kau.

²⁷Of Au eki sin anfani na'ko pah-pah sin musu sin, ma Au akninok nane of naklile ma natonon neu ale uf natuin Au taos Au mo'et nane.

²⁸Ma of Au to sin nahin nak Au le i sin UISNENO. Natuin Au es a'sonu sin neu bale mapolin, mes Au amsa es eki ufani sin neu sin pah kun, fun Au ka umaika fa es na'ko sin anbi nane.

²⁹Of Au usanut Au Smanan knino neu to Israel, ma of Au ka usaitan ateni fa sin. Au, UISNENO Anesit Afinit ukua ulali Au a'ak.”