Read Uab Meto YEHEZKIEL 4 Bible Online

YEHEZKIEL 4 - Uab Meto bible

YEHEZKIEL 4

¹Uisneno nakua In a'an nak, “Hoi mansian amates, maiti man fatu me mese, amtao anbi ho matam ma amlun tuis na'ko kot Yerusalem.

²Oke te amlun neu solalus anfun natef nan kot nane, ale lolok, afu le manibun, ale ume-ume, ma ale bale le hen pake he nale'un baki lape anfun natef.

³Maiti man tasu besi mese ma hom kiso nane on klipit besi mese; amtao tasu besi nane anbi ho ma kot Yerusalem atnanan. Nalali te ambaina meu kot nane onle ho es amfun mutef man kot nane. Nane of anfani taka' neu atoni Israel.

⁴Oke te amtup amkalibom neu kabenan a'li, ma of au usaeb ko atoni Israel sin sanat neu ko. Of hom tup man neno 390 onane ma hom sutai susal manaet natuin sin sanat. Hom tup man neno mese nane anfani taka' ton mese in a'lon Au kas to Israel.

⁶Oke onane te, amtup amkalibom neu kabenan a'ne'u ma amnaben kasat neu sanat Yehuda neno bo'ha in a'lon, neno mese anfani taka' ton mese kasat neu sin.

⁷Amkiso neu Yerusalem anfun natef nan in. Muaiti ho nukum neu kot nane ma mutiaba Au han ba'an neu kasat antom sin.

⁸Of Au futu ko talan te ho ka mubaina fa ho aom na'ko a'li ma neu a'ne'u ai bian anteni talan te anfun natef nan nalali kot nane.

⁹Tabu i, maiti nai ane kase, sain, koto amtasa, koto selo, ma ane kase mnutu. Amselo sin ok-oke ma amo'e utunu'. Nane ho mnahat anbi neno 390 a'lon ho amtup ambaina neu a'li nane.

¹⁰Utunu' nane nati' hom bati mulek-leko talan te neno mese al hom bukae gram 230. Kais anesi na'ko nane.

¹¹Oe mninu amsa of hom su' mulek-leko, cangkir nua anbi neno mese.

¹²Muhopi ai meki mansian in maklafu anfani hau hopit. Amse'i ho utunu' nane anbi ai nane ma hom bukae utunu' nane anbi atoni ok-oke sin human sin matan.”

¹³UISNENO nakua In a'an nak, “Onle nane atoni Israel of sin anbukae mnahat le Nai Musa in plenat nakain nani, anbi tabu Au polin sin neu pah-pah atoni bian.”

¹⁴Mes au utae ak, “Koi UISNENO Anesit Afinit! Na'ko au fe an-ana kau talan te neno le i, au fe ka ulahi fa au aok eki mu'it amates ai mu'i fui in amnah nesif. Au fe ka uah it fa mnahat le mapenan.”

¹⁵Es nane te Uisneno nakua In a'an nak, “Leko, anfani seka neu mansian in maklafu, nabe'i hom pake bijae in maklafu hem tunu ho utunu'.”

¹⁶Nalali te In nakua In a'an anteni nak, “Hoi mansian amates, of Au ule'un ani bale loitan balab mnahat anbi Yerusalem. Nok nek ole ma amtaus atoni-atoni sin of ansu' bukae le sin anbukae ma oe le sin ninu.

¹⁷Sin of naoelbok natuin sin nalali sin utunu' ma oe, ma amsoput of sin anmate natuin sin sanat-sanat kun.”