Read Uab Meto YEHEZKIEL 40 Bible Online

YEHEZKIEL 40 - Uab Meto bible

YEHEZKIEL 40

¹Tabu nane fun mese antam neno bo'mese anbi ton bo'ha am nim neno hai mapolin kai, ton bo'es am ha leka nis ma anbe'u Yerusalem, au naben kuasat UISNENO, oke te neki Kau anao.

²Anbi lasi mnitas mese, Uisneno neki kau neu pah Israel ma antao kau anbi tubu amnanut mese in tunan. Au it anbi au humak ma au matak lasi fena pukan mese namasbon on kot mese.

³Neki kau neu bale nane ma au it atoni mese le nalim on noni molo anhake anhaumak eno naek. In ana' tani su'at na'ko pilu muti ma fun hau su'at mese.

⁴Atoni nane namolok neu kau nak, “Hoi mansian amates, amnen leko-leko ma ampanat ale sa' le Au uton neu ko, fun natuin lasi nane Au eki ko aum meu i. Muton neu to Israel ale sa' le ho mit.”

⁵Oke te au it Ume UISNENO le baki lape anfun natef nan. Atoni nane ansu' baki lape nane neki in hau su'at le in amnanun meter tenu. Baki lape nane in amnanun meter tenu ma in mafaun amsa meter tenu.

⁶Nalali te in anao neu eno naek le anbaina neu neno saen. In ansae natuin in elak ma leka in antia in tunan, in ansu' eno nane in suta'i, in menuan meter tenu.

⁷Anbi eno naek nane in kotin anmu'i lan luman mese ma anbi lan luman nane in ninen anmu'i ke'an tenu. Ale ke'an nane sin anaeken papamese; in masan ma si'uf ha, ma si'uf mese in amnanun meter tenu. Baki lape le an eka ke'an mese-mese sin mafauken papamese, este meter 2,5. Lan sona nane namnanu meter tenu anteni ma an ali ke'an anaek le le anbaina neu Ume UISNENO. Atoni nane ansu' ke'an naek nane ma menuan meter ha; in anbi eno naek in fafon, anbi nanaf, anhaumak nis nok Ume UISNENO. Baki lape-baki lape anbi aon bian le anbaina neu Ume UISNENO, in mafaun meter mese.

⁸

⁹

¹⁰

¹¹Nalali te atoni nane ansu' lan luman nane in menuan anbi eno naek; meter 6,5, ma eno naek nane in menuan amsa meter 5.

¹²Anbi ke'an-ke'an paot amsa le masu'ak meter 3 nok meter 3 nane, anmu'i baki lape le namneb le in amnanun senti 50, ma in mafaun amsa senti 50.

¹³Oke te atoni nane ansu' baki lape kotin na'ko ke'an paot mese anao neu ke'an baki lape paot bian in amnanun meter 12,5.

¹⁴In amsa ansu' ke'an naek nane: in amnanun meter 10. Eno ke'an nane an ali neu po'an mone Ume UISNENO.

¹⁵In a'lon na'ko eno naek anbi aon bian le anbaina neu Ume UISNENO meter 25.

¹⁶Anbi baki lape kotin ma baki lape le an eka ke'an-ke'an nane anmu'i eno kiso-eno kiso ana. Baki lape-baki lape anbi nanaf le anbaina neu lanan luman nane, anpake noas neki hau pet kase malula.

¹⁷Nalali te atoni nane neki kau nao utuin eno naek neu po'an abit mone Ume UISNENO. Anbi baki lape nane anfun natef Ume UISNENO nane nafena ke'an 30. Anbi ke'an-ke'an nane sin matan anmu'i tu'in fatu

¹⁸le anfun natef nan po'an nane ok-oke. Po'an abit mone nane namneb anesi na'ko po'an abit nanaf.

¹⁹Anbi nane anmu'i eno naek bian le namnanu nesi ma le an ali neu po' anabit nanaf. Atoni nane ansu' eno naek nua en nane sin anma'lon: meter 50.

²⁰Nalali te atoni nane ansu' eno naek kabenan a'li le an ali neu po'an abit nanaf.

²¹Anbi eno naek nane, ma ke'an paot tenu sin es-es anmu'i lan luman, baki lape-baki lape le an eka ma in ke'an anaek, al-al sin papmese nok le anbi eno naek neno saen. Ale lan luman eno naek nane sin amnanun meter 25 ma menuan meter 12,5 mater.

²²Onane amsa in ke'an anaek, eno kiso' sin, ma in hau pet kase malula papmese nok abit eno naek neno saen. El fatu ana hitu an ali neu eno naek nane, ma anbi in amsopun anmu'i ke'an naek le anbaina neu po'an abit mone Ume UISNENO.

²³Anmabaina nok eno naek kabenan a'li, anmu'i anteni eno naek bain le an ali neu po'an abit nanaf, papamese onle eno naek abit neno saen. Atoni nane ansu' eno naek nua en sin anma'lon: meter 50.

²⁴Oke te, atoni nane neki kau neu eno naek kabenan a'ne'u ma ansu' nani. Fun eno naek nane papmese onle eno naek bian sin.

²⁵Eno kiso-eno kiso anbi in ke'an-ke'an sin papmese onle anbi eno naek-eno naek bian. Lan luman eno naek nane amnanun meter 25, ma menuan meter 12,5 meter.

²⁶El fatu ana hitu an ali neu eno naek nane ma in ke'an naek amsa anbi in amsopun, anbaina neu po'an abit mone Ume UISNENO. Baki lape-baki lape abit nanaf le anbaina neu lan luman nane, anpake noas sin neki hau pet kase malula.

²⁷Anbi nane amsa anmu'i eno naek an ali neu po'an abit nanaf. Atoni nane ansu' eno naek nua en nane anma'lon: meter 50.

²⁸Oke te atoni nane neki kau nao utuin eno naek kabenan a'ne'u tam neu po'an abit nanaf. In ansu' eno naek kabenan a'ne'u nane, ma in su'an nane papmese nok eno naek-eno naek anbi aon bian kotin.

²⁹In ke'an-ke'an paot sin, in ke'an anaek, ma in baki lape sin abit nanaf papmese nok le anbi eno naek bian sin. Ke'an-ke'an anbi eno naek nane amsa anmu'i kun eno kiso. Lan luman eno naek nane amnanun meter 25 ma menuan meter 12,5.

³⁰

³¹Mes in ke'an anaek anbaina neu po'an abit mone. Baki lape sin abit nanaf le anbaina neu lan luman, anpake noas sin neki hau pet kase malula; anmu'i el fatu ana fanu an ali neu eno naek nane.

³²Oke onane te atoni nane neki kau nao utuin eno naek neno saen ma tam a'bi po'an abit nanaf. In ansu' eno naek nane ma in su'an nane papmese onle eno naek bian sin.

³³Ke'an-ke'an paot sin, in baki lape sin abit nanaf ma in ke'an naek in su'an nane papmese onle eno-eno naek sin. Anbi ke'an-ke'an nane ma anbi in ke'an anaek anmu'i eno kiso. Lan luman enok naek nane amnanun meter 25 ma in menuan meter 12,5.

³⁴In eno naek anbaina neu po'an abit mone. Baki lape sin abit nanaf le anbaina neu lan luman nane, anpake noas sin neki hau pet kase malula. El fatu ana fanu an ali neu eno naek nane.

³⁵Amsoput atoni nane neki kau ali neu eno naek kabenan a'li. In ansu' eno naek nane ma in su'an nane papmese onle eno naek bian sin.

³⁶Onane amsa in ke'an-ke'an paot sin, baki lape nanaf sin ma in ke'an anaek papmese onle eno naek bian sin. Anbi in ke'an-ke'an sin ma anbi ke'an anaek anmu'i eno kiso. Lan luman nane in amnanun meter 25 ma in menuan meter 12,5.

³⁷Ke'an anbi matan amsa anbaina neu po'an abit mone. Baki lape sin abit nanaf le anbaina neu lan luman, anpake noas neki hau pet kase malula. Anmu'i al fatu ana fanu an ali neu eno naek nane.

³⁸Anbi po'an abit mone anmu'i ke'an mese anteni anbi eno naek abit nanaf aon bian a'li. Anbi nane anboe ale mu'it he natulu neu fua tulu mnotu.

³⁹Anbi ke'an anaek nane, anmu'i mei ha, nua anbi in aon bian sin. Anbi mei-mei nane anheli ale mu'it neu fua tulu mnotu, ai fua tulu sako sanat ai fua tulu seka lukit.

⁴⁰Anbi mone ke'an naek nane anmu'i anteni mei ha, antao mei nua anbi eno naek nane in bian a'li in aon bian sin.

⁴¹Es nane te, ok-oke mei fanu bale hen heli fua tulu: ha anbi nanaf, ma ha anbi po'an abit mone.

⁴²Mei ha en anbi ke'an mese anteni le anpake he naloitan fua tulu mnotu anto'i na'ko fatu. Mei nane in amnanun senti 50, ma anbi in fafon si'uf ha, amnanun ma menuan es-es te senti 75. Anbi mei nane sin fafon nabelak bale hen heli mu'it fua tulu.

⁴³Mei nane sin ninen menuan milimeter 75. Ale sisi le of he natulu nabelak sin anbi mei nane sin fafon.

⁴⁴Nalali te atoni nane neki kau nao neu po'an abit nanaf. Anbi nane anmu'i lopo nua es anbi eno naek bian a'li aon bian ma anbaina neu kabenan a'ne'u, ma es anteni anbi eno naek bian a'ne'u ma anbaina neu bian a'li.

⁴⁵Atoni namolok neu kau nak lopo le anbaina neu kabenan a'ne'u nane naloitan neu ale Mafefa knino le anmepu anbi Ume UISNENO,

⁴⁶ma lopo le anbaina neu kabenan a'li naloitan neu ale Ana' fuat knino le anmepu anbi baki tulu. Ale Ana' fuat knino nane sin mes he na'ko Nai Zadok in sufan. Natuin na'ko uf Nai Lewi al Nai Zadok in sufan es nabe'i anhake anbi UISNENO In matan hen tuthae In anbi lasi luli besa.

⁴⁷Atoni nane ansu' po'an abit nanaf. In masan humaf ha: amnanun ma menuan es-es te meter 50. Ume UISNENO nane anbi neno tesan, ma anbi in matan anmu'i baki tulu mese.

⁴⁸Nalali te in neki kau neu Ume UISNENO ke'an matan hai amsae mituin el fatu fauk-fauk. In ansu' ke'an he tam: in menuan hitu nok meter 2,5, nok ale klipit anbi in ninen nua sin in mafaun meter 1,5. Anbi a'li ma a'ne'u anmu'i ni fatu abe'it mese. Ke'an mat nane in amnanun meter 10 ma in menuan meter 6.