Read Uab Meto YEHEZKIEL 41 Bible Online

YEHEZKIEL 41 - Uab Meto bible

YEHEZKIEL 41

¹Atoni nane in neki kau neu ke'an atnanan, le antek nak Bale Le Aknino. In ansu' lan luman le an ali neu bale nane: in amnanun meter 3,

²ma in menuan meter 5. Klipit anbi ninen nua sin in mafaun meter 2,5. Oke te in ansu' Bale Le Aknino nane; in amnanun meter 20 ma in menuan meter 10.

³Nalali te in antam neu ke'an nanaf. In ansu' lan luman le an ali neu nane: in amnanun meter 1, in menuan meter 3, ma klipit anbi in ninen nua sin in mafaun meter 3,5.

⁴Oke te in ansu' ke'an nane amsa in masan masi'uf ha, in amnanun ma in menuan es-es te meter 10. Nalali te in namolok neu kau nak, “Le i Bale Le Aknino Le'uf.”

⁵Oke onane te atoni nane ansu' baki lape nanaf na'ko Ume UISNENO: in mafaun meter 3. Anbi baki lape anfun natef Ume UISNENO nane anmu'i ke'an-ke'an le in menuan meter 2.

⁶Ke'an-ke'an nane maktuta tenu ma anbi ktuta mese anmu'i ke'an 30. Baki lape abit mone ktuta mese manihis anesi na'ko baki lape anbi in apinan, talan te ke'an-ke'an nane nabe'i maakatuin sin ma ka nabola' fa baki lape Ume UISNENO nane.

⁷Na'ko mone, baki lape Ume UISNENO nane kisot anmafau papmese na'ko pinan talan te fafon. Anbi baki lape mone na'ko Ume UISNENO, anbi aonbian mone ke'an-ke'an nane, anmu'i el fatu naek nua talan te nabe'i atoni ansae na'ko ktuta pinan neu ktuta nua ma ktuta tenu.

⁸Baki lape mone ke'an-ke'an nane in mafaun meter 2,5. Ume nane anmu'i in eno le an ali neu ke'an-ke'an anbi kabenan a'li Ume UISNENO, ma eno bian le an ali neu ke'an-ke'an anbi kabenan a'ne'u. Anfun natef Ume UISNENO anmu'i bale tokos in menuan meter 2,5; in amnanun na'ko nani meter 3, ma anmo'e sin amnanun papmese nok tu'in ke'an-ke'an anbi baki lape Ume UISNENO. Anbi bale tokos ma ume-ume le Ana' fuat knino anpake sin atnanan, anmu'i bale tokos le kan pake fa klipit in menuan meter 10, anbi a'li ma a'ne'u Ume UISNENO.

¹²Anbi po'an aonbian neno tesan, nafena ume naek mese in amnanun meter 45 ma in menuan meter 35, ma in aklipit sin mafaun meter 2,5.

¹³Atoni nane in ansu' Ume UISNENO in amnanun: meter 50. Na'ko mone Ume UISNENO antia baki lape mone ume naek abit neno tesan nane anma'lon masa meter 50.

¹⁴Aonbian mat na'ko Ume UISNENO le anbaina neu neno saen nok po'an anbi a'li ma a'ne'u, in menuan amsa meter 50.

¹⁵Atoni nane amsa ansu' ume naek le anbaina neu po'an anbi neno tesan: in menuan meter 50, fun ale klipit anbi a'li ma a'ne'u. Ke'an-ke'an anbi Ume UISNENO, ke'an abit mat, Bale Le Aknino, ma Bale Le Aknino Le'uf,

¹⁶anpake noas neki bena na'ko hau, na'ko in tu'in antia in eno kiso sin. Eno kiso nane sin antobe sin neki pilu ekat.

¹⁷Ale klipit abit nanaf anpake noas sin neki ale lulat

¹⁸hau pet kase ma ahake neno, hau pet kase mese nahakeb anbi ahake neno nua sin atnanken. Ahake neno nane in anmu'i humaf nua,

¹⁹es humaf mansian le anbaina neu hau pet kase abit a'ne'u. Anbi Ume UISNENO in nanan anmu'i lulat ok-oke,

²⁰naubon na'ko ume in tu'in talan te eno in fafon.

²¹Ale ni eno na'ko Bale Le Aknino namasbon si'uf ha. Anbi Bale Le Aknino Le'uf matan anmu'i sa' es onle baki tulu na'ko hau.

²²In amnanun meter 1,5 ma in menuan meter 1. In si'uf sin, in kapenin ma in aklipit anmo'e sin na'ko hau. Atoni nane in namolok neu kau nak, “Le i mei le anbi mat leka UISNENO anhake anbine.”

²³Anbi lan luman in amsopun le an ali neu Bale Le Aknino anmu'i eno mese, onane amsa anbi lan luman in amsopun le an ali neu Bale Le Aknino Le'uf.

²⁴Eno-eno nane anmu'i nof nua le natfai anbi atnanan.

²⁵Eno-eno Bale Le Aknino anpake noas neki lulat hau pet kase ma ahake neno sin, onle anbi in aklipit sin. Anbi eno mat in matan anbi aonbian mone anmu'i ekat na'ko hau.

²⁶Anbi klipit nua en nane sin ninen anmu'i eno kiso ma in klipit sin anpake noas hau pet kase malula.