Read Uab Meto YEHEZKIEL 42 Bible Online

YEHEZKIEL 42 - Uab Meto bible

YEHEZKIEL 42

¹Nalali te atoni nane in neki kau neu po'an abit mone ma in antopu kau neu ume anbi bian a'li Ume UISNENO, ka na'lo fa na'ko ume naek anbi aon neno tesan Ume UISNENO nane.

²Ume naek nane in amnanun meter 50, ma in menuan meter 25.

³Ume nane in kabenan bian anbaina neu lopo tokos le kan mu'i fa klipit in menuan meter 10, ma in kabenan bian anbaina neu tu'in fatu anbi po'an abit mone. Ume naek nane maktuta tenu; ktuta mese-mese nabelkon antam na'ko ktuta abit apinan.

⁴Anbi matan ke'an-ke'an nane, anbi nanaf anmu'i lan luman le in menuan meter 5 ma in amnanun meter 50. In eno-eno sin anbaina neu bian a'li.

⁵Ke'an-ke'an anbi ktuta fafon nabau nesi na'ko ke'an-ke'an abit apinan, natuin lan luman sin le anbi ke'an-ke'an abit fafon anmenua nesi na'ko abit apinan.

⁶Ke'an-ke'an nane maktuta tenu ma ni kan tuntaku fa onle anbi ume-ume anbi po'an.

⁷Bian na'ko ktuta pinan, amnanun meter 25 nane baki lape kun, ma anbi in aon bian anteni, le in amnanun meter 25, nafena ke'an-ke'an. Anbi ktuta amsoput anmu'i ke'an-ke'an anbi ume nane.

⁹Anbi pinan na'ko ke'an-ke'an anbi neno saen na'ko ume nane, ma anbi baki lape un, anmu'i eno mese le an ali nao neu po'an abit mone. Anbi aon bian a'ne'u na'ko Ume UISNENO, anmu'i ume le papmese, le ka na'lo fa na'ko ume anbi neno tesan.

¹¹Anbi ke'an-ke'an nane sin matan anmu'i lan luman mese le papmese on lan luman abit bian a'li. In su'an papmese, in masan papmese, ma in eno sin amsa papmese.

¹²Anbi ke'an-ke'an abit apinan anbi bian a'li le abit bian a'ne'u, anbi neno saen baki lape un, anmu'i eno mese amsa.

¹³Atoni nane namolok neu kau nak, “Ume nua en nane knino kun. Anbi bale nane, ale Ana' fuat knino le nabe'i hen hake anbi UISNENO In human In matan, anbukae ale fua tulu le aknino le'uf. Anbi bale nane amsa sin mes he nabela ale fua tulu le knino le'uf, esle': fua tulu ane kase ma fua tulu sako sanat ai fua tulu seka lukit.

¹⁴Leka ale Ana' fuat knino sin anmepu nalali anbi Ume UISNENO, ma he nao neu po'an abit mone, bale pake le anbeti nateta le sin anpake leka sin antuthae lasi knino sin mes namaika anbi ke'an-ke'an nane. Sin mes hen pake bale pake bian, oke onane te sin nabe'i anao neu bale to nabua anbine.”

¹⁵Leka atoni nane ansu' nalali Ume UISNENO abit nanaf, in neki kau poi nao utuin eno naek neno saen, oke te ansu' Ume UISNENO anfun ma natef.

¹⁶In neki in tias le in anpake hen su' in ansu' aon neno saen: meter 250.

¹⁷Nalali te in ansu' aon bian a'li, aon bian a'ne'u, ma aon neno tesan; in kabenan sin amnanun papmese, esle' meter 250.

²⁰Es nane te, bale Ume UISNENO ok-oke si'uf ha, in kabenan sin mese-mese meter 250. Baki lape anfun natef nan afu nane hen beti bale le anbeti nateta neu UISNENO na'ko bale neu to amfaun.