Read Uab Meto YEHEZKIEL 43 Bible Online

YEHEZKIEL 43 - Uab Meto bible

YEHEZKIEL 43

¹Nalali te atoni nane neki kau neu eno naek le anbaina neu neno saen,

²ma anbi nane au it pina nem na'ko neno saen le anfani taka' nak Uisneno atoni Israel anhake anbi nane. Au nen hanaf Uisneno onle slutuf na'ko tasi naek, ma pah pinan nahenu nok meusine natuin Uisneno In apinat nane.

³Lasi mnitas nane papmese onle au it leka Uisneno In nem he nale'un naskuku Yerusalem, ma onle au it anbi Noe Kebar.

⁴Pina alimat nane anao natuin eno naek neno saen oke te antam neu Ume UISNENO in nanan.

⁵Smanan knino UISNENO naiti kau ma neki kau neu po'an abit nanaf, anbi nane au it Ume UISNENO nahenu nok pina alimat natuin UISNENO anhake anbi nane.

⁶Leka atoni nane fe anhake anbi au aok bian, au nen UISNENO nakua In a'an neu kau na'ko Ume UISNENO in nanan, nak,

⁷“Hoi mansian amates, le i Au toko'. Anbi bale i of Au utua anbi Au to Israel sin atnanken ma Au uplenat sin talan te nabal-bal. Leko neu sin, ma sin kesel sin, sin of ka nalahi anteni fa Au kanak knino nane natuin naluli nabes neu fatu le'u ma hau le'u ai sin ansub sin kesel sin aon nitu anbi bale i.

⁸Afi ahunut sin kesel sin anmo'e suta'i ma sin ni eno sonaf anmahaumak nok suta'i ma ni na'ko Au Ume, talan te al anmu'i klipit mese anbi nane. Sin nalahi nalali Au kanak aknino nane neki sin taos mo'et le neki hainisit. Es nane te Au ule'un sin anbi Au to'as.

⁹Mes naubon na'ko tabu le i sin mes he nasnas na'ko naluli ma nabes neu fatu le'u ma hau le'u ma natnanib sin kesel sin aon nitu. Oke onane te, of Au utua anbi sin atnanken talan te nabal-bal.”

¹⁰Oke te UISNENO nakua In a'an anteni nak, “Hoi mansian amates, muton neu to Israel antom Au Ume i, ma amlelu sin hen tae anteni sin salit. Amoe sin he nati' sin anmae natuin ale sin sanat sin.

¹¹Ma leka sin anmae natuin sin taos mo'et sin, mutonan sin neu salit Au Ume le i neu sin: in masan, eno-eno he tam, eno-eno neu het poi, neu he nafena, ale lekat lulut ma in plenat-plenat sin. Amtui ale nane ok-oke neu sin he nati' nabe'i sin nit ma anpanat ale sa' ok-oke, ma natuin ale in lekat lulut sin.

¹²Ume UISNENO in taon in mo'en esle' i: Ale pah le anfun natef nan in anbi tubu tunan nane knino le'uf kun.”

¹³Le i su'at baki tulu natuin su'at le anpake hen su' Ume UISNENO. Anfun natef baki tulu in haen anmu'i nifu mese le in amnanun nekin sanu senti 50 ma in menuan senti 50 amsa, ma in ninen abit kotin in amnanun senti 75.

¹⁴Na'ko nifu antia baki fuat in nupun in amnanun meter 1. In amnanun meter 2, ma in nabau nesi senti 50 na'ko baki fuat in haen anfun natef. Pa' tenu, esle' baki tulu fafon nabau nesi senti 50.

¹⁵Pa' tenu le i nane bale he notu fua tulu; in amnanun meter 2. Anbi in si'uf ha sin anmu'i le naaik onle sunaf.

¹⁶Baki tulu in fafon nane anmoe si'uf ha; kabenan mese-mese in amnanun meter 6.

¹⁷Anbi in atnanan nane amsa si'uf ha, kabenan mese-mese in amnanun meter 7, in ninef mese anbi kotin le in amnanun senti 25. (Nifu nane in menuan senti 50.) Anbi kabenan neno saen anmu'i el fatu hen sae neu baki tulu in fafon.

¹⁸UISNENO Anesit Afinit nakua In a'an neu kau nak, “Hoi mansian amates, amnen sa' le Au he uton neu ko. Leka ho mufena mulali baki tulu nane, ho mes mumepan in esle' motu fua tulu anbi in fafon ma amlisin na' fua tulu neune.

¹⁹Al Ana' fuat knino Nai Zadok in sufan na'ko uf Lewi nabe'i nem neu Au humak Au matak he nati' nanaoba lasi luli besa. Au, UISNENO Anesit Afinit Au es a'fe plenat neu lasi nane. Amfe neu sin bijae keso tipu mese neu fua tulu sako sanat.

²⁰Maiti in na' akle'o ma amnose neu sunaf-sunaf anbi baki tulu nane in si'uf ha sin, onane amsa neu si'uf-si'uf abit atnanan ma neu baki tulu in ninen anfun natef. Nok lasi nane ho muknino baki fua tulu nane ma muteta in neu Kau.

²¹Nalali te, maiti bijae keso mese neu tulu sako sanat nane, mo motu anbi bale le anlek nalali, esle' anbi mone bale knino Ume UISNENO.

²²Noka fa ho mes mutulu amteni bibi keso mese le kan mu'i fa in amle'un neu fua tulu sako sanat. Muknino baki tulu nane meki bibi nane in na', papmese onle ho mo'e nok bijae keso tipu nane.

²³Leka ho munaoba mulali sin, maiti man bijae keso tipu mese ma bibi kase tipu mese, nua sin le kan mu'i fa in amle'un,

²⁴oke te meki sin neu Kau. Ale Ana' fuat knino sin of hen kaki masi neu mu'it nua en nane ma motu sin anfani fua tulu neu Kau.

²⁵Anbi klei mese in nanan, anbi neno mese-mese, ho mes mutulu bibi mese, bijae tipu mese, ma bibi keso mese neu fua tulu sako sanat. Mu'it-mu'it nane ka nabe'i fa hen mu'i in amle'un.

²⁶Neno hitu in a'lon ale Ana' fuat knino mes hen mo'e luli besa namepan baki tulu nane ma naloitan he nati' nabe'i anpake.

²⁷Leka neno hitu nane namsopu, ale Ana' fuat knino mes sin natulu fua tulu anbi baki tulu nane in fafon neki fua tulu mnotu ma fua tulu halan antom neu to. Of Au malin antom neu ki. Au, UISNENO Anesit Afinit ukua ulali Au a'ak.”