Read Uab Meto YEHEZKIEL 46 Bible Online

YEHEZKIEL 46 - Uab Meto bible

YEHEZKIEL 46

¹UISNENO Anesit Afinit nakua In a'an nak, “Eno naek neno saen le an ali nao neu po'an abit nanaf mes maeka piut anbi Neno mepu neno ne in a'lon. Eno naek nane al nabe'i mafai anbi neno Snasat ma neno Naliatas Funan Fe'u.

²Anbi neno-neno nane akuasat le nanaoba plenat mes antam na'ko po'an abit mone nao natuin ke'an anaek oke te anhake anbi ni eno naek in aon bian, anbi tabu ale Ana' fuat knino sin natulu fua tulu mnotu ma fua tulu halan na'ko akuasat le nanaoba plenat. Anbi eno naek nane in mes hen li'tu ma naluli nabes neu UISNENO, oke te anao. Leka neno anmabe, eno naek nane ka nabe'i fa he maeka.

³Anbi eno naek matan amsa, to ok-oke mes anli'tu naluli ma nabes neu UISNENO anbi Neno Snasat ma neno Naliatas Funan Fe'u.

⁴Anbi Neno Snasat akuasat le nanaoba plenat mes natulu neu UISNENO fua tulu mnotu le nane na'ko bibi kase ana ne ma bibi kase keso mese, ok-oke kan mu'i fa in amle'un.

⁵Nok bibi kase keso nane mes natulu amsa fua tulu ane kase liter 17,5, ma nok bibi kase ana mese-mese, mes natulu fua tulu ane kase amfaun onle in anlomi. Ale fua tulu ane kase mese-mese mes natulu nok fua tulu mina bub fua mina liter 3.

⁶Anbi neno Naliatas Funan Fe'u fua tulu nane mes namasbon anbi tulu bijae keso mese, bibi kase ana ne, ma bibi kase keso mese, al-al sin kan mu'i fa in amle'un.

⁷Nok bijae keso mese-mese ma bibi keso, in mes he natulu ane kase liter 17,5, ma nok bibi kase ana mese-mese, in amfaun natuin kun in lomin. Fua tulu ane kase mese-mese mes nok fua tulu mina bub fua mina liter 3.

⁸Leka akuasat le nanaoba plenat he naluli ma nabes anbi Au Ume, in mes hen tam natuin ke'an anaek, ma neki anfani amsa anao nok lanan nane.

⁹Mes, leka anbi neno-neno naek to sin nem he naluli ma nabes neu UISNENO, sin le antam nok eno naek kabenan a'li, leka sin neki anfani sin mes he nao nok eno naek kabenan a'ne'u leka sin naluli ma nabes nalali. Ma sin le antam nok eno naek kabenan a'ne'u, leka sin he neki anfani sin mes he nao nok eno naek kabenan a'li. Ampenan atoni-atoni sin he kais sin neki anfani anao nok lanan le sin antam nokan; sin mes he neki anfani nao nok eno naek le anbi aon bian.

¹⁰Akuasat le nanaoba plenat mes antam neu Ume UISNENO nao nabua nok to ma leka neki anfani amsa mes anao nabua nok sin amsa.

¹¹Anbi neno-neno fesat ma he naliatas neno naek, nok bijae keso mese-mese ma bibi kase keso mese-mese mes natulu ane kase liter 17,5, ma nok bibi kase ana mese-mese, in amfaun al natuin kun atoni le naluli ma nabes in lomin. Fua tulu ane kase mese-mese mes natulu nok mina bub fua mina liter 3.

¹²Leka akuasat le nanaoba plenat anlomi hen fe fua tulu natuin in nek lomit kun, leko fua tulu mnotu ai fua tulu halan, onane te eno naek neno saen le an ali nao neu po'an abit nanaf mes amfai neu in. In mes natulu fua tulu nane nok taos mo'et papmese onle nanaoba anbi Neno Snasat, mes oke na'ko nane in mes he neki anfani, eno naek nane mes hen ek anteni.”

¹³UISNENO nakua In a'an nak, “Neno-neno anbi nok-noka so ho mutulu neu UISNENO bibi kase ana ton mese le kan mu'i fa in amle'un.

¹⁴Naik na'ko nane, nok-noka piut-piut mes mutulu amsa ane kase kilogram nua ma mina bub fua mina liter mese le amselo nok ane kase nane. Nane fua tulu ane kase le neno-neno mes natulu neu UISNENO; lekat lulut nane nanaobon talan te nabal-bal.

¹⁵Nok-noka piut-piut, mes natulu piut neu UISNENO: bibi kase ana mese, fua tulu ane kase ma fua tulu mina bub fua mina.”

¹⁶UISNENO Anesit Afinit anfe plenat, nak, “Leka akuasat le nanaoba plenat in anfe nani pisa mese na'ko in nani neu in anmone mese, nani nane anfani in anmone in-ini ma anfani maus neu asal nonot.

¹⁷Mes leka akuasat nane anfe nani pisa mese na'ko in nani neu in ate mese, nani nane of akuasat nane in napeni nafani anbi Ton Anfe Nafani. Nani nane anfani in-ini kun ma al in nok in anmone sin nabe'i sin anmu'i nani nane piut.

¹⁸Akuasat le nanaoba plenat nane ka nabe'i fa he naiti akle'o amsa na'ko in to maus. Al in nani kun es nabe'i anfe neu in anmone sin talan te ka nabe'i fa atoni mese na'ko Au to anbati na'ko ini mu'in ma na'ko sa' le ini kun.”

¹⁹Nalali te atoni nane in neki kau nao utuin eno abit eno naek in aon bian, anao neu ke'an-ke'an knino le anbaina neu kabenan a'li. Ke'an-ke'an nane naloitan sin neu ale Ana' fuat knino. Atoni nane anlek neu ke'an aon bian neno tesan in amsopun,

²⁰ma namolok nak, “Anbi bale i ale Ana' fuat knino mes sin nahan fua tulu sako sanat ma fua tulu seka lukit ma anse'i fua tulu ane kase, he nati' akle'o amsa na'ko fua tulu knino nane ka neki fa neu po'an abit mone talan te nale'un to.”

²¹Nalali te in neki kau neu po'an abit mone ma naklile neu kau nak anbi in si'uf ha sin, mese-mese te anmu'i kun po'an le nabau, in amnanun meter 20 ma in menuan meter 15.

²³Po'an nane mese-mese te anfun natef nan nok baki lape fatu, ma anbi baki lape nane anmu'i tunaf-tunaf.

²⁴Atoni nane namolok neu kau nak, “Le i ume hana-ume hana bale atuthaes-atuthaes abit Ume UISNENO sin nahan ale fua tulu le to natulu ma natnat.”