Read Uab Meto YEHEZKIEL 47 Bible Online

YEHEZKIEL 47 - Uab Meto bible

YEHEZKIEL 47

¹Atoni nane in neki kau nao fani neu eno he tam neu Ume UISNENO. Au it oe ansai na'ko eno nane in a'pinan nao neu neno saen, onle Ume UISNENO anbaina neu neno saen. Oe nane ansai na'ko eno in a'telin abit a'pinan Ume UISNENO kabenan a'ne'u anao nok baki tulu in aon bian a'ne'u.

²Nalali te atoni nane in neki kau poi nao utuin eno naek kabenan a'li ma antopu kau neu eno naek neno saen. Noe ana nane ansai na'ko aon bian a'ne'u eno naek nane.

³In anao nok te ansu' neki tias le in anpake hen su', atoni nane in neki kau utuin noe in a sain nane anao neu neno saen a'lon meter 500, oke te anlelu kau he au lak. Anbi bale nane oe al anbi haek fenun fuan.

⁴Nalali te in ansu' anteni meter 500, ma anbi nane oe antia tuk. In ansu' ateni meter 500, ma oe antia atnanak.

⁵Hae es anteni in ansu' meter 500 a'lon, ma anbi nane amnaun le'uf het nao hae tokan. Leka atoni hen lak mes in he nabha'es.

⁶Oke te atoni nane namolok neu kau nak, “Hoi mansian amates, ampanat lasi leko-leko.” Nalali te in neki kau nao fani utuin noe,

⁷ma au it nak anbi noe nane in ninen nua sin anmu'i hau amfau le'uf.

⁸In namolok neu kau nak, “Noe le i ansai neu neno saen anao natuin pah i ma anao natuin Nonof Noe Yordan anao neu Tasi Maten. Leka in oe antia Tasi Maten, oe tasi le oe nane min mali in anseka neki oe aminat.

⁹Noe nane in hen sai neu me amsa, anbi nane amsa of anmu'i ale ika ma mu'it bian. Oe Tasi Maten of in anmo'e anfani oe aminat, ma oe nane in hen sai neu me amsa anbi nane mes anmu'i amonit.

¹⁰Na'ko oe mata-oe mata anbi En-Gedi talan te oe mata-oe mata anbi En-Eglaim, in ninen sin of atifkai ika amfau le'uf le anhoi sin tifkai anbi nane. Ale kanan ika of anmu'i anbi oe nane, onle anmu'i anbi Tasi Tnana.

¹¹Mes oe le nataek ma hau anmoni anbi tasi nane in ninen of in oe ka namin fa, mes in anfani bale uf le napoitan masi.

¹²Anbi noe nane in ninen nua sin ale kanan hau afuat anmoni anbine. Hau nane in non kan maknene nit fa, ma in nafua ka natfek nahin fa. Ale hau nane of napoitan fuan fe'u piut anbi funan-funan, natuin oe le ansai neune ansai na'ko Ume UISNENO. In fuan anfani bukae ma in non maota anfani le'u ma malo.”

¹³UISNENO Alatan Amnanut nakua In a'an nak, “Le i nani in nakat sin le of anbati neu to Israel uf bo'es am nua. Uf Nai Yusuf ansimo pa' nua.

¹⁴Au sup ulali ak nani nane of Au fe ani neu hi na'i hi be'i sin. Es nane te maiti nai nani nane ma ambati nok amneot anbi hi al-al ki.

¹⁵Nakat anbi kabenan a'li anfatan na'ko Tasi Tnana anao neu neno saen talan te kot Hetlon, anao neu Hamat, anao piut neu kot Zedad,

¹⁶anao neu Berota ma Sibraim (kot-kot nane anbi kot Damsyik ma kot Hamat sin atnanan), nalali te anao neu kot Hazar-Enan, anbi nakat kot Hauran.

¹⁷Es nane te, nakat anbi kabenan a'li anfatan na'ko Tasi Tnana ante neno saen, anao neu kot Hazar-Enan; onane te pah Damsyik ma Hamat sin anbi aon bian a'li nakat nane.

¹⁸Nakat anbi aon neno saen anao neu kabenan a'ne'u na'ko bale mese anbi pah Damsyik ma pah Hauran sin atnanan. Es nane te Noe Yordan anfani nakat na'ko pah Israel neno tesan ma Gilead anbi aon neno saen sin atnanan, talan te nao neu Tamar anbi Tasi Maten in ninen.

¹⁹Nakat anbi kabenan a'ne'u anao neu neno tesan in aon bian fafon, na'ko Tamar anao neu oe mata Kades-Meriba, oke te anao neu neno tesan aon bian a'pinan nakat nok Mesir talan te Tasi Tnana.

²⁰Nakat anbi neno tesan nane nok Tasi Tnana, oke te anao neu kabenan a'li anao neu bale mese anbi kabenan neno tesan lanan antam neu Hamat.

²¹Ambati nani nane anbi hi al-al ki, natuin uf-uf to Israel;

²²ma nani nane hi ini kun talan te nabal-bal. Atoni-atoni anao amnemat le natua nabalah anbi hi sonam hi atnanam, ma sin anmu'i anah le nahonis sin anbi nane, sin amsa mes napeni pa' na'ko nani nane. Mes amkiso sin on to namneo na'ko to Israel, ma mes sin anhel sulat he napeni nani anbi tabu leka him bati nani nane anbi uf-uf Israel.

²³To anaot amnemat mese-mese mes amfe neu sin nani nok uf Israel anbi me in natua anbine. Au, UISNENO Alatan Amnanut ukua ulali Au a'ak.”