Read Uab Meto YEHEZKIEL 48 Bible Online

YEHEZKIEL 48 - Uab Meto bible

YEHEZKIEL 48

¹Nani in nakat anbi kabenan a'li namnanubon anao neu neno saen, naubon na'ko Tasi Tnana anao neu kot Hetlon, lanan antam neu Hamat, kot Hazar-Enan, talan te nakat anbi kot Damsyik ma kot Hamat sin atnanan. Uf-uf maakatuin i es-es mes napeni pa' mese na'ko nani le anmenua na'ko nakat neno saen anao neu neno tesan talan te Tasi Tnana, anmakatuin on i na'ko bian a'li anao neu bian a'ne'u: Dan Asyer Naftali Manasye Efraim Ruben Yehuda

⁸Pa' bian na'ko nani nane mes ambeti miteta neu hem pake anbi salit le a teta kun. In amnanun mes kilometer 12,5 ma na'ko nakat bian a'li talan te anao neu bian a'ne'u. Nakat-nakat neno saen ma neno tesan mes sin amnanun papmese nok pa' bian le anfe neu uf-uf Israel. Ume UISNENO of nahakeb anbi bale nane.

⁹Bian na'ko bale nane ambeti miteta neu UISNENO, esle' nani pisa mese anbi bale nane in atnanan, in amnanun kilometer 12,5 ma in menuan kilometer 10.

¹⁰Anbi nani nane in atnanan of nahakeb Ume UISNENO. Ale Ana' fuat knino sin mes napeni pa' na'ko bale le aknino nane. Sin pa' esle' kilometer 12,5 na'ko neno saen anao neu neno tesan, ma kilometer 5 na'ko bian a'li anao neu bian a'ne'u.

¹¹Bale le anbeti nateta nane of anfani ale Ana' Fuat Knino Nai Zadok in sufan. Sin antuthae nalali UISNENO nok nek aki'at ma ka onfe atoni Lewi le sin uf mese, le antam nok anmo'e sanat nok atoni-atoni Israel bian sin.

¹²Es nane te neu Nai Zadok in sufan nane mes amfe neu sin nani le ambeti miteta naik na'ko nani le of amfe neu atoni Lewi. Ma nani mabeti nane in aknino le'uf kun.

¹³Nani atoni-atoni Lewi nane in amnanun kilometer 12,5, na'ko neno saen anao neu neno tesan, ma in menuan kilometer 5 na'ko bian a'li anao neu bian a'ne'u ma in naketi nok nani ale Ana' fuat knino.

¹⁴Lakat mese amsa na'ko nani nane ka nabe'i fa he sin nasosa ai sin natuki; nani le leok le'uf na'ko nani to Israel ka nabe'i fa he natnani neu nimaf atoni bian, natuin nani nane anbeti nateta nalali neu UISNENO ma In anfani in-ini kun.

¹⁵Anbi aon bian a'ne'u na'ko nani mabeti nane, fe anmu'i in nesin le in amnanun kilometer 12,5, ma in menuan kilometer 2,5. Nani nane ka knino fa ma to nabe'i anpake neu bale he natua ma neu mnela hun, anbi in atnanan mes mifena kot mese.

¹⁶Kot nane mes so si'uf ha, si'uf mese te masu'ak kilometer 2,1/4.

¹⁷Anfun natef kot nane mes anmu'i mnela le in menuan meter 125.

¹⁸Anbi kot nane aon neno saen ma neno tesan anmu'i mnela le es-es te masu'ak kilometer 5 nok kilometer 2,5. Mnela nua en nane mes to abit kot anpake on nani neu mepu lene.

¹⁹Atoni-atoni na'ko ale uf Israel le sin natua kot nane nabe'i sin anmepu nani nane.

²⁰Es nane te, bale nane ok-oke, fun nani le anbeti nateta ma nani neu kot, namas on si'uf ha masu'ak kilometer 12,5 anbi in aon bian mese-mese.

²¹Nani anbi neno tesan ma anbi neno saen na'ko bale le anbeti nateta naloitan neu Ume UISNENO, ale Ana' fuat knino na'ko, atoni Lewi na'ko kot nane, nane neu akuasat le nanaoba plenat. Anbi aon neno saen nani nane anmenua antia nakat neno saen, ma anbi aon neno tesan antia Tasi Tnana, ma le anbi pah Yehuda ma pah Benyamin sin atnanan.

²³Nani le anbi aon bian a'ne'u na'ko bale le anbeti nateta nane, nane neu uf-uf bian sin. Nani nane in menuan naubon na'ko nakat neno saen anao neu neno tesan antia Tasi Tnana, ma anbeti natuin lekat lulut i na'ko bian a'li, anao neu bian a'ne'u: Benyamin Simeon Isakhar Zebulon Gad

²⁸Anbi aon bian a'ne'u Nai Gad in nani anmu'i nakat le naubon na'ko neno tesan anbi fafon na'ko Tamar anao nok oe mata Kades-Meriba, oke te anao neu neno tesan abit fafon nakat nok Mesir talan te Tasi Tnana.

²⁹UISNENO Alatan Amnanut nakua In a'an nak, “Onane nani nane mes anbati neu uf-uf Israel.”

³⁰Eno he tam teu kot Yerusalem al-al sin bo'es am nua. In baki lape ha sin es-es te in masu'ak kilometer 2 1/4, ma anmu'i eno naek tenu. Eno naek mese-mese nakanab natuin kanaf na'ko uf Israel mese. Eno naek-eno naek anbi bian a'li nakanab nak Ruben, Yehuda ma Lewi; eno naek-eno naek abit baki lape neno saen nakanab nak Yusuf, Benyamin, ma Dan; le anbi baki lape bian a'ne'u nakanab nak Simeon, Isakhar ma Zebulon; ma le anbi baki lape neno tesan nakanab nak Gad, Asyer, ma Naftali.

³⁵Baki lape nane ok-oke in amnanun kilometer 9. Ma naubon na'ko tabu le i atoni nakanab kot nane nak: “UISNENO IN ES BALE NANE!”