Read Uab Meto YEHEZKIEL 5 Bible Online

YEHEZKIEL 5 - Uab Meto bible

YEHEZKIEL 5

¹UISNENO nakua In a'an nak, “Hoi mansian amates, maiti suni a'aikat ma ampake hem eu mani ho konom ma ho nakam funun. Nalali te amtai ho nakam funun nane ma ambati pa' tenu.

²Batis pa' tenu es ho motu anbi kot nane in atnanan leka kot nane anfun natef nalali. Batis pa' tenu es anteni amnepat sin neu ho suni ma amfun mutef kot nane. Ma batis pa' tenu amsoput nati' hom kifun sin neu neno atnanan, oke te Au li'u utuin eki Au suni.

³Muhena akle'o na'ko nakam funun nane ma am amu sin anbi ho sobalu betkone in li'an.

⁴Nalali te maiti man akle'o anteni na'ko ho nakam funun nane, ampolin mutam neu ai nanan ma mautu hen putu nani ok-oke. Na'ko nane ai of anlaba anfun natef Israel.”

⁵UISNENO Anesit Afinit nakua In a'an nak, “Amkiso nai, Yerusalem esle' i. Kot le i Au tao ani anbi pah pinan in atnanan ma ale pah anfun natef nan in.

⁶Mes Yerusalem antite nalali Au plenat sin ma namneo in maufinun anesin uf-uf bian, ma in ka natuin anesi na'ko pah-pah le anfun netef nan in. Yerusalem antanhai Au plenat-plenat sin ma ka natuin fa Au lekat lulut sin.”

⁷UISNENO Anesit Afinit nakua In a'an nak, “Hoi Yerusalem, amnen nai! Ho ka mutuin fa Au plenat-plenat sin ma Au lekat lulut sin; ho munak fatu amnesi na'ko uf-uf le anfun natef nan ko, ma ho mutuin mulali pah-pah nane sin halat.

⁸Es nane te Au, UISNENO Anesit Afinit, Au uton ak hi musu es Kau. Of Au kas ki anbi ale uf bian sin human sin matan.

⁹Natuin ale hi taos hi mo'et le Au ka lomi ani fa, hi to sin of Au kas sin nok matani le Au fe ka mo'e it fa onane ma of Au ka mo'e teni fa.

¹⁰Mnasi of anbukae sin anah sin ma sin anhen of anbukae sin amfen. Onle nane of Au kas sin, ma le fe anmoni of Au usana sin neu ale pah in heun.

¹¹Au Uisneno amonit Kau, UISNENO Anesit Afinit, ma Au a'ak esle' i: Natuin ho mule'un mulali Au Ume meki ale ho taos ho mo'et amle'ut ma le neki mainisit nane, of Au uskuku ule'un ko ma ka nek umnau ko fa.

¹²Batis tenu na'ko ho to sin of anmate natuin menas amle'ut ma amnahas le nem neu kot. Batis tenu na'ko ho to sin anteni of anlolo sin neki suni anbi kot kotin, ma batis tenu amsoput anteni of Au usana sin neu ale pah in heun ma of Au li'u sin piut eki suni.

¹³Of hom naben Au to'as in matanin ma Au maunu talan te Au lomik nanokbon. Leka ale nane anbol nalali, of ho muteb mak Au, UISNENO Kau, ukua ulali Au a'ak neu ko natuin Au uto' neu ho ka mu'ki meu Kau fa.

¹⁴Ho of amfani fatu tutnae kun ma uf-uf le anfun natef ko of sin nasi'ut ko; ale atoni le anao nok nane of sin na'lo na'ko ko.

¹⁵Leka Au uto' ma Au eku nisik neu ko ma Au kas ko, ale uf le anfun natef ko of sin naben namtau. Sin of na'akan ko te nekan anle'u.

¹⁶Of Au ule'un hom mnahat le ho muloitan sin ma ufetin ho to sin namnahan. Sin of anaben amnahas in mafenan, onle as'anef aikan antam ma anpoi ankono ma nale'un ko.

¹⁷Naik na'ko lasi amnahas of Au fe nem neu ki lasi menas anaek, lasi mafena ma makenat he namate ho to, ma mu'it-mu'it abulalut he namate sin anah sin. Au, UISNENO Kau, ukua ulali Au a'ak.”