Read Uab Meto YEHEZKIEL 6 Bible Online

YEHEZKIEL 6 - Uab Meto bible

YEHEZKIEL 6

¹UISNENO nakua In a'an neu kau nak,

²“Hoi mansian amates, amkiso nai neu tubu-tubu Israel, ma mutiaba Au han ba'an neu lasi kasat antom neu sin.

³Amlelu sin he sin nen ma natnin ma anpanat sa' le Au, UISNENO Anesit Afinit uton neu tubu-tubu nane, ma neu ale neten-neten sin amsa, bnapaf-bnapaf sin ma nonof-nonof sin. Namneo, of Au sonu suni he nale'un bale luli besa neu hau le'u ma fatu le'u.

⁴Sin baki tulu sin of natselab nani sin ma Au upe' ale bale mnotu atu fomeni sin. Ale atoni anbi nane of namate sin ok-oke anbi sin uisneno teta sin human sin matan.

⁵Of Au usitab ma usana atoni Israel sin aon nitu; ma sin nuifen of Au usana sin anhaumak ale baki tulu nane.

⁶Ale kot Israel of Au ule'un ani sin, ale sin baki tulu ma sin uisneno teta of Au uskuku ule'un sin, bale mnotu atu fomeni of Au usitab ani sin, ma ale sa' le sin anmo'e of namneku ok-oke.

⁷Anbi me-me of anmu'i atoni le malolo, ma fauk-fauk le nafetnok na'ko malolot nane sin of nahin nak Au le i UISNENO Kau.

⁸Fauk-fauk akle'o na'ko sin of Au ufetin na'ko malolot nane mes of Au usitab sin ma usana sin anbi ale uf-uf;

⁹anbi nane of sin anmoni anbi bale mapolin. Oke te of sin namnau Kau ma sin nahin nak Au kas sin ma usi'ut sin natuin sin nekan ka na'ki fa neu Kau. Sin nasaitan nalali Kau ma sin anbeti uisneno teta anseka Kau. Oke te of sin manisin sin aoken natuin ale sin lasi amle'ut ma sin lasi manisit le sin anmo'e nalali.

¹⁰Es nane te of sin nahin nak Au le i UISNENO Kau ma nak ale lasi mnauba le Au utiaba neu sin nane ka al fa nahenu nok ale lasi salit luman.”

¹¹UISNENO Anesit Afinit nakua In a'an nak, “Misusbom nai! Amkulu nai! Amkae nai nok nek susal natuin ale hi lasi amle'ut ma hi lasi manisit le atoni Israel antao ma anmo'e nalali. Sin of anmate natuin lasi makenat, lasi amnahas ma lasi menas.

¹²Sin al sin of anaben nahin Au to'as ma Au maunu. Atoni-atoni le sin nalo' anbi bale mapolin of sin anmofu menas oke sin anmate; le ahaumakat sin of sin anmate anbi makenat, ma sin nesin nane of sin anmate natuin amnahas.

¹³Sin aon nitu sin of nasan'ok anbi hau le'u ma fatu le'u sin sonan sin atnanan ma anhaumak baki tulu sin, anmate anpolinon anbi ale neten amnanut sin, ma anbi ale tubu sin tunken, ma anbi hau no amatek sin nupun, ma anbi ale hau naek sin; fun anbi bale me le sin notu fua tulu neu sin uisneno teta. Es nane te ale atoni of sin nahin nak Au le i Au UISNENO Kau.

¹⁴Namneo, of Au aiti Au nukuk ma Au ule'un uskuku sin pah, talan te tena maten, na'ko mnela hufui bian a'ne'u talan te kot Ribla anbi aon bian a'li. Na'ko bale-bale le atoni Israel sin natua, of katit fa es amsa le he napeni honis. Es nane te ale atoni of sin nahin nak Au le i Au UISNENO Kau.”