Read Uab Meto YEHEZKIEL 7 Bible Online

YEHEZKIEL 7 - Uab Meto bible

YEHEZKIEL 7

¹UISNENO nakua In a'an neu kau nak,

²“Hoi mansian amates, Au, UISNENO Anesit Afinit Kau, Au he uton lasi i neu pah Israel. Le i lasi nu'un amsoput ok-oke pah le i!”

³UISNENO nakua In a'an nak, “Hoi Israel, ho neno amsoput antia nalalien. Of hom naben Au to'as. Au ufek lasi neu ko anmatom nok ho taos ho mo'et manisit nane.

⁴Of Au ka nek umnau ko fa ai ka sako fa ho sanat sin. Of Au kas ko anmatom nok ale ho taos ho mo'et manisit nane. Es nane te ho muhin nak Au le i Au UISNENO Kau.”

⁵I lasi le UISNENO Anesit Afinit naton neu atoni Israel, “Lasi le'uf anmasenu ma anmaseka of antoman ki.

⁶Tabu le i ale sa' ok-oke namsopu nalalien. Ho lasi amsopun esle' i. Kan mu'i fa panet ma afnekan neu ko.

⁷Ale sa' ok-oke namsopu nalali neu ko, hoi uf le hi mitua ambi pah le i. Tabu le i kan mu'i anteni fa ale fesat anbi ale baki tulu anbi tubu sin, le anmu'i al lasi taisibu.

⁸Ka lo fa anteni of him naben Au to'as le maputu le'uf. Au ufek hi lasi anmatom nok hi taos hi mo'et. Of Au seunbanin neu ki ale hi taos hi mo'et le neki manisit.

⁹Of Au ka nek umnau ki fa ai ka sako fa hi sanat sin. Of Au kas ki anmatom nok hi taos hi mo'et amanisit le him tao ma mo'e milali. Onane te hi mihin nak Au le i UISNENO Kau ma Au es a'kas ki.”

¹⁰Neno amle'ut neu nonot Israel antia nalalien. Lasi maufinu anbol anbi me-me. Lasi moko' ansae antia nalali in heun.

¹¹Lasi maufinu napoitan lasi amle'ut amfau le'uf. Ale mu'if, apinat ma sin lasi alekot of oke ma katit fa le he nabalah.

¹²In neno of nem labah, in neno anhaumaken! Asosat ma le nasosa of sin ka nis fa sa'-sa', natuin kasat Uisneno of ansanu nem neu ale atoni ok-oke.

¹³Atoni le nasosa of ka napeni nafani fa sa' le in nasosa, natuin to'as Uisneno antoman es am es. Atoni amle'ut of ka napeni fa honis.

¹⁴To'is nahan ma ale atoni sin naloitan ma nabalbok. Mes katit fa esle' he nao neu bale makenat, natuin to'as Uisneno nem neu ale atoni.

¹⁵Anbi lanan-lanan kot nanan anmu'i makenat, anbi ume-ume anmu'i menas ma amnahas. Sekau am sekau le anbi kot kotin of sin anmate anbi makenat, ma le natua anbi kot in nanan of sin anmate natuin menas ma amnahas.

¹⁶Bian of nafetnon ma sin naenan neu tubu tunan. Anbi nane sin of onle kolo umu le anli'u sin na'ko nonof-nonof; sin of nanoi natuin sin sanat-sanat kun.

¹⁷Atoni mese-mese of sin nimken an olen ma sin tuken of anlilitai.

¹⁸Sin of anpake klo'e kalo ma sin aoken ok-oke of anlilitai. Sin nakan of an eu monas ok-oke ma of namaeba sin.

¹⁹Noni mnatu ma noni muti of sin anpolin anbi lanan on aknutu, natuin anbi neno UISNENO anpolin In to'as, noni mnatu ma noni muti nane ka nafetin fa sin, mes nane natam sin anbi sanat in nanan. Sin kan pake fa sin neu he nanokab sin sinmakat amle'ut he natua sin taiken.

²⁰Afi ahunut sin namlil natuin sin fatu klima mate molo amasat, mes natuin sin anpake hen mo'e uisneno teta amanisit, UISNENO anmo'e sin amaus nane anfani on sa' le neki lasi amtaus.

²¹UISNENO nakua In a'an neu to Israel nak, “Of Au ufetin atoni anao amnemat sin he nati' nasik nan ki. Amaufinut sin of nasik nan hi maus sin ma nalahi nani sin.

²²Of Au ka selo ok fa leka sin nale'un Au Ume ma asikat-asikat sin nale'un nani.

²³Taisibu of anbol anbi pah nanan ok-oke; malolot anbol anbi me-me ma lasi amle'ut.

²⁴Uf-uf le abulalut bainesi of Au sonu sin nem hen toko hi ume-ume sin. Ale hi meo pa'e sin of anlilitai leka Au ufetin uf-uf nane he nale'un naskuku hi bale luli besa sin.

²⁵Lasi susal ma lasi mtaus of nem neu sin, oke te sin nami lasi honis, mes sin ka natef nokan fa.

²⁶Lasi amle'ut ma beno amle'ut of nem neu sin piut-piut. Of him toti ale Mafefa knino sin he naton neu ki, mes of sin ka nabe'in fa. Ma ale ana' fuat sin kan mu'in fa sa'-sa' he nati' sin nanoina nonot, ma ale ana' aplenat sin nalalin fainekat.

²⁷Kesel of ankae ma ankulu; naimnuke le hen seka kesel of namtau ma to of namtau ma anlilitai. Of Au kas ki namnes nok ale hi taos hi mo'et ma of Au lefi hi lasi onle him lefi lasi neu atoni bian. Nok nane te hi mihin nak Au lei UISNENO Kau.”