Read Uab Meto YEHEZKIEL 8 Bible Online

YEHEZKIEL 8 - Uab Meto bible

YEHEZKIEL 8

¹Anbi fun nima antam neno nim anbi ton ne in nanan leka hai mapolin kai, ale atomatas atoni-atoni mapolin Yehuda sin nem neu kau ma sin antoko nok kau. Nok askeken UISNENO Anesit Afinit ankuas kau neki In kuasat.

²Au aiti au humak ma au kiso it sa' es onle mansian. Na'ko in atnanan nekin sanu atkisot onle ai, ma na'ko in atnanan neki ansae atkisot nalim onle noni molo mafona.

³In an nona sa' es onle nimaf ma anbok au nakak funun. Nalali te anbi mnitas le nane in nanan Smanan Knino UISNENO naiti kau neu neno atnanan ma neki kau neu Ume UISNENO anbi Yerusalem neu baki tulu abit ume in nanan anbi kabenan a'ne'u. Anbi nane anmu'i hau ma fatu mahuma le nafena to'as ma maunu Uisneno.

⁴Oke te au kiso it meusine le naton nak Uisneno atoni Israel anhake anbi nane, namnes onle au it ulali anbi Noe Kebar in ninen.

⁵Uisneno nakua In a'an neu kau nak, “Hoi mansian amates, amkiso neu bian a'ne'u.” Au utuin, ma anbi baki tulu anhaumak lanan le atam, au it hau ma fatu mahuma le nafena to'as ma maunu Uisneno.

⁶Uisneno nakua In a'an neu kau nak, “Hoi mansian amates, ho mit sa' le natonon? Ampanat ale mo'et le neki hainisit le atoni Israel sin anmo'e nane, le na'loba Kau na'ko Au Ume! Aum nai, of Au uton neu ko lasi-lasi le hainisit bainesi anteni.”

⁷Oke te In neki kau neu eno le atam neu po'an abit mone ma naton kau bola' mese anbi baki lape.

⁸Ma In nakua a'an nak, “Hoi mansian amates, mu'naeba bola' in nai.” Leka au mo'e ulali, au it eno mese.

⁹In nak neu kau nak, “Amtam nai ma amkiso taos mo'et hainisit ma le neki mainisit le sin anmo'e anbi nane.”

¹⁰Au tam amsa ma au kiso. Ale ke'an nane in klipit ma nesat anlun sin neki ale kauna ma ale mu'i aem bian ma ale lunat fatu le'u ma hau le'u le atoni Israel naluli ma nabes neune.

¹¹Atopus neu atoni Israel sin bo'hitu sin anbi nane, Nai Yaazanya Nai Safan anmone. Es-es te in ana' bale atu fomeni le napoitan masu.

¹²Uisneno nakua In a'an neu kau nak, “Hoi mansian amates, ho mit sa' le atopus to Israel sin anmo'e nok aten-tena? Sin naluli ma nabes anbi ke'an nanan le nahenu nok fatu le'u ma hau le'u nok tenab nak Au usaitan ulali pah i ma Au ka it fa sin taos sin mo'et.”

¹³Oke te UISNENO nakua In a'an neu kau nak, “Of ho mit sin antao ma anmo'e lasi le hainisit bainesi anteni.”

¹⁴Es nane te In neki kau neu eno naek kabenan a'li Ume UISNENO ma In naton neu kau bife-bife sin ankae natuin Uisneno teta Tamus anmate.

¹⁵UISNENO natoti kau nak, “Hoi mansian amates, ho mit lasi sa' esle' nane? Namfau anteni le hainisi bainesi.”

¹⁶In neki kau neu baki tulu le anbi Ume UISNENO in nanan. Anhaumak nok eno le antam neu Ke'an Knino, anbi baki tulu ma lolok sin atnanan, anmu'i atoni bo'nua am nim. Sin ankoti Ke'an Knino, ma sin naluli ma nabes neu manas anbi neno saen.

¹⁷UISNENO nakua In a'an neu kau nak, “Hoi mansian amates, ho mit sa esle' nane? Atoni-atoni Yehuda le i sin nekan kan malin fa leka sin al nanaoba lasi hainisit nane ma naton taos mo'et le kan mu'i fa nek mansian anbi pah i anfun natef. Mes sin anmo'e ale lasi nane anbi bale le i, anbi Au Ume in nanan, talan te ansato anteni Au to'as. Amkiso nai sin anmo'e ma nasi'u Kau nok lanan amle'ut le i!

¹⁸Of sin naben Au to'as le anaek! Of Au ka sako fa sin sanat. Maski nak sin onen toti nok han koa neu Kau, of Au ka nen fa sin!”