Read Uab Meto YEHEZKIEL 9 Bible Online

YEHEZKIEL 9 - Uab Meto bible

YEHEZKIEL 9

¹Nalali te au nen Uisneno ankoa nak, “Aim nai meu i hoi atoni-atoni le of hi minaoba Au kasat neu kot i. Meki ale hi bale manuat sin.”

²Atoni ne natbol bua'-bua' na'ko eno naek Ume UISNENO neno saen, es-es te neki bale manuat. Atoni mese nok sin in anpake bale pake muti manula ma in neki bale le anpake hen tui. Sin antam ma anhake anhaumak baki tulu noni molo.

³Oke te pina nalim le naton nak Uisneno atoni Israel anhake anbi nane, anpoi na'ko ahake neno tunan, oke te natnani na'ko in bale ahunut nane neu eno hen tam neu Ume UISNENO. UISNENO no'en atoni le anpake bale pake muti nane, In nak,

⁴“Amnao nai meu ale kot ok-oke ma amfe taka' anbi sin ilan neu atoni-atoni le nekan antu' ma nasusbon natuin ale mo'et hainisit le anmo'e nalali sin anbi kot nane.”

⁵Au nen Uisneno nakua In a'an neu atoni bian nak, “Mituin in neu ale kot ok-oke ma mimate ale atoni kais amnek mimnau sin.

⁶Mimate ale atoni, bife, mnasi ma munif, atoni mnasi ma li'ana-li'ana sin. Mes kais amhaumak atoni mese na'ko sin amsa le anmu'i taka' anbi sin ilan. Amfatan na'ko i, na'ko Au Ume i.” Fun sin anfatan sin mepu sin namate ale atomatas atoni Israel, le fe sin anhake anbi Ume UISNENO.

⁷Uisneno nakua a'an neu sin nak, “Milahi Au Ume le i nai! Mihenu in po'an sin meki atoni aon amates. Amfatan nai!” Es nane te sin namate atoni-atoni anbi kot in nanan.

⁸Leka malolot nane fe nanaobon, au fe bi nane mese-mese. Au li'tu ma au koa nok, “Koi UISNENO Anesit Afinit, Ho muto'an Yerusalem onane ka talan te Ho he mumate ale atoni le fe anbi Israel i?”

⁹Uisneno natae nak, “Atoni-atoni Israel ma Yehuda sin anmo'e nalali sanat anae le'uf. Sin namate atoni anbi ale bale, ma Yerusalem sin nalahi nalali neki lasi amle'ut. Sin naton nak Au, UISNENO, Au usaitan ulali pah le i talan te Au ka it fa sin taos sin mo'et.

¹⁰Of Au ka nek umnau fa sin. Of Au tao ma mo'e neu sin sa' le sin antao ma anmo'e neu atoni bian.”

¹¹Nalali te atoni le anpake bale muti nane in nem ma naton neu UISNENO, nak, “UISNENO Ho plenat sin nanaobon nalalien.”