Read Uab Meto DANIEL 1 Bible Online

DANIEL 1 - Uab Meto bible

DANIEL 1

¹Ton tenu afinit anbi tabu Nai Yoyakim naplenat Yehuda, Nai Nebukadnezar kesel Babel antoko kot Yerusalem ma nale'un in.

²UISNENO nafetin in he nati' naskuku Kesel Yotakim ma nasik nani ale blua ma bale maupa anbi Ume UISNENO. Atoni-atoni le in anheke sin in neki sin neu in ume le'u anbi Babel, ma ale blua ma bale maupa le in nasik nani sin in nabela sin anbi ume le'u nane amsa.

³Nalali te kesel naplenat Nai Aspenas, nakaf anbi sonaf in nanan, he nati' anbeti na'ko atoni maheke na'ko Israel nane munif fauk-fauk le sanut mofut na'ko kesel ai na'ko atoni amu'it.

⁴Sin le nane so munif-munif amaspeti. So sin amasten, so sin ahinet, nek amailulet, ma hinen meunuan he nati' anmepu anbi sonaf in nanan. Nai Aspenas so nanoina sin hen so'i ma antui a'at Babel.

⁵Kesel anlek nani amsa nok bukae ma mninut neu sin so namnes nok le naloitan neu kesel in anah sin. Leka nanoina sin nan funan tenu nalali te so sin anhake anbi kesel in matan hen simo mepu anbi sonaf in nanan.

⁶Anbi munif-munif nane anbeti nan Nai Daniel, Nai Hananya, Nai Misael ma Nai Azarya, sin alsin na'ko uf Yehuda.

⁷Nakaf abit sonaf in nanan anseka sin kankenu anfani: Nai Beltsazar, Nai Sadrak, Nai Mesakh ma Nai Abednego.

⁸Nok tuntakus Uisneno, Nai Aspenas in nek anesin Nai Daniel. Nai Daniel ansali he nati' kais nalahib in aon neki mnahat ma tua min kase na'ko kesel in sonaf, es nanet in antoti neu Nai Aspenas he nati' nabe'i in napeni mnahat bian.

¹⁰Natuin amtaus neu kesel, Nai Aspenas nak, “Kesel anlek nalali ho mnahat ma ho mninut, es nanet leka anbi tenab mak ho kam aomin fa na'ko munif-munif bian, namneo of namate kau.”

¹¹Nalali te Nai Daniel naloitan lasi nane nok apaot le Nai Aspenas anlenu he nati' anpainote Nai Daniel nok in soba sin tenu sin.

¹²Nai Daniel nak, “Amsu' kai anbi neno bo'es in nanan; amfe kai al utan nok oe anfani mnahat ma mninut neu kai.

¹³Leka neno bo'es anfin, munesa hai humam nok humaf na'ko munif-munif le anbukae na'ko bukae le kesel anlek ma anlulu nani, ma maiti fekat nai anbi ho kisot le nane.”

¹⁴Apaot nane anlomi ma ansu' sin nan neno bo' mese.

¹⁵Leka tabu nane anfin nalali, sin aomin ma nabe'i nesi na'ko munif-munif le napeni bukae na'ko kesel in mei.

¹⁶Na'ko tabu nane apaot nane ka naloitan anteni fa neu sin mnahat ma mninut le kesel anlek nalali, mes al anfe neu sin utan ma oe anmes kun.

¹⁷Uisneno anfe neu munif ha enu In le nane, nek mamun ma hine neu In. Naik na'ko le nane Uisneno anfe neu Nai Daniel amsa hine he nati' ansefi mnitas ma nanait.

¹⁸Anbi ton tenu anfin, tabu noina le kesel anlek nani, Nai Aspenas neki ale munif nane nem neu kesel Nai Nebukadnezar.

¹⁹Leka namolok nalali nok sin te, kesel nahin nak Nai Daniel, Nai Hananya, Nai Misael ma Nai Azarya nahine nesin ale munif bian anbi ale lasi. Es nanet sin nauba sin mepu anbi kesel in sonaf.

²⁰Anbi ale tabu kesel napoitan molok le antoti sefit ma tenab tais, anbi in kisot munif ha sin nane sin fainekat naleko nesi bo'es no bo'es na'ko ale amnane ma amolok anbi pah nane in nanan.

²¹Nai Daniel anmepu piut anbi sonaf talantia kesel Kores na'ko Persia natselab Babel.