Read Uab Meto DANIEL 10 Bible Online

DANIEL 10 - Uab Meto bible

DANIEL 10

¹Anbi tabu Kesel Nai Koresy naplenat Persia nan ton tenu, In naton han ta'en mese neu Nai Daniel ai Nai Beltsazar. Han ta'en nane amneot kun, mes in ka nahine fa. Leka in nami lanan he nahine nani Nai Daniel ansimo sefit neu han ta'en nane anbi mnitas.

²Anbi tabu nane au utol'ok anbi klei tenu in nanan.

³Anbi tabu nane au ka uah fa mnahat aminat ai sisi, au ka inu fa tua min kase, ma au ka kili fa au nakak nafun.

⁴Anbi funan ahunut antam neno bo'nua am ha, leka au hake bi naek Noe Tigris in ninen.

⁵Au baisenu, ma au it atoni mese anpake blua muti malula ma in afutu nane na'ko mnatu nesaf.

⁶In aon nalim onle noni muti alimat, ma in human nalim onle limat in pinan ma in matan anpin onle ai. In niman ma in haen nalim onle nit molo le mafona, ma in hanan tatnin onle atoni amfaut sin hanan.

⁷Alkun au mes es it amnitas le nane. Atoni-atoni le nok kau sin ka nit fa mes sin namtau talantia sin naenan ma sin natolo'.

⁸Sin nasaitan kau au mes anbi nane, ma au panat amnitas le neki askeken nane. Au ka ubloli fa ma au humak anmutik.

⁹Leka au nen in hanan, au utsel talantia au tofnok anbi afu.

¹⁰Nalali te anmu'i nimaf le anpoe kau le mafena ma nabuab au nimak ma au haek.

¹¹Ahake neno tunan nane nak neu kau nak, “Daniel, Uisneno In nek ko. Amfen amhake mutnin au molok sin leko-leko. Au malenu kau neu ko.” Leka in namolok onane au fen ma au hake na'ko amtaus.

¹²Nalali te in nak neu kau nak, “Daniel, kais mumtau. Uisneno In nen nalali ho onen totis na'ko ahunut le ho maiti fekat he munebet ho monim anfani ahinet. Au aum neu ko fani han taes neu ho onen totis.

¹³Ahake neno tunan le anpanat plenat Persia anlaban kau anbi neno bo'nua am mese in nanan. Es nane te Nai Mikhael, atopus mese na'ko ale ahake neno tunan sin, nem ma antuntaku kau. Au usaitan in anbi Persia.

¹⁴Au aum he uhineb ko neu sa' le of antoman ho pah. Mnitas le i neu neno amnemat.”

¹⁵Leka in naton lasi nane te, au ubes ma ka umolok fa.

¹⁶Nalali te ahake neno tunan le namasbon on mansian nane in nona in niman ma anpoe au fefak. Au ak neune ak, “Usi, mnitas nane antamni' kau talantia au ka ubloli fa.

¹⁷Au onle ate mese le anhake anbi in usif in matan. Au he umolok sa' ka neu Usi? Au ka mu'i fa matani ma au snasak nasunu.”

¹⁸Nalali te in anpoe anteni kau, au tamis au matanik nane ansaton.

¹⁹In namolok nak, “Uisneno In nek ko es nane te kais muoelbom ai mumtau, es nane te mumepnom nai!” Leka in fe naton lasi nane au matanik ansaton ma au umolok ak, “Mumolok nai Usi. Hom sato mulali au matanik.”

²⁰Nalali te in natae nak, “Ho muhin ai kahaf nansa' es au aum eu ko? In salit esle' neu he nati' uton neu ko sa' le matui anbi Sulat Amneot in nanan. Tabu le i of au nao fani he nati' maken ma laban ahake neno tunan le anpanat Persia. Nalali te ahake neno tunan apanat Yunani of in nem. Kan mu'i fa es he nati' anbab kau alkun Nai Mikhael, ahake neno tunan apanat Israel, ho pah.