Read Uab Meto DANIEL 11 Bible Online

DANIEL 11 - Uab Meto bible

DANIEL 11

¹In es napeni sutais he nati' antuntaku kau ma anpesi nok kau anbi ton ahunut Kesel Nai Darius atoni Media nane naplenat.

²Ma sa' le of au uton ani neu ko nane amneot kun.” Ahake neno tunan nane nak, “Kesel tenu of naplenat Persia, ma kesel no ha le natuin nane amu'it nesin na'ko le bian, anbi in plenat ma in mu'in of nasopu neki makenat nok plenat Yunani.

³Anbi amunit kesel abe'it mese of anbol. In plenat nane of anpe' ma naek kun ma of in anmo'e natuin in lomin.

⁴Mes anbi amsoput in plenat nane of anbation no ha. Ale kesel le ka na'ko fa in sufan of naplenat, ma anseka in, ma of sin ka nabe'i fa on in.

⁵Kesel kaben a'ne'u of anfani abe'it. Ma atoni mese na'ko in meo naek sin of nabe'i nesin in, ma in of naplenat plenat le anaek anesin teni.

⁶Anbi ton-ton fauk amunit kesel pah kaben ne'u of namesbok nok kesel kabenan a'li ma anmamoneb in anfetnai nok kesel pah kaben ne'u le nane. Mes sin buat nane ka nanaobon fa lo ma of namate fenai nane, onane amsa neu in mone ma in anah ma in ate-ate sin le nauban in.

⁷Ka lo fa na'ko nane, atoni mese na'ko fetnai nane of anfani kesel. In of anfen ma anmaken nok meo pa'e kesel pah kabenan a'li, ma naskuku in kot sin ma anli'u nani.

⁸Anbi tabu nane in of anfani neu Mesir, in of neki in musu sin fatu ma hau mahuma ma blua mnatu ma noni muti le natulu nalali sin neu uisneno teta le nane. Anbi ton fauk-fauk in nanan of in kan maken teni fa nok kesel kabenan a'li.

⁹Namuni onane kesel pah kabenan a'li of anmaken nok kesel pah kabenan ne'u, mes of mali'uk ma anfani neu in pah.

¹⁰Es nane te ale naimnuke pah kabenan li of naloitan ma anmaken ma naloitan meo pa'e. Atoni mese na'ko sin of in antomat ma anmaken onle noe sako. Anbi makenat hae nua in nanan of in naskuku musu sin kot.

¹¹Es nane te kesel pah bian a'ne'u in nato', ma in anfen ma anmaken nok'on kesel pah bian a'li, of in anli'u na'aenab pukan meo pa'e le kesel pah anlenu nani.

¹²Namuni onane of in namok'on natuin in anbe'u ma namate nalali musu namfau mes of in ka naplenat fa piut.

¹³Neu hae nua anteni kesel pah bian a'li of nahakeb anteni pukan meo pa'e anaek anesin ahunut. Leka in tabu antia, in of antam anbi makenat neki pukan meo pa'e le naek ma blua makenat le namfau.

¹⁴Es nane te atoni namfau of anfani ma anlaban kesel pah bian a'ne'u. Ma atoni amatanit fauk-fauk na'ko ho pah, Daniel, of anfen ma anlaban amsa natuin sin napeni nalali mnitas. Mes sin of ka nisan fa.

¹⁵Nalali te kesel bian a'li of anfun natef kot ma ansimo sin. Pukan mep pa'e pah bian a'ne'u of ka nabe'i fa, ma meo pa'e mabeti sin of kan hake nabe'i fa he nati' anlaban in.

¹⁶Kesel pah bian a'li of anmo'e nesin of kan laban fa sin kle'o amsa. In of antoko natau pah amasat ma ankuas in.

¹⁷Namuni te kesel bian a'li of naloitan in meo pa'e sin he nati' anmaken nok pah kabenan ne'u. Ma nok salit he nati' in ankuas in musu sin anfun natef, in of anmo'e fef bela nok in ma in anmamoneb in anfetnai nok Kesel Mesir nane; mes in salit nane of kan mu'i fa in nesan.

¹⁸Nalali onane te of in maken nok uf-uf anbi tasi in ninen, ma in of anli'u naaenanab sin. Mes atopus mese na'ko atoni amnemat sin pah of nasnasab kle'at le sin anmo'e nane, ma of in anseunbanin kle'at nane neu in.

¹⁹Kesel bian a'li of in nao anfani neu kot-kot anbi in pah anmes kun ma of anli'u naaenab in ma of kan mu'i fa tonas neu in.

²⁰In of maseka neki kesel mese le in anlenu in ameput le nok nek maufinu he nibun ma nabuab noni poni nok aseke ma ansato anteni mu'if anbi plenat in nanan. Of anbi smela kesel nane of malolo ka nok fa mat-mat ma kan bi fa makenat nanan amsa.

²¹Ahake neno tunan nane namolok anteni nak, “Kesel amnemat anten le naplenat pah bian a'li of atoni amamu'it le ka nahum fa on kesel. Mes of in anbol nok askeken ma nasik nan kesel in toko nok mo'el ma poi.

²²Ale meo pa'e le anlaban in, ma Ana' fuat knino Amnanut amsa of namate mananeku sin.

²³In anele ma antanhai ale fef bela le anmo'e nani sin nok uf-uf bian. Ma in plenat nane of anhake namep maski nak in naplenat pah abaut mese.

²⁴Nok manoe in of anken pah-pah maafa anbi tabu amaika anbi nane sin anmoni nok amneot. In of anmo'e sa' le afi sin nai ma sin bei kan mo'e nani fa. Es nane te of in anbati nani neu in atuin sin ale blua le sin nasik nani ma ale amaus le sin napeni anbi makenat in nanan. In of natenab lanan he nale'un bale-bale le mabaik lape, ma in tabu nane of anfin labah.

²⁵Namuni te of nok nek matani in anlek nani pukan meo pa'e he nati' anmaken nok kesel pah bian a'ne'u le in amsa naloitan hen laban in nok pukan meo pa'e le anaek. Mes kesel bian a'ne'u nane of kan hake nabe'i fa natuin nakle'at in.

²⁶In afainekat sin le anhaumak nok in of namofu in. Of namate in meo pa'e namfau ma in solalus of ansopu naneku sin.

²⁷Namuni te kesel nua enu nane of antoko nabua mei mese ma antol ma nah nabua mes nok salit maufinu, ma sin of namo'e es nok es. Mes sin salit nane of ka natiabon fa natuin fe kan tia fa in tabu.

²⁸Namuni te kesel na'ko pah bian a'li of anfani neu in pah neki ale blua le in nasik nani. In ansali he nati' naskuku ma nasitab palsait le to Uisneno nafnek neune. Of in anmo'e natuin in lomin talantia in anfani neu in pah.

²⁹Anbi tabu amunit of in anlaban anteni pah bian a'ne'u, mes in amnekin of amnaikat kun na'ko tabu ahunut.

³⁰Natuin atoni-atoni Roma of nem neki sin abnao sin na'ko Siprus ma anken in talantia in nahenu nok amtaus. Ma of in anfani nok nek to'as anaek ma in nami he naskuku afnekat na'ko to Uisneno. In of natuin afnekat na'ko sin le nasaitan lasi palsait.

³¹Es nane te ansonu ale meo pa'e le he nale'un Ume UISNENO. Of sin nose nani fuat anbi neno-neno ma nahakeb sa' esle': Nahainisin le antek nak maufinu le naskuku ma naklatib.

³²Es nane te nok tenab namfau kesel of anfuli atoni-atoni le nasaitan sin palsait, he nati' anlomi hen bab in. Mes atoni-atoni le na'ki neu Uisneno of nabe'i hen laban in.

³³Atoni-atoni ahinet le antopu to of nahineb atoni namfau. Mes anbi tabu fauk-fauk in nanan, sin bian na'ko sin of anmate natuin makenat ai natuin ai, ma atoni bian anteni of nasik sin ma natam sin anbi o'of.

³⁴Anbi tabu malolot nane nanaobon, to Uisneno sin of napeni tuntakus, mes atoni namfau of nabua nok sin natuin sin monin namnes kun.

³⁵Atopus-atopus ahinet sin of anmate, mes nane anfani su'at neu to talantia sin anfani mnatu nesaf. Lasi nane of nanaobon piut talantia tabu amsoput, tabu le Uisneno anlek ma anlulu nalali.

³⁶Kesel pah bian a'li of anmo'e natuin in lomin ma in salit. Nok nek anaeb of in namolok nak in naek anesin ale usif, ma in naek anesin Uisneno Amnanut Afin-finit. In of anmo'e piut onane talantia Uisneno In to'as ma In maunu namsopu. Natuin sa' le Uisneno anlek ma anlulu nalali of anbol nahun-hun.

³⁷Kesel nane of ka nabaunon fa neu uisneno teta le in na'if sin naluli nabes neune ma neu uisneno teta le bife sin naluli nabes neune. In kan filoli fa uisneno teta sin nane natuin in natenab nak in anaek anfinin sin.

³⁸Onane te in naluli nabes neu uisneno teta le in na'if sin ka naluli nabes fa neune, le uisneno teta aneot ahafot ale kot. Of natulu mnatu, noni muti ma fatu klima ma tulu-tulu amasat bian anteni neu uisneno teta le in na'if sin ka nabes fa neune.

³⁹In of anbeti atoni-atoni le naluli ma nabes neu atoni amnanut sin uisneno teta neu he nati' naskuku kot-kot amatanit. Sekau le in au in nekan neu uisneno teta nane of anfe neu in toko amasat ma amnanut ma afu anfani on upa neune.

⁴⁰Leka kesel pah bian a'li nane anhaumak he namsopu, kesel pah bian a'ne'u of anmaken nok in. Es nane te kesel pah bian a'li of anseunbanin neki makenat anaek. Of in ansonu aklet makenat namfau, bikase ma bnao. Of in anmaken onle noe sako ma natau pah namfau.

⁴¹Of in natau pah amasat nane amsa, ma atoni nifun natun of in namate sin. Mes plenat-plenat Edom, Moab ma bale-bale mateka anbi Amon of nahoni sin.

⁴²Leka in natau plenat-plenat nane, plenat Mesir amsa of ka nafetnon fa.

⁴³In nasik nan amaus anbi pah Mesir esle' mnatu, noni muti ma amaus bian le maupa. Atoni Libia ma Sudan of antuntaku in.

⁴⁴Es nane te hanaf na'ko neno saet ma na'ko kabenan li of naskekeb in es nane te in of anmaken nok matani ma namate atoni namfau.

⁴⁵Ma of in nahakeb in um-ume plenat anbi tasi ma tabu bale Ume UISNENO sin atnanan. Mes namuni te of in anmate ma kan mu'i fa mese amsa le antuntaku in.”