Read Uab Meto DANIEL 12 Bible Online

DANIEL 12 - Uab Meto bible

DANIEL 12

¹Ahake neno tunan le anpake blua muti malula nane namolok anteni nak, “Anbi tabu nane ahake neno tunan anaet Nai Mikhael apanat neu ho pah nane of anbol. Anbi amunit of anmu'i tabu nukat le kan mu'i fa in amnesan na'ko pah-pah nane anbine. Mes ale atoni na'ko ho pah le in kanan matui anbi Uisneno In sulat of napeni honis.

²Namfau anbi sin atnanan le anmate nalali of anmoni anfani, sin bian of antam anbi honis le nabal-bal mes bian anteni of ansutai si'u ma amtaus le nabal-bal amsa.

³Ale atopus ahinet sin of anpin onle neno in pinan. Ma sin le nanoina nalali atoni namfau he nati' anmo'e alekot ma amneot of anpin onle afkun-afkun tal nabal-bal.”

⁴Ma ahake neno tunan nane nak anteni neu kau nak, “Daniel, tabu le i amtobe mufani sulat le nane, ma amtao takaf he nati' in matobe talantia tabu amsoput. Atoni namfau es of ansu' he nati' nahine neu sa' es anbol nane. Mes sin mepu nane son-sona kun.”

⁵Namuni onane te au it ateni atoni nua, le anhake anbi noe in ninen, aon bian nane.

⁶Le es natan neu le anhake anhaumak noe ninen nak, “Leka fe of ale lasi amkakat le i namsopu ka?”

⁷Le es anteni in naiti in ninen nua sin neu neno tunan. Au nen in naiti supat natuin Uisneno le nabal-bal nak, “Lasi-lasi nane of nanaobon anbi ton tenu ma batis in nanan. Leka hamu'it neu to Uisneno nane namsopu te, ale lasi amkakat nane of namsopu amsa.”

⁸Ale in molok sin nane namneo au nen, mes au ka uhine fa. Es nane te au utoti ak, “Usi, ale lasi nane in amsopun onme ka?”

⁹In natae nak, “Tabu le i amnao Nai Daniel, natuin molok-molok nane so matolo' ma matobe talantia tabu amsopun.

¹⁰Of ansu' atoni namfau. Amaufinut of sin ka nahin fa ma of sin anmo'e maufinu piut; alkun atoni ahinet sin es nahin.

¹¹Na'ko tabu fuat neno-neno naen nasnasab ma sa' esle' neki hakataus le antek nak maufinu le naskuku ma nasitab nane anbol, in of anfin ma ankon anbi neno 1.290.

¹²Ua alekot neu sin le na'ki nabalah antia neno 1.335.

¹³Mes neu ko Nai Daniel, ho mu'ti mubalah antia amsoput. Of ho mate, mes of hom fen amfani ma amsimo ho upa anbi tabu amsoput.”