Read Uab Meto DANIEL 3 Bible Online

DANIEL 3 - Uab Meto bible

DANIEL 3

¹Anbi tabu mese Kesel Nai Nebukadnezar anmo'e fatu ma hau mahuma na'ko mnatu le in mnanun meter bo' nua am hitu ma in meunuan ala kle'ot meter tenu. In nahakeb anbi sona naek Dura anbi pah Babel.

²Nalali te kesel anhone ale kesel pah-pah, ale Kumlol, ale Bupati, afainekat anbi pah, ana' noni, alef lasi, ahinet anbi lef lasi, ma ale nakaf anbi pah he nati' nok anbi buat he namepan fatu ma hau mahuma le in nahakeb nalali.

³Leka sin nem ma anhake anbi fatu ma hau mahuma nane in matan,

⁴kesel in abha'et nane namolok nok han anaek nak, “Bia benu na'ko ale pah, uf-uf ma a'at! Amnen nai kesel in aplenat le i:

⁵Leka to'is nahan, ma feku, heo, biola ma leku, ma bano nok ale blua han alekot bian, bae benu miluli ma mibes neu fatu ma hau mahuma na'ko mnatu le Kesel Nai Nebukadnezar nahakeb nalali.

⁶Sekau es ka natuin fa plenat le i of mapolin neu ai apinat in nanan.”

⁷Leka sin nen blua ma bale han alekot nane sin hanan atoni-atoni na'ko ale pah, uf-uf ma ale a'at sin naluli ma nabes neu fatu ma hau mahuma le anmo'e na'ko mnatu.

⁸Atoni Babel sin fauk-fauk anpake tabu sona le nane he nale'un atoni Yahudi.

⁹Sin namolok neu Kesel Nai Nebukadnezar nak, “Of ho moni tal nabal-bal au Usif!

¹⁰Au Usif ho mupoitan mulali plenat nak leka ale blua ma bale han alekot nane nahan ale atoni so naluli ma nabes neu fatu ma hau mahuma na'ko mnatu le nane,

¹¹ma sekau le ka natuin fa plenat nane of mapolin neu ai apinat in nanan.

¹²Mes atoni Yahudi sin fauk-fauk le au Usif ko, muna'at ho plenat anbi pah Babel, sin ka natuin fa ho plenat le nane. Sin le nane esle' Nai Sadrakh, Nai Mesakh ma Nai Abednego. Atoni-atoni le nane sin kan lomi fa he nati' naluli ma nabes neu au Usif ko ho uisneno teta ma nes-nesi sin ka naluli nabes fa neu fatu ma hau mahuma na'ko mnatu le ho muhakeb mulali.”

¹³Leka kesel in nen lasi nane te in nato', nalali te in naplenat he nati' atoni tenu sin le nane nem anbi in matan.

¹⁴Kesel natan sin nak, “Sadrakh, Mesakh ma Abednego! Namneo ka hi kam lomi fa he miluli mibes neu au fatu le'u ma hau le'u ma neu hau ma fatu mahuma na'ko mnatu le au uhakeb ulali?

¹⁵Es nanet tabu le i hi miloitan he nati' miluli mibes neu fatu ma hau mahuma le i leka blua ma bale han alekot nane nahan ka? Leka hi kam lomi fa au polin utam ki neu ai apinat nanan. Mes uisneno teta le me es of he nafetin ki na'ko au kuasat?”

¹⁶Nai Sadrakh, Nai Mesakh ma Nai Abednego sin natae nak, “Usif le apinat, of hai kam pesi fa aom.

¹⁷Uisneno le hai miluli ma mibes neune nabe'i he nafetin kai na'ko ai apinat le nane ma na'ko Usif ho kuasat, namneo In of anmo'e nani.

¹⁸Mes leka In kan mo'e fa amsa, so mak ho muhin Usif nak of hai ka miluli mibes fa neu fatu ma hau mahuma le Usif ho muhakeb mulali.”

¹⁹Es nanet Kesel Nai Nebukadnezar in nato'an Nai Sadrakh, Nai Mesakh ma Nai Abednego, talantia in human anputun me'. In naplenat he nati' nahopi anteni ai nane maputun nesi no hitu.

²⁰Nalali te in anlenu atoni fauk le amatanit na'ko solalus he nati' anfutu Nai Sadrakh, Nai Mesakh ma Nai Abednego, ma anpolin sin neu ai apinat in nanan.

²¹Nalali te sin anfutu atoni tenu sin le nane nok sin blua pake sin esle' sobalu, sobalu betkone, sobe ma blua pake bian, nalali te natam sin neu ai apinat in nanan.

²²Natuin kesel in plenat nane matani kun, es nanet ai nane in maputun anfin talantia ai in pinan notu namate atoni-atoni le naiti Nai Sadrakh, Nai Mesakh ma Nai Abednego.

²³Atoni tenu sin le nane le mafutu nane natam sin anbi ai apinat nane.

²⁴Nok askeken Kesel Nai Nebukadnezar in naskek. Nok manapat in anfen ma namolok neu ale in ameput sin nak, “Ai hit kat fut fa atoni tenu sin le nane ma atpolin tatam sin anbi ai in nanan? Sin natae nak, “Namneo, au Usif.”

²⁵Kesel natae nak, “Mes nansa' es au it atoni ha sin naoni anbi ai in nanan le nane? Sin ka mafutu fa, ma sa' kan toman sin fa, ma ha nane in human onle uisneno teta pah.”

²⁶Nalali te Nebukadnezar anhaumak ai nane in enon ma namolok nak, “Sadrakh, Mesakh ma Abednego, ate-ate Uisneno Amnanut Afin-finit! Ampoi mi'ko ai le nane!” Nalali te sin anpoi.

²⁷Ale kesel in niman a'ne'u, ale Kumlol, Bupati, ma ameput-ameput bian anfunan atoni tenu sin le nane ma ankiso sin mes ai ka notu fa sin. Sin nakan funun amsa kan putu fa, ma sin bale pake amsa kan putu fa, fun ai in masu amsa kan toman fa sin.

²⁸Es nanet kesel namolok nak, “Pules liatas neu Uisneno le Nai Sadrakh, Nai Mesakh ma Nai Abednego naluli nabes neune. In anlenu nalali In ahake neno he nati' nafetin In ate sin tenu sin le anpalsai neune. Sin antanhai nalali au plenat ma sin lomi nesi anmate na'ko he naluli ma nabes neu uis pah me-me amsa, kalu ka sin Uisneno fa anmes kun.

²⁹Es nanet au uplenat ki ale atoni mese-mese anbi pah le i, leko uf-uf ma a'at me-me amsa kais misi'u le Nai Sadrakh, Nai Mesakh ma Nai Abednego naluli nabes neune. Leka sin nasi'u In, sin of malolo ma of naskuku sin ume ma anfani fatu polin. Natuin kan mu'i fa uisneno teta pah he nabe'i anmo'e sa' le Uisneno anmo'e nalali.”

³⁰Nalali onane te kesel nasaeb anteni Nai Sadrakh, Nai Mesakh ma Nai Abednego sin atoko talantia sin anfani ana' plenat amnanut anbi pah Babel.