Read Uab Meto DANIEL 4 Bible Online

DANIEL 4 - Uab Meto bible

DANIEL 4

¹Le i han tonas na'ko Kesel Nai Nebukadnezar le ansonu neu atoni-atoni anbi ale pah, uf-uf ma ale a'at anbi pah pinan funam natef: “Aomina aoleko neu ki!

²Au lomi he uton neu ki lasi amkakat neu Uisneno Amnanut Afin-finit naton nalali neu kau.

³Lasi amkakat le in anmo'e nane naek kun! Namneo amkakat le In anmo'e nane nae le'uf kun! Uisneno nane of anfani kesel tal nabal-bal. Ma In akuasat kun anbi batan nao neu batan.”

⁴Au umaika nok malinat anbi au sonaf in nanan ma au moni nok athoes.

⁵Mes anbi fai mese leka au fe atup, au unanai ma upeni mnitas mese le naoleb au nekak.

⁶Es nanet au haman ale ahinet anbi Babel he nati' ansefi nanait nane in otan.

⁷Mes leka ale aetus ma atonas, mnane, atoni-atoni ahinet ma ale ahin afkun sin nabua ma au uton au nanait nane neu sin, kan mu'i fa es he nati' ansefi kau in otan.

⁸Anbi amsoput Nai Daniel le antek amsa nak Nai Beltsazar le in kanan namnes nok uisneno teta pah Nai Daniel nane nahenu nok smanaf na'ko uisneno teta onle aknino kun. Au uton neu in au nanait neune amsa, ak,

⁹“Hoi, Beltsazar, atopus neu atoni-atoni ahin sulat, au uhin ho muhenu nok smana knino, talantia kan mu'i fa lasi tolo' neu ko. Amnen nai au nanait, ma amsefi kau in otan.

¹⁰Leka au fe atup au it hau u'es le anmoni anbi pah pinan in atnanan.

¹¹Hau nane amnanu, in ta'un anaek ma namep. In tunan antia neno tunan talantia atoni abit pah pinan nit in.

¹²In non sin no maten, ma in fuan namfau. Leka atoni abit pah pinan nah in fuan sin of nanokbon neu sin. Ale mu'it fui antup anbi in mafon, ma ale kolo nakun anbi in atlaen sin. Ma ale amonit nabe'i he nah in fuan nane.

¹³Leka au fe utenab amnitas nane, au it ahake neno mese ansanu na'ko neno tunan; au kiso in naloitnon ma nabalbon.

¹⁴Nok han a'aikat in namolok nak, ‘Amse mutselab hau nane ma amketu in atlaen, mukua in non sin nai ma ampaleo in fuan. Amli'u nai mu'it-mu'it le antup anbi in nupun ma kolo-kolo le nakun anbi in atlaen sin.

¹⁵Mes mufetin in tukluan he nabalah anbi afu nanan. Amfutu meki kolen besi ma niti molo ma musaitan in anbi mnela in atnanan. Maut he nati' akum es antoman, ma anmoni nabua nok mu'it-mu'it ma hun.

¹⁶Maut he nati' mansian in hine nane nabaina anfani mu'it in hinen anbi ton hitu in nanan.

¹⁷Nane fekat na'ko kai ale ahake neno le miloitan ma mibalbom milali. Haim sali esle' he nati' ale atoni anbi me-me sin anau nak Uisneno Amnanut Afin-finit nane es ankuas plenat mansian, ma plenat nane In anfe nani neu sekau am sekau le In anbeti nani maski nak neu atoni-atoni le ka maota fa amsa!

¹⁸Nai Beltsazar au nanait onle nane. Tabu le i ho muton kau in otan. Kan mu'i fa es na'ko ale ahinet le anbi au plenat he naton neu kau, mes au uhin ho of mube'i nok smanan knino.”

¹⁹Leka Nai Daniel le antek nak Nai Beltsazar, in naskek ma natena lo an es. Es nanet au Kesel Nai Nebukadnezar au umolok neu in, “Nai Beltsazar, kais muoelbom natuin nanait nane in otan.” Nai Beltsazar natae nak, “Au Usif, oni bait alekot kun lasi-lasi nane maut hen bol ma antoman au Usif ko ho musu sin ma kais antoman au Usif ko.

²⁰Hau le au Usif ko ho mit nane in mnaun le'uf kun talantia in tunan antia neno tnanan, ma ale atoni anbi pah pinan sin nit nani.

²¹In non nenu maten talantia nabe'i anfani bukae neu ale atuas anbi pah pinan. Ale mu'i fui antup anbi in mafon ma ale kolo nakun anbi in atlaen sin.

²²Koi au Usif ko, ho es hau amnanut ma amatanit le nane. Ho apinat nane ansato ma antia neno, ma ho kuasat anmeunua antia pah pinan in tu'an.

²³Au Usif ko ho mit ahake neno mese nem na'ko neno tunan ma namolok nak, ‘Amse mani hau le i ma mile'un in, mes mufetin in tukluan nabalah afu in nanan. Amfutu meki kolen besi ma niti molo, ma mufetin in anbi mnela. Maut he nati' tani ma akum antoman in ma maut he in nabua nok ale mu'it anbi ton hitu in nanan.’

²⁴Au Usif ko, mnitas nane in otan nane esle' i, ma lei Uisneno Amnanut Afin-finit In fekat anmes kun.

²⁵Au Usif ko, of anli'u ko na'ko buat mansian ma ho moni ambi mu'it abit mnela sin atnanan. Anbi ton hitu in nanan au Usif ko of hom bukae hun onle bijae molo ma amtup ambi mnela, ma tani ma akum of antoman ko. Nalali onane te au Usif ko of hom tebes mak Uisneno Amnanut Afin-finit es ankuas plenat mansian ma plenat nane of In anfe nani neu sekau le in anbeti nani.

²⁶Ale ahake neno sin naplenat he nati' hau tukluaf nane nafetin anbi afu in nanan. Le nane in otan nak au Usif ko of hom fani kesel anteni leka hom tebes mak Uisneno es ankuas pah pinan anfunam natef.

²⁷Es nanet so au Usif ko mutuin ho ate kau fainekat. Kais au Usif ko musanab amteni, mes amo'e sa' le leko ma amneot, ma amnek atoni anukat. Nok lasi nane au Usif ko of ho mumlil ambi ho monim.”

²⁸Kesel Nai Nebukadnezar nak, maut he nati' ale lasi nane anbol neu kau.

²⁹Anbi funan bo'es am nua namuin, anbi tabu au ka oinsok fa anbi po'an bi ktuta fafon na'ko au sonaf Babel,

³⁰au umolok ak, “Amkiso kot Babel in masan! Au es ufena kot ainaf neu pah he nati' uton au kuasat ma au matanik, au alekot ma au naek!”

³¹Leka au fe ka umolok ulali fa te, au nen hanaf na'ko neno tunan, “Kesel Nai Nebukadnezar, amnen nai le i! Ho kuasat amfani kesel au aiti ulali na'ko ko.

³²Of anli'u ko na'ko buat mansian, ma ho moni mok mu'it-mu'it anbi mnela. Of hom bukae hun anbi ton hitu in nanan onle bijae molo. Nalali onane te of hom tebes mak Uisneno Amnanut Afin-finit Akuasat es ankuas plenat mansian, ma plenat nane of anfe nani neu sekau le In anbeti.”

³³Anbi tabu le nane amsa, molok-molok nane of natonon. Au Nai Nebukadnezar mali'u mapolin kau na'ko buat mansian ma au uah hun onle bijae molo. Tani ma akum napet au aok, ma nakak funun namnanu onle kotkot tasi in funun, ma au knusak namnanun onle kolo in knusan.

³⁴Leka ton hitu nane anfin au baisenu neu neno tunan, ma au ufani au nek be'at nane. Es nanet au pules Uisneno Amnanut Afin-finit au unaeb ma au utuna In le amonit nabal-bal nane. “Uisneno of anfani Kesel talantia nabal-bal. In kuasat nane na'ko nabal-bal talantia nabal-bal.

³⁵Uf-uf anbi pah pinan kan mu'i fa in otan. Uisneno es ankuas ahake neno abit neno tunan ma mansian abit pah pinan. Kan mu'i fa es hen laban In lomin, ma kan mu'i fa es he natan neu sa' es In mo'e nani.”

³⁶Leka au nekak anbe anfani onane te, es nane te anaet, abe'it matani, ma kan mateka neu au plenat In anfe nafani neu kau. Ale au ameput sin ma ale au anaet sin naeku nok kau, ma au apinat nane naek anesin na'ko tabu ahunut.

³⁷Es nane te tabu le i au, Nai Nebukadnezar he pules ma utuna ma uliatas Kesel abit neno Tunan. Ale In mo'et sin nane amneot ma amnonot kun, ma In of nanebet atoni nek anaeb.