Read Uab Meto DANIEL 5 Bible Online

DANIEL 5 - Uab Meto bible

DANIEL 5

¹Anbi neno mese Kesel Nai Belsyazar anhoen anaet sin nifun mese ha nati' nok anbi tolas amasat ma ninun tua min kase.

²Anbi tabu fe sin ninun, Nai Belsyazar naplenat he nati' naiti klas mninut na'ko mnatu ma noni muti le in amaf Nebukadnezar nasik nani sin na'ko Ume UISNENO anbi Yerusalem. Kesel Nai Belsyazar in ansali he nati' ale anaet sin fenai ma ale in abha'et sin ma in anmes, sin ninu neki klas mninut nane.

³Leka neki klas mninut nane sin nem antia, sin al sin ninu tua min kase le antao nani anbi bale mninut nane.

⁴Tabu sin alsin ninu sin anpules hau ma fatu mahuma le anmo'e na'ko mnatu, noni muti, nit molo, hau ma fatu.

⁵Nok askeken in nit nimaf mansian mese le antui sa' es anbi sonaf in anesat anbi bale meusine le antoman paku in pinan, talantia kesel ankiso nit in.

⁶In human anmofu ma in namtau talantia nok atais in anli'tu.

⁷In antoti nok han hunun ma in antoti ale mnane, ale ahin sulat ma ahin afkun he nati' no'en sin. Leka sin nem antia, kesel namolok nak, “Sekau es nabe'i anso'i tuis nane ma naton kau in otan, of au fe neune blua pake usif esle' sobalu betkone kanalu ma heke mnatu anfani on takaf upab neu in. Naik na'ko nane of au aiti in anfani ana' plenat no tenu anbi au plenat in nanan.”

⁸Ale ahinet sin nem neu in, mes kan mu'i fa es na'ko sin hen so'i nan tuis le nane ai naton in otan neu kesel.

⁹Kesel Nai Belsyazar in naoleb in nekan ma in human anmofu, talantia in anaet sin naoelbok.

¹⁰Leka usif in fenai in nen kesel ma in anaet sin sakoit, in antam neu ke'an tolas le nane. Nalali te in namolok nak, “Au Usif ko nati' hom ao min tal nabal-bal! Usif so muloitan ho nekam ma kais mumofu ho humam.

¹¹Natuin anbi ho plenat in nanan anmu'i atoni mese le nahenu nok smanaf ale atoni knino. Anbi tabu au Usif, ho amaf naplenat, atoni le nane naton in hine ma in nek leko onle atoni-atoni knino sin hine. Au Usif, ho ama Kesel Nai Nebukadnezar naiti in anfani atopus neu ale mnane, atoni ahin sulat ma anine afkun.

¹²In atoni ahinet, nek leko ma in ahinet hen sefi nanait ma naton lasi tolo' ma ansefi lasi-lasi mafena. In kanan Nai Daniel mes kesel nakanab in Beltsazar. Amboin in. In of naton neu au Usif ko tuis le nane in otan.”

¹³Nalali te neki Nai Daniel nem ma anhake anbi kesel in matan. Nalali te kesel natan in nak, “Ho Nai Daniel atoni Yahudi le mapolin, le au amaf naiti ko na'ko pah Yehuda?

¹⁴Au nen nak ho muhenu nok smanaf atoni-atoni knino, ma ho mu'i hine, nek salit, ma nek alekot le matain le'uf kun.

¹⁵Ale ahinet sin ma ale mnane ansato he nati' anso'i tuis le i ma naton in otan neu kau. Mes sin ka nahine fa.

¹⁶Au fe nen nak ho mube'i he muton ale lasi tolo' ma amsefi ale lasi-lasi mafena. Leka hom so'i man tuis le i ma ho muton kau in otan, of au fe neu ko blua pake plenat esle' sobalu betkone kanalu, ma heke mnatu le anfani takaf maupab. Naik na'ko nane of au aiti ko amfani ana' plenat no tenu anbi au plenat in nanan.”

¹⁷Nai Daniel natae nak, “Au Usif ko, kais amfe neu kau blua maupa nane, so amfe mani neu atoni bian. Of au so'i tuis le nane neu ko Usif ma au uton ko in otan.

¹⁸Uisneno Amnanut Afin-finit anmo'e Nebukadnezar, au Usif ko ho ama anfani kesel anaet ma anfe neune kanaf naek mateka.

¹⁹In anfani atoni anaet, talantia ale atoni na'ko ale pah, uf, ma a'at natai ma namtausan in. Leka in anlomi he namate atoni, of in namate atoni nane, ma leka in anlomi he nafetin atoni, of in nafetin atoni nane. In naiti ai nanebet es-es natuin kun in lomin.

²⁰Mes leka in nanaebon, in namanub in nekan ma nato', Uisneno nasanut in na'ko in toko plenat, talantia in anaet nane namneku.

²¹Anli'u in na'ko buat mansian, ma in hine nane anfani on mu'it in hinen. In anmoni nok bikaes fui, in nah hun onle bijae molo ma antup anbi mnela talantia tani ma akum antoman in. Anbi amsoput in antebes nak Uisneno Amnanut Afin-finit nane es ankuas plenat mansian, ma plenat nane of In anfe nani neu sekau am sekau le In anbeti nani.

²²Mes in anmone, esle' au Usif ko, ho kam lomi fa he munebet ho aom maski nak ho muhin ale lasi nane.

²³Au Usif ko, ho munaebom ma muaitiom amnesin UISNENO abit neno tunan ma amlenu he nati' natam klas mninut le nasik nan sin na'ko Ume UISNENO. Es nane te au Usif ko mok ale ho anaet sin, ho fenai sin ma ale ho abha'et sin minu meki klas mninut nane. Au Usif ko, hom pules munaeb fatu ma hau mahuma le anmo'e na'ko mnatu, noni muti, nit molo, besi, hau ma fatu, uisneno teta, le ka nit fa ai ka nen fa sa'-sa'. Au Usif ko, ho ka muupab fa Uisneno le anlek au Usif ko ho monim ma ho matem ma le anlek ma anlulu ho lanan monit.

²⁴Es nane te Uisneno ansonu nimaf le nane hen tui In han ba'an.

²⁵Tuis le nane esle' i, ‘Anso'i, anso'i, antai, anbati.’

²⁶Ma in otan esle' i: ‘Anso'i, in otan nak, au Usif ko, ho plenat Uisneno anso'i nalali ma of In nasopu;

²⁷antai, ‘au Usif ko antai nalali ko mes ho makafa ko;

²⁸anbati, au Usif ko ho plenat anbati nalali ma anfe nani neu atoni Media ma Persia.”

²⁹Nok askeken Nai Belsyazar naplenat in ameput sin ma napakeb Nai Daniel sobalu bet kone kanalu ma heke mnatu neu in to'an. Ma in naiti Nai Daniel anfani ana' plenat no tenu anbi in plenat in nanan.

³⁰Anbi fai le nane amsa namate Nai Belsyazar kesel Babel nane.