Read Uab Meto DANIEL 6 Bible Online

DANIEL 6 - Uab Meto bible

DANIEL 6

¹Anbi tabu namate Nai Belsyazar, Nai Darius atoni Media nasik nan toko plenat. Anbi tabu nane in anmoni nan ton bo'ne am nua.

²Nai Darius anbati in plenat nane kuan uf natun mese bo'nua, le kuan uf mese Kumlol mese es naplenat.

³Nai Daniel ma in soba sin nua sin naiti sin hen panat ale Kumlol nane he nati' kais namofu kesel.

⁴Natonon anbi Nai Daniel in mepu nane naleko nesi na'ko ale Kumlol ma ale apanat bian sin mepu. Es nane te kesel naiti in anfani nakaf anbi plenat nane anfun natef.

⁵Mes ale Kumlol ma ale apanat-apanat nane naim hae Nai Daniel anbi plenat in nanan, mes sin ka napeni fa, natuin Nai Daniel anmepu nok aki'at, ma ka nafetin fa in mepu ai anmo'e sanat sa' es amsa.

⁶Es nane te sin namolok nak, “Hit of tapeni Nai Daniel in sanat nao natuin in afnekat.”

⁷Nalali te sin al sin nao ma anhake anbi kesel in matan ma sin nak, “Koi Kesel Nai Darius, ho plenat nane of anmoni tal nabal-bal!

⁸Hai ala kai le ampainote ho plenat, leko ale apaot, ale Kumlol, ale Kumlol sin niman ne'u ma atuntakus bian, haim nek mese milalihe mitiaba neu hai Usif he mupoitan sulat plenat le mes natuin nok amneot. Alekot kun hai Usif muplenat he nati' anbi neno bo'tenu in nanan kan mu'i fa atoni mese amsa le nafetin he natiaba in salit leko neu uisneno teta mese ai mansian, so al neu kun au Usif ho mes kum. Sekau le anele ma antanhai plenat nane in of mapolin neu nuat meo asu.

⁹Haim toti he nati' au Usif ko amtao lulat plenat neu sulat le nane he nati' anfani lasi plenat neu Media ma Persia le of kan nose nani anteni fa.”

¹⁰Es nane te Kesel Nai Darius anlun sulat plenat nane.

¹¹Leka Nai Daniel in nen lasi nane, in anfani neu in ume. Anbi ke'an anbi aktuta fafon anmu'i eno ana-eno ana le anbaina neu Yerusalem. Ma onle anbi in monin, anbi eno ana sin matan le natfai in an onen ma anpules in Uisneno haef tenu anbi neno mese.

¹²Leka Nai Daniel in musu sin nit in an onen neu in Uisneno,

¹³sin nao ma anhake anbi kesel in matan ma nasi'u Nai Daniel. Sin namolok nak, “Hai Usif ko, amlun mulali sulat plenat ma ampenan ale atoni he nati' anbi neno bo'tenu in nanan le i kais natiaba in salit neu uisneno teta ai neu mansian alkun neu ko au Usif? Ma nalali te sekau le anele ma antanhai plenat le nane of mapolin neu nuat meo asu in nanan?” Kesel natae nak, “Teb, ma aplenat nane fe anfani fekat Media ma Persia le fe kan hel nafani fe.”

¹⁴Nalali te sin nak neu kesel nak, “Nai Daniel atoni mapolin na'ko Yehuda, ka natuin fa hai Usif ko ma nanebet ho plenat Usif. In an onen piut haef tenu anbi neno mese.”

¹⁵Leka kesel in nen lasi nane in nekan antu' ma an ole, es nane te in nami lanan he nafetin Nai Daniel. Kesel in natenab talantia neno anmabe.

¹⁶Nalali te atoni-atoni nane nem ma anhake anbi kesel in matan ma sin nak, “Au Usif ko so leko ho mumnau lasi plenat Media ma Persia le kesel mupoitan mani of ka naklelo fa anteni.”

¹⁷Es nane te anbi amsoput kesel naplenat he nati' anheke Nai Daniel ma anpolin natam in neu nuat meo asu. Kesel nak neu Nai Daniel nak, “So nati' ho Uisneno le ho mululi ma mubes neune nok aki'at nane nafetin ko.”

¹⁸Nalali te sin antobe meo asu in nuat nane neki fatu bena naek, ma kesel anmalak fatu nane neki malak plenat ma ma ale anaet sin malak, talantia kan mu'i fa es he nafetin Nai Daniel na'ko ale meo asu nane.

¹⁹Nalali te kesel in nao anfani neu in sonaf. In kan lomi fa hen bukae ai hen halin nani. Ma anbi nane in kan tup nit fa.

²⁰Anbi nok-nok ana kesel anfen ma in nao neu meo asu sin nuat nane.

²¹Leka in antia bale nane, in anboin nok han olet nak, “Daniel ate Uisneno amonit! Ho Uisneno le ho mululi mubes meune nabe'i nafetin ko na'ko ale meo asu nane?”

²²Ma nalali te Nai Daniel in natae nak, “Au Usif ko, of ho moni tal nabal-bal!

²³Ho ate kau au Uisneno anlenu nalali In ahake neno sin anpoh meo asu sin fefan talantia sin ka nansa'an fa ho ate kau. Uisneno nafetin ho ate kau natuin In nahin nak ho ate kau ka usanab fa neu In ma neu au Usif ko.”

²⁴Kesel in nekan namlil nae le'uf kun ma in naplenat he nati' napoitan Nai Daniel na'ko meo asu sin nuat nane. Leka sin nanaob nalali plenat nane, sin ka nit fa papa' mese anbi Nai Daniel in aon, natuin in nek atebes neu in Uisneno.

²⁵Nalali te kesel naplenat atoni sin he nati' anheke atoni-atoni le nem ma naton nalali neu Nai Daniel. Esle nane sin nok sin anah ma sin fenai sin anpolin natam sin neu meo asu sin nuat. Leka sin fe kan tia fa nuat in nanan te meo asu sin anpisu sin ma naskuku sin nuifenu.

²⁶Nalali onane te Kesel Nai Darius ansonu sulat neu atoni-atoni anbi ale pah, uf ma a'at anfun natef pah pinan nak, “Ua leko neu ki!

²⁷Au uplenat neu ale atoni le anbi au plenat in nanan he nati' namtau ma nausi neu Uisneno le Nai Daniel naluli nabes neune. In le nane Uisneno amonit tal nabal-bal, In of naplenat tal pah pinan namsopu. In plenat nane of ka namle'u fa. Ma In kuasat nane of ka oke nit fa.

²⁸In es anfe honis ma lasi fetin, In es anmo'e lasi amkakat anbi neno tunan ma pah pinan. In es nafetin nalali Nai Daniel, na'ko ale meo asu sin fefan.”

²⁹Nok nane Nai Daniel napeni toko amnanut anbi tabu Nai Darius ma Nai Koresy atoni Persia le nane naplenat.