Read Uab Meto DANIEL 7 Bible Online

DANIEL 7 - Uab Meto bible

DANIEL 7

¹Anbi fai mese, anbi ton ahunut Nai Belsyazar anfani on kesel anbi Babel, Nai Daniel in nanai ma napeni mnitas. Nanait nane au tui ma mnitas nane in kanan nek onle i: Anin naek anfu na'ko neno kabenan ha sin talantia nanautu anbi tasi ainaf.

³Nalali te mu'it naek ha anpoi na'ko oe in nanan, le es te in teta kun na'ko es amsa.

⁴Ahunut in human onle meo asu, mes in manine onle kaka tasi panis. Leka au fe ka kiso fa in, nok askeken in ninen nane natboka ma nafetnon; in anhake anbi afu in fafon ma anhake neki in haen sin onle mansian, nalali te anfe neune tenab mansian.

⁵Mu'it pa' nua nahumbon onle asu fui. In anhake neki in haen abit kotin ma in neki nui bnapa tone tenu anbi in nisin. Au nen hanaf mese nak neune nak, “Muah sisi nai in anaen onle hom lomi!”

⁶Leka au fe ka kiso fa in, mu'it mese anbol anteni. In nahumbon onle bia fui, mes anbi kotin anmu'i ninef onle kolo ma in mu'i nakaf ha. Ma leka hit atkiso in ahinet kun.

⁷Leka au fe kiso in, mu'it pa' ha nane anbol. In abe'it, matani kun ma ahakataus. Nok in nisin le naek ma manun onle besi in naskuku ma natamun in musu ma nahapun in nesin. In mnaikat kun na'ko mu'it-mu'it bian natuin in sunan bo'mese.

⁸Leka au fe kiso in sunan sin, sunaf mese anmoni anteni anbi sunaf-sunaf nane sin atnanan. Sunaf nane nabau mes in nabe'i anbe'u ma anbok nani sunaf nono tenu na'ko sunaf-sunaf ahunut nane. Sunaf abaut nane anmu'i mataf onle mansian in matan ma fefaf apoiba nok nek anaeb.

⁹Leka au fe kiso piut, toko fauk-fauk nabela sin anbine. Ma In le amonit tal nabal-bal antunon anbi toko mese na'ko toko-toko nane. In blua pake ma In nakan funun muti onle abas. In toko nok in haen sin naliman natuin ai in pinan,

¹⁰ma ai in pinan nane anpoi na'ko in atoko. Atoni nifun-nifun antuthae In. Ma atoni hotun-hotun anhake anbi In matan. Nalali te nauba buat neu lef lasi, ma In anfai ale sulat-sulat.

¹¹Leka au fe kiso In, au nen sunaf abaut nane namolok nok nek anaeb. Nalali te in namate mu'it pa' ha le nane, ma anpolin in nuif sin neu ai in nanan, talantia anfani afu.

¹²In anbok nani mu'it bian sin kuasat, mes in nafetin sin anmoni anteni tabu le anlek nani.

¹³Anbi au mnitas anbi fai le nane, au it sa' es onle mansian. In nem ma nope anfun nan in, ma in nao neu In amonit tal nabal-bal ma natonon neu In.

¹⁴Anfe nani kuasat ma sobe plenat neu in on kesel, talantia atoni-atoni na'ko pah-pah, ale uf-uf ma ale a'at nabes neu in. In kuasat nane of anhake tal nabal-bal ma in plenat nane of ka namle'u fa.

¹⁵Mnitas-mnitas le au it ani nane anakmanab ma naoleb au nekak.

¹⁶Nalali te au haumak atoni mese le anhake anbi nane ma au toti he in ansefi ale lasi nane. Es nane te in naton nani neu kau.

¹⁷In namolok nak, “Mu'i naek ha sin nane esle' plenat ha sin le anbol anbi pah pinan.

¹⁸Mes Uisneno Amnanut Afin-finit In to of ansimo pa' he naplenat ma in plenat nane of anhake tal nabal-bal.”

¹⁹Nalali te au sali he uhin mu'it pa' ha nane in otan, le in ateta kun na'ko mu'it bian, le nahakataun ma nale'un ma nah nani in musu neki in knusan na'ko nit molo ma in nisin na'ko besi ma nahapun in nesin.

²⁰Au sali he uhin amsa neu sunaf bo'mese abit in nakan ma sunaf abaut le anpoi namuni ma nalali te anbok nani sunaf nono tenu na'ko sunaf-sunaf ahunut nane. Sunaf abaut nane anmu'i mataf ma fefaf le namolok nok nek anaeba. Le in naton hakataus anesi na'ko sunaf-sunaf bian.

²¹Leka au fe panat in, sunaf nane anmaken ma anlaban to Uisneno ma anli'u sin.

²²Nalali te in amonit tal nabal-bal nane nem ma nafek ma namneob Uisneno Amnanut Afin-finit In to. In tabu antia nalali he nati' sin ansimo kuasat he naplenat.

²³Mnitas le nane in sefin esle' i, “Mu'it pa' ha nane esle' plenat pa' ha le anhake anbi pah pinan of ateta kun na'ko plenat-plenat bian. Plenat nane of naskuku ma nale'un pah pinan funam natef ma nahapun nani in nesin.

²⁴Sunaf bo'mese nane esle' kesel bo'mese le uf naplenat pah nane. Nalali te kesel mese of anbol anteni; in of ateta na'ko kesel ahunut, ma in of anli'u kesel tenu.

²⁵In of anlaban Uisneno Amnanut Afin-finit ma na'susu' to Uisneno. Of in naklelo ale plenat-plenat ma ekut buat to afnekat neu Uisneno, ma of in ankuas sin anbi ton tenu ma batis in nanan.

²⁶Es nane te alef lasi neno tunan of nabua ma anbok nani in kuasat ma naskuku in talantia namneku.

²⁷Kuasat ma apinat ale plenat anbi pah pinan of anfe nani neu Uisneno Amnanut Afin-finit In to. Sin kuasat he nati' naplenat of ka namsopu fa ma ale ana' plenat abit pah pinan of anmepu neu sin nok aki'at.”

²⁸Etus tonas nane esle' i. Au nekak anole talantia au humak anmutik, mes au ka utonan fa atoni mese amsa neu ale lasi le i.