Read Uab Meto DANIEL 8 Bible Online

DANIEL 8 - Uab Meto bible

DANIEL 8

¹Au upeni mnitas hae nua anbi tabu Kesel Nai Belsyazar, naplenat nan ton tenu.

²Anbi mnitas nane au upeni nak au hake anbi pah Elam, anbi Susan, kot anaek Persia. Au hake haumak Noe Ulai,

³anbi noe ninen le nane au it bibi kase keso mese le masuna ma in sunan sin namnanun nesin ma fe'u nesin es.

⁴Au it bibi kase keso nane in nautu neu aon neno tesan, bian a'li ma bian a'ne'u. Kan mu'i fa mu'it mese le anhake anbi in matan ai he nafetnon na'kone. In anmo'e natuin in salit es nane te in nanaebon.

⁵Leka au fe kiso in, au it ateni bib kase keso mese le naen nem na'ko neno tes ma natpen natuin pah pinan in fafon. In naen namep nis talantia in haen kan ki' fa anbi afu. Anbi in matan sin atnanan anmu'i sunaf mese le anlulu ansae.

⁶Bib kase keso nane anhaumak bibi kase keso le au it anbi noe nane in ninen ma in anfoti nok maunu.

⁷Au kiso in natuin in anfoti bibi kase keso nane. In namaun talantia in anfoti bibi kase keso nane ma naipu in sunan nua sin. Bibi kase keso nane in ka nabe'i fa hen laban. In anbel anbi afu ma nahapun in, ma ka tit fa es amsa le nabe'i hen bab in.

⁸Bib kase keso nane anfonat ma in nao piut. Mes leka antia in tabu, in sunan anaek nane natipu, ma anbi sin balan sunaf ha anpoi anteni, es-es anlulu neu bale teta.

⁹Na'ko sunaf mese le nane sunaf abaut mese anpoi anbine, le in nanae ma in be'in nane anfeunson neu bian a'ne'u, neu neno saen ma nalul'on neu pah maafa.

¹⁰Sunaf nane anfonat ma nao piut talantia in nabe'i hen maken nok meo pa'e neno tunan esle' afkun-afkun, ma na'ko sin bian mapolin neu afu in tunan ma mahapun.

¹¹Ma in nabe'i amsa anlaban meo pa'e nakaf neno tunan, ma nasnasab fua tulu anbi neno-neno le natulu neu meo pa'e nakaf nane, ma natseleb Ume Uisneno neu in.

¹²Ma atoni-atoni nane nauba mo'et sanat ma ka natulu fa fuat-fuat le anlek nalali. Es nane te luli besa amneot nane nasitab anbi afu in fafon. Ale mo'et na'ko sunaf nane naton in nesan.

¹³Nalali te au nen ahake neno tunan mese nak neu bian nak, “Antia neno leka anteni ale sa' le natonon anbi mnitas nane of anbol? Sanat anaek nane anseka fuat neno-neno antia leka anteni? Antia leka anteni meo pa'e neno tunan ma ume luli besa nane he mahapun?”

¹⁴Au nen ahake neno tunan mese natae nak, “Of antia neno 1.150 anteni. Anbi tabu nane fuat neno mabe ma fuat nok-noka of ka matulu fa. Nalali onane te of naleko nafani ume luli besa.”

¹⁵Leka au fe ami he nati uhin mnitas nane in otan te, nok askeken sa' es onle mansian anhake anbi au matak.

¹⁶Au nen hanaf mese le nem na'ko Noe Ulai, in aon bian nak, “Gabriel, amsefi mnitas nane neu in.”

¹⁷Nalali te Nai Gabriel le anhake anbi au matak nane anhaumak kau. Natuin au umtau es nane te au li'tu. Nai Gabriel nak neu kau nak, “Hoi anah mansian, so ho muhin natuin mnitas nane antom neu neno amsoput.”

¹⁸Leka in fe namolok nok kau, au matak anfain. Mes in na' kau ma in anfiti kau talantia au hake' fani. Nalali te in nak,

¹⁹“Of au etun ma uton neu ko, sa' le of anbol le anfani seunbanit natuin Uisneno In to'as. Natuin ho mnitas le nane nalul'on neu tabu amsoput.

²⁰Bib kase keso le ho mit nane, in anmu'i sunaf ma le anfani leta neu plenat Media ma Persia.

²¹Bib keso nane anfani leta neu plenat Yunani, ma sunaf le anpoi anbi in matan sin atnanan nane esle' in kesel ahunut.

²²Sunaf nono ha le anpoi leka sunaf ahunut le nane natipu in otan nak plenat Yunani of anbation anfani plenat ha, mes anbi sin es of ka nabe'i nesi fa onle plenat ahunut nane.

²³Leka plenat-plenat nane anhaumak he namsopu, ma leka sin maufinu nane ansae piut, kesel mese of anbol, le nek manu ma nahine anbi lasi poi.

²⁴In of anfani abe'it, mes ka natuin fa in be'in ma in matanin anmes. In of anfe amle'ut manenu ma sa' le in mo'e of ma nesa. In of nale'un atoni-atoni abe'it ma to Uisneno.

²⁵Natuin in ahinet kun, es nane te in fulit-fulit nane of naton in nesan. In of nanaebon, ma of in nale'un atoni namfau nahun na'ko in anfe amnaut. Ma in nabe'i hen laban Kesel Anaet Anesit. Ma of ka nok fa mansian in niman amsa in of naskuku.

²⁶Mnitas neu fuat anbi neno mabe ma nok-noka le masefi nalali neu ko nane, namneo-namneo of anbol. Mes ale lasi nane amnemat le fe na'lo, es nane te kais mutonneu atoni mese amsa.”

²⁷Anbi amunit au aok anole, es nane te au mofu anbi menas anbi neno fauk-fauk in nanan. Nalali te au fen ma unaoba teni au mepu neu kesel, mes au nekak anole natuin au utenab mnitas-mnitas nane le au ka uhine fa.