Read Uab Meto DANIEL 9 Bible Online

DANIEL 9 - Uab Meto bible

DANIEL 9

¹Anbi ton ahunut na'ko Nai Darius atoni Media, naimnuke na'ko Nai Ahasyweros naplenat pah Babel, au Nai Daniel, au aso'i sulat-sulat le anmatalu nok lasi fnekat. Au utenab neu UISNENO In a'an neu Nai Yeremia, nak kot Yerusalem nane of naskuku nani ton bo'hitu.

³Es nane te au onen nok amneot neu UISNENO, ma toti In athoen neno. Au unahok mak au pake kalo ma au tok anbi afu in tunan.

⁴Au utebes au to sin sanat neu UISNENO Au Uisneno. Au ak, “UISNENO, Ho anaet Ko, ma hai mibes meu Ko. Ho mutis Ho fef bela ma Ho muton Ho manekam Afin-finit neu sin le sin nek Ko ma anmo'e natuin Ho plenat.

⁵Hai misanab milalien, hai mo'e milali maufinu, ma hai mo'e milali sanat. Haim laban Ko ma amtanhai Ho plenat ma ambeo mi'ko Ho lekat ma Ho lulut sin.

⁶Hai ka mitnin fa ale mafefa knino sin, Ho ate-ate sin, le namolok nalali natuin Ho kanam neu ale hai kesel sin, neu ale hai atopus sin, neu hai nai sin ma neu ale hai to.

⁷Koi UISNENO, Ho mo'et nane amneot ma antom kun, mes hai es minaebom kim, esle' hai ala kai mimaika anbi Yudea ma anbi Yerusalem ma ale atoni le hai uf mese Ho musitab anbi bale a'lot ma apaumakat natuin sin ka na'ki fa neu Ko.

⁸Ale hai kesel sin, ale atopus ma ale hai nai sin hai minaebom ma misanab milali meu Ko, koi UISNENO.

⁹Ho muhenu mok nek sako sanat ma manekat, maski nak haim laban Ko.

¹⁰Hai kam nen mit fa Ho hanan koi hai UISNENO, he nati' hai minono hai monim mituin Ho lekat lulut le Hom fe mulali neu kai nao natuina ale mafefa knino, ma Ho ate-ate nane.

¹¹Ale to Israel anele ma antanhai nalali Ho lekat lulut sin ma kan lomi fa he nen Ho hanam. Hai misanab milali neu Ko, es nane te Ho musanut mulali Ho kasat neu kai le antui nani anbi Ho ate Nai Musa in Sulat.

¹²Ho mo'e lasi anmatom nok Ho fef bela neu kai ma neu ale hai ana' plenat sin. Ho musanut kasat anaek neu Yerusalem nesi na'ko kot bian anbi pah pinan le i.

¹³Ale kasat le antui anbi lekat lulut Nai Musa, haim sutai milali. Mes maski nak onane koi hai UISNENO, hai fe amtite neu he nati' amhalin Ho nekam. Hai fe amlomi he mimaika mibalah anbi hai sanat-sanat sin ma hai kam lomi fa hem panat Ho noina-noina sin.

¹⁴Ho, hai UISNENO, Hom kas kai meki amle'ut le Ho muloitan mulali, Ho mo'et nane amneot ma amnonot, mes hai kam nen fa Ho hanam.

¹⁵Koi hai UISNENO, Ho muton mulali Ho kuasat esle' meki Ho to anpoi na'ko pah Mesir, ma Ho kuasat nane sin fe namnau. Hai misanab milali ma hai mo'e milali sanat neu Ko.

¹⁶Hom pesi mulali mok kai anbi batan ahunut, es nane te kais amnek to'an Yerusalem, le Ho kot ma Ho tubu knino. Natuin hai sanat ma hai nai sin maufinu ale atoni nanebet nis Yerusalem ma Ho to.

¹⁷Koi hai Uisneno, amnen hai onen ma hai onen totis. Muloitan mufani Ho Ume, ma ampaloli he nati' ale atoni nahin nak Ho Uisneno Ko.

¹⁸Amnen kai, koi Uisneno, amtae kai ma ampanat kai anbi hai nu'ut ma kot le namle'u natuin Ho kanam. Haim onen neu Ko ka natuin fa hai mo'et alekot sin, mes natuin Ho nek mamun Ko.

¹⁹UISNENO, amnen kai, amsako hai sanat, ampanat kai ma amfiti man kai labah! Kais a'lo le'uf he nati' ale atoni nahin nak Ho Uisneno Ko. Natuin Yerusalem ma Ho to nane Ho ini kun.”

²⁰Au onen piut ma au, au sanat sin ma au to Israel sin sanat, ma toti neu au UISNENO he nati' anpaloli nafani In Ume knino.

²¹Leka au fe onen, Nai Gabriel le au it anbi mnitas ahunut nane, in natpen ma nem neu kau. Anbi tabu nane ale atoni natulu fuat anbi neno mabe.

²²Nalali te Nai Gabriel ansefi molok nak, “Daniel, au aum he tuntaku ko he sefi neu ko mnitas le nane.

²³Anbi tabu hom toti neu Uisneno, In anfe han taes. Au aum he utiab ani natuin In nek ko. Es nane te amnen lek-leko natuin tabu le i au he sefi mnitas le nane neu ko.

²⁴Ton haef hitu no bo'hitu esle' tabu le Uisneno anlek ma anlulu nalali he nafetin ho to ma ho kot aknino na'ko sanat ma maufinu. Of In ansako ale sanat ma of In nahakeb amneot tal nabal-bal, talantia mnitas ma ale salit nane natonon ma of natulu nani neu UISNENO, In Ume knino nane.

²⁵Amtui nai ma muhin nailasi le i: Ton hitu no hitu of anfein ma ankon, naubon na'ko le In napoitan plenat he nafena nafani Yerusalem, talantia atopus le Uisneno anbeti nane in nem. Anbi ton hitu no no'ne am nua in nanan ale lanan ma kot-kot Yerusalem of nafena nafani sin mes tabu nane of nahenu nok nu'ut.

²⁶Anbi tabu nane in amsopun of namate atopus le Uisneno anbeti nalali, mes in ka nasanab fa. Es nane te meo pa'e na'ko kesel abe'it of in nem ma naskuku kot Yerusalem nok Ume UISNENO. Tabu amsoput nane of anbol onle noe sako makenat ma naskuku onle Uisneno anlek ma anlulu nalali.

²⁷Kesel nane of anmo'e fef bela le anhake nabalah nok atoni namfau anbi ton hitu in nanan. Anbi ton nane in atnanan, In of nasnasab fuat ma tulu. Namuni te sa' esle' neki amtaus le antek nak maufinu le naskuku of anlek nani neu Ume UISNENO ma of nabalah anbine talantia in le anlek nani nane napeni lasi maten le Uisneno anlek nani antoman in.”