Read Uab Meto HOSEA 1 Bible Online

HOSEA 1 - Uab Meto bible

HOSEA 1

¹Le i han ba'an le UISNENO anfe neu Nai Hosea Nai Beeri anah anbi tabu Kesel Nai Usia, Nai Yotam, Nai Ahas, ma Nai Hizkia naplenat Yehuda ma Nai Yerobeam Nai Yoas in anah naplenat Israel.

²Anbi tabu UISNENO namolok ahunut neu to Israel le nanete natuin kau, UISNENO nakua a'an nak, “Hosea, ho mafe nai mok bife mese le anlomi lasi mapaisa, ma ho anah sin of anmo'e on in amsa. Au to namnes nok ho fenai nane; sin ka na'ki neu Kau fa, ma sin nasaitan Kau.”

³Es nane te au mafe bife mese in kanan bi Gomer Nai Diblaim in anah. Leka in nahonis nalali anah ahunut, li'anmone mese,

⁴UISNENO nakua a'an neu kau nak, “Mukanab ho anah nane Nai Yizreel natuin ka lo fa anteni of Au kas Kesel Israel natuin lasi maten le Nai Yehu in na'if, anmo'e anbi Yizreel of Au usopu ani plenat na'ko Nai Yehu in sufan.

⁵Anbi tabu nane of Au uskuku ani meo pa'e Israel anbi Nonof Yizreel.”

⁶Namuni te au fenai nahonis kai anah hae nua, li'an feto mese. UISNENO nakua a'an neu kau nak, “Hosea, mukanab ho anah le nane mak ‘Le Ka nek nani Fa’, natuin of Au ka nek ateni fa to Israel, ma of Au ka sako fa sin sanat.

⁷Mes to Yehuda of Au nek ani. Au UISNENO, le sin Uisneno, mes ka nok fa makenat, mes ka nok fa suni ai as'anef ai bikase nok in asaet.”

⁸Leka haim sole milali hai anah hae nua, au fenai naapu ma nahonis li'anmone mese anteni.

⁹UISNENO nakua a'an neu kau nak, “Mukanab ho anah nane mak ‘Ka Au to fa’, natuin Israel nane ka Au to fa, ma Au ka sin Uisneno fa.”

¹⁰To Israel sin of namfau onle snaen anbi tasi, talantia ka ka tai ai kat so'i tabe'i fa. Tabu le Uisneno nakua a'an neu kau nak, “Au to ka es fa hi,” mes in tabu of antia ma of In nak neu sin nak, “Au le i Uisneno amonit Kau ma hi le nane Au anah-anah ki!”

¹¹Pah Yehuda ma pah Israel of nameseb sin anfani. Mes of sin naiti atopus mese ma of sin ansatok ma anmoni nok athoes anbi sin pah. Namneo, Nai Yizreel nane in neno of anfani neno naek!