Read Uab Meto HOSEA 10 Bible Online

HOSEA 10 - Uab Meto bible

HOSEA 10

¹Israel onle tua min kase le nafua naek. In amaus nane ansato ma nao piut, baki tulu le sin anmoe ansato ma nao piut amsa. Athoes anbi sin monin nane ansato piut, sin anmoe fatu mamasa le anfani uisneno teta sin nabes neune piut.

²Atoni-atoni le sin nekan anbeo nane, of ansutai nani sin sanat. Uisneno of naskuku sin baki fuat ma of natseleb nani sin fatu mamasa uisneno teta nane.

³Ka lo fa anteni of sin namolok nak, “Hit kat mu'i fa kesel natuin hit ka tamtausan fa UISNENO. Kesel nane in otan sa' ka neu kit?”

⁴Sin namoe ma anmoe manta'en poi ma anfutnok neu fef bela le ka maota fa. Sin naklelo aplenat talantia lasi ka amneot anmoni onle hau laso anbi lene le na'foi nalali.

⁵Atokos anbi kot Samaria of sin namtau; sin ma ale ana' fuat le antuthae bijae na'ko mnatu anbi Betel of nekan antu' ma ankae natuin sin uisneno teta nane sin amasat namneku nalali.

⁶Fatu mamasa uisneno teta nane mamneki neu Asyur hen fe nani neu kesel afin-finit. Israel natuin salit le anmoe sin namaebok ma napeni akan.

⁷Of naskuku nani Samaria ma sin kesel nane of neki anpoi onle oe neki hau tuka mese.

⁸Sin ume onen anbi tubu-tubu anbi Betel bale atoni Israel naluli nabes neu uisneno teta, of naskuku nani. Katila ma hun of anmoni anbi sin baki tulu. Es nane te of sin anbai neu ale tubu-tubu nak, “Amtobe man kai!” ma neu nu'af-nu'af nak, “Amkub man kai!”

⁹UISNENO nakua a'an nak, “Lasi le anfatnon anbi Gibea, atoni Israel ka nasnasan fa moe sanat he nati' anlaban Kau. Es nane te anbi Gibea amsa sin antam anbi makanet.

¹⁰Of Au maken on atoni-atoni le anmoe sanat, ma of Au kas sin. Uf-uf of nabua ma anlaban sin, ma of sin ansimo kasat natuin sin sanat namfau.

¹¹Anbi ahunut Israel nane onle bijae le nanoina nok leko he nati' anali aen oek. Au ka tao fa besi foi neu in to'an amasat nane. Mes tabu le i Au ufek ulali neu he nati' Useke neu mepu mafena. Au lenu Yehuda he na'foi, ma Israel Au lenu he nati' anhel.

¹²Au umolok ak, ‘Hoi Israel! Amkanu amteni lene fe'u neu ho aom, ma amsenan fini amneot ma amnonot, ma ketu tetus ma athoes neno le anpoi natuin hom nek Kau nok amneot. Natuin, antia nalali in tabu neu he nati' hi mami Kau, hi UISNENO. Au aum ma asanut Au athoen neno neu ki.’

¹³Mes ho moe lasi le ateta kun; ho moe maufinu, es nane te of hom seu fuaf amle'ut esle' lasi susu'. Ho muah mulali lasi fulit ma poi fuan.” UISNENO nakua anteni In a'an nak, “Hoi to Israel, natuin ho mufnekan neu ale ho aklet makenat ma ho meo pa'e sin,

¹⁴es nane te ho to sin of antam anbi makenat, ma ale ho kot sin of naskuku nani sin. In monin on afi Kesel Nai Salman nale'un kot-kot Bet-Arbel anbi makenat in nanan, ma anteli namate ainaf-ainaf nok sin anah sin.

¹⁵Lasi nane es of anbol neu ki, hoi atokos Betel, natuin hi mo'e milali maufinu le anaek. Makenat of anbolan ki anbi tabu manas naton in pinan, ma hi kesel nane in of anmate.”