Read Uab Meto HOSEA 12 Bible Online

HOSEA 12 - Uab Meto bible

HOSEA 12

¹UISNENO nakua a'an, “To Israel anhaumak Kau neki uab fulit ma poi; to Yehuda anlaban Kau nabalah, Au Uisneno Le Knino ma aki'at.

²Ale sa' le to Israel anmo'e na'ko nok-noka antia neno anmabe ka maota fa ma naton amle'ut onle anin neno saen. Lasi kake ma maufinu antuna ma nao piut anbi sin atnanan. Sin anmo'e manta'en nok Asyur ma neki min fomeni neu Mesir anfani on taka matalus.”

³UISNENO anmu'i lasi nok Yehuda; In of ankas Israel amsa natuin sin mo'et. In of antobes ale sin mo'et.

⁴Na'ko in ainaf in apun Nai Yakub le sin na'if nasik nan kan tataf na'ko Nai Esau; ma leka in namnasi Nai Yakub anmaban nok Uisneno.

⁵In anmaban nok ahake neno tunan mese, ma in nis. Oke te in ankae ma antoti hen fe neune tetus. Nalali te anbi Betel, Uisneno nem neu Nai Yakub hit na'if nane, ma namolok nok in.

⁶Uisneno le nane UISNENO Akuasat Afinit. In kanan le nane UISNENO kun. Nok kanaf nane In anlomi he nati' ale atoni nabes neu In.

⁷Es nane te, hoi hi le Nai Yakub in sufan, miteb nai neu hi Uisneno ma amfani nai meu In. So amoni nai anbi manekat ma nek amnonot, ma ampao nai nok nek amnalan talantia hi Uisneno naton In kuasat.

⁸UISNENO nakua a'an neu Israel nak, “Hi afulit ki onle Kanaan; atoni asosa anlomi hen fuli sin aok bian sin neki atnais apenut.

⁹Sin namolok nak, ‘Tabu le i hit amu'it kit.’ ‘Hit tis! Ka tit fa es hen namolok neu kit nak ho mupeni maus le nane ka nok fa amneot ma amnonot.’

¹⁰Mes Au, ho UISNENO, le napoitan ki na'ko pah Mesir, of hi mimaika amteni anbi um-ume onle anbi ahun-hunut Au aum neu ki anbi mnela snaen.

¹¹Au utonan ulali ale Mafefa knino sin, ma Au fe neu sin mnitas namfau. Nanete natuin sin Au uton ulali Au salit sin neu ki, Au nonot ki,

¹²maski onane amsa fe anmu'i le nabes neu fatu le'u ma hau le'u anbi Gilead, ma natulu bijae anbi baki fuat in tunan anbi Gilgal. Mes sin le nabes neu fatu le'u ma hau le'u nane of sin anmate, ma ale baki fuat anbi Gilgal nane of anfani fatu manibun anbi lene-lene.”

¹³Nai Yakub le hit na'i nane naen na'ko Mesopotamia, oke te he nati' in napeni fenai, in anaetnon neu atoni abit nane ma in natuku atoni-atoni nane sin bibi kase.

¹⁴Uisneno anlenu Mafefa knino mese he nati' neki atoni Israel sin anpoi na'ko bale aten pah Mesir, ma neu he nati' anpanat sin.

¹⁵Atoni Israel anmo'e UISNENO talantia nato' nae le'uf; es nane te natuin sin maufinu nane sin of napeni kasat. UISNENO of ankas sin natuin sin anmo'e atoni bian na'akan In.