Read Uab Meto HOSEA 13 Bible Online

HOSEA 13 - Uab Meto bible

HOSEA 13

¹Anbi ahun-hunut uf Efraim nane naupab nani, talantia leka anmu'i ana' plenat na'ko uf le nane uf-uf bian na'ko Israel namtausan in. Mes uf Efraim nane anmofu anbi sanat natuin sin nabes neu Baal, es nane te in of namneku.

²Talantia tabu le i uf Efraim fe anmo'e sanat piut; sin anmo'e fatu mamasa na'ko noni muti he nati' nabes neune. Fatu mamasa le anmo'e neki nimaf ma tenab mansian Sin namolok nak, “Mitulu nai fuat neu fatu mamasa le i!” Lasi amkakat natonon, natuin mansian anek bijae le anmo'e na'ko fatu nane!

³Natuin lasi nane atoni-atoni nane of namneku onle nape ai onle akum anbi nok-noka. Sin onle ane ut le anin anfu na'ko bale pesen, ma onle masu le anpoi na'ko bale hanat.

⁴UISNENO nakua a'an nak, “Au le i hi UISNENO, le upoitan ki na'ko pah Mesir. Hi ka mu'i amteni fa Uisneno naik na'ko Kau. Au le hi afetin.

⁵Anbi pah monas ma anbi mnela snaen, Au le i es apanat ki.

⁶Mes leka him tam milali neu pah alekot nane, ma hi miah mimsen, him moni nok nek anaeb ma amnikan Kau.

⁷Es nane te Au heke ki onle meo asu. Of Au eka ki anbi lanan onle asu fui.

⁸Of Au laban ki onle asu fui le naneku in ana sin. Of Au pisu usitab ki. Of Au pisu ki onle meo asu anpisu ki anbi hi balam, ma of Au pisu usitab ki onle mu'i fui.

⁹Hoi uf Israel, Au of uskuku ani ki! Ma sekau es of hen tuntaku ki?

¹⁰Him toti kesel ma atopus, mes tabu le i sin es me ka? Nabe'i ka he sin nafetin ho to?

¹¹Anbi nek maunu ma nek to'as Au fe kesel neu ki, ma nok to'as Au hel ufani sin amsa.”

¹²UISNENO nakua a'an nak, “Sanat ma penu Israel matui nalali, ma tuis nane of Au ubela ani.

¹³Israel napeni tabu sona he nati' anmoni, mes natuin monot es nane te in kan panat fa sona le nane. In onle li'ana le ansek anbi ainaf in apun ma kan poi fa na'kone.

¹⁴Of Au ka ufetin fa uf le i na'ko atoni amates in kuasat. Hoi lasi maten, so mupe' ho snama le nane! Munaob ho mepu le muskuku nane! Au of ka nek fa uf le i anteni.

¹⁵Maski nak to Israel sin anmoni nok athoes onle hau le namlia, mes of Au sonu anin neno saen le maputu na'ko pah asnaen. Anin nane of nametib ale oe mata ma oe nopu sin talantia alekot le nane namneku.